Niamiecki budaŭničy kancern Knauf choča vyjści ź biełaruskaha rynku
Niamiecki vytvorca budmateryjałaŭ Knauf praciahnuŭ pracu ŭ Rasii i Biełarusi, niahledziačy na vajnu va Ukrainie. Ale paśla krytyki na svoj adras ciapier jon choča vyjści z rasijskaha rynku, a los pradpryjemstvaŭ u Biełarusi pakul zastajecca niavyznačanym, piša niamieckaje vydańnie Br24.
Mižnarodny kancern padtrymlivaje ŭ Biełarusi dźvie vytvorčyja placoŭki, adna ź jakich była častkova finansavanaja niamieckimi kredytami. Pobač z kampanijaj-dačkoj, jakaja naležyć Knauf na 100%, niemcy viaduć vytvorčaść i praz dadatkovaje partniorstva, pra jakoje Knauf nie daje padrabiaznaj infarmacyi, piša Br24.
Finansavańnie hetaha druhoha pradpryjemstva ŭ 2019 hodzie častkova rabiłasia praz kredyty niamieckaha dziaržaŭnaha banka KfW i jaho raźvićciovaj struktury DEG.
Zhodna z tłumačeńniami KfW, z pačatkam vajny va Ukrainie bank bolš nie viadzie aktyŭnaści ŭ Biełarusi. Ale ŭrad Biełarusi pryniaŭ zakon, pavodle jakoha zamarožvajecca majomaść i ŭdzieły zamiežnych inviestaraŭ, što robić ich prodaž niemahčymym. U Knauf havorka idzie ŭ pieršuju čarhu pra vytvorčaść hipsakardonu, tynkoŭki i inšych budaŭničych materyjałaŭ.
Kampanija płanuje nie raniej siaredziny nastupnaha hoda pradać svoj zavod u Rasii miascovamu biznesmienu, blizkamu da ŭładaŭ. Na zapyt BR24 Knauf paviedamiŭ u siaredzinie kastryčnika, što praces prodažu, jaki pačaŭsia ŭ krasaviku, praciahvajecca bieź źmienaŭ, razhladajucca mahčymyja varyjanty, a dadatkovyja padrabiaznaści pakul nie ahučvajucca.
U toj ža čas niamieckaje vydańnie Wirtschaftswoche vyśvietliła, što tolki ŭ Rasii Knauf za apošnija try hady atrymlivaŭ miljardnyja abaroty ŭ dołaravym ekvivalencie, pry hetym jany mieli tendencyju da rostu. Adnak rasijski ŭrad zabaraniŭ Knauf vyvodzić atrymanyja prybytki za miežy krainy.
Hrodna staić na vušach paśla pryznańnia papularnaha haradskoha sajta «ekstremisckim». Ale na hetym nie skončyłasia9
Kamientary