Chto lepšy dla Biełarusi — Tramp ci Charys? Paradaksalnaja dumka Šrajbmana
U vypadku prychodu da ŭłady Trampa bolšy šanc na pieramieny, ale jość istotnaje «ale», miarkuje Šrajbman.
U novym vypusku jutub-kanała «Hadzińničak cikaje» analityk Arciom Šrajbman vykazaŭ svoj pohlad na toje, jak vyniki prezidenckich vybaraŭ u ZŠA paŭpłyvajuć na Biełaruś.
«Pieramirje prosta ciapier — paradak dnia, ź jakim idzie Tramp. Heta toje, što blizka bolšaści krainy. Kali havaryć, jak ja baču aptymalny zychod amierykanskaj palityki na našym napramku, — heta palityka, jakaja pryvodzić da asłableńnia ŭpłyvu Rasii», — adznačyŭ Šrajbman.
Analityk nie sumniavajecca ŭ tym, što Tramp, u vypadku prychodu da ŭłady ŭ ZŠA, spynić padtrymku Ukrainy, kab dabicca chutčejšaha pieramirja. Adnak nieviadoma, što jon budzie rabić, kali Pucin nie spynicca.
«Ja dumaju, što Pucin na hetym nie spynicca. (…) Kali jon [Tramp] prymusić Ukrainu da pahadnieńnia, to heta budzie kapitulacyjnaje pahadnieńnie. (…) Dla nas heta budzie farmat nie raŭnapraŭnaha, raŭnacennaha kampramisu, a farmat Rasii, jakaja pieramahła.
Heta budzie Rasija, jakaja na kani, jakaja nie patraciła jašče dastatkova resursaŭ, jakaja moža praciahvać i kantralavać Łukašenku, i mieć ambicyi adnosna Biełarusi, i na nastupnym zachodzie, kali Tramp užo sydzie ci navat pry Trampie, pasprabavać jašče raz atakavać Ukrainu».
Tamu pieramohu Trampa jon nie ličyć aptymalnym scenaryjem dla Biełarusi.
«Jak by heta ni hučała, moža być pa-ludajedsku (tym bolš uličvajučy, što ŭkraincy pakutujuć, heta hučyć uvohule pa-ludajedsku), dla nas pryjarytet doŭhaterminovy — heta maksimalnaje asłableńnie Rasii», — adznačyŭ analityk.
Šrajbman nie vieryć u toje, što kanflikt Rasii z Ukranaj moža skončycca pieramirjem.
«Mnie zdajecca, što heta pamyłkovaje pryniaćcie Pucina, jakoje panuje šmat u jakich zachodnich kabinietach i stalicach, što jon zmahajecca za terytoryi. Mnie zdajecca, heta nie razumieńnie hetaha čałavieka i jaho met. (…) Nie ŭ terytoryjach i nie ŭ haradach reč. A reč u dysfunkcyjanalnaści Ukrainy.
(…) Usie dumajuć, što Pucinu treba prosta prapanavać niejkuju tam paralel, mierydyjan, i jon pahadzicca. Karejski scenaryj. Usio. (…) Ja dumaju, heta takaja dastatkova naiŭnaja ŭstanoŭka. Čamu ja i nie vieru ŭ pieramovy, a tym bolš ab pieramirji ci miry».
Jak vybary ŭ ZŠA paŭpłyvajuć na situacyju ŭ Biełarusi
Na pohlad Šrajbmana, u vypadku pieramohi na prezidenckich vybarach demakrataŭ, nie adbudziecca nijakich źmien.
«Pry demakratach, asabliva pry Charys, my budziem płyć. I biełaruskaja palityka dakładna nie budzie niejkaj inavacyjnaj. Jana budzie bieź siurpryzaŭ, bieź niejkich ekśpierymientaŭ. Jany prosta buduć płyć u kanvie.
Kali Łukašenka, Pucin, vajna buduć im padkidvać niejkija novyja raźviazki, to jany buduć ich, chiba što, vykarystoŭvać hetak ža, jak i papiaredniaja administracyja. A kali nie, to jany buduć praciahvać siońniašniuju palityku».
Bolš šancaŭ ubačyć niejkija pieramieny, na pohlad, Šrajbmana, u vypadku prychodu da ŭłady Trampa.
«Jak by heta paradaksalna ni hučała, umoŭna havoračy, jamu budzie plavać na Biełaruś, jašče bolš, čym na Ukrainu. Ale voś čynoŭniki pad im, uzroŭniu namieśnika dziaržsakratara, jakija zajmajucca našym rehijonam, ja dumaju, što ŭ ich budzie trochi bolš pola dla ekśpierymientu ŭ farmacie: «U bosa niama pohladu, bolš niama nijakaj palityki, nichto nas nie pakrytykuje za toje, što my pasprabujem jakija-niebudź ekśpierymienty». I jany mohuć być śmialejšymi ŭ hetym sensie».
U mahčymych pieramienach, adznačaje analityk, šmat što budzie zaležyć ad Łukašenki, ad taho, što jon budzie hatovy prapanavać.
«Umoŭna, kali Łukašenka prapanuje «dajcie mnie detali dla «Biełavija» (pra jakija Jašyn havaryŭ), ja adpušču sotniu čałaviek» ci «paprasicie Litvu prapuścić kalij, a ja adpušču tysiaču čałaviek» (ja vielmi ŭmoŭna kažu), to administracyja Charys, Bajdena heta nie zrobić. (…)
A jaki-niebudź vysokapastaŭleny čynoŭnik z administracyi Trampa moža skazać: «Čamu nie? Ja źjezdžu i pahavaru. Mnie nie zaškvarna. Naš dzied pakładzie sabie ŭ archiŭ, što jon dabiŭsia vyzvaleńnia ludziej. A što tam jeŭrapiejcy z hetaj nahody dumajuć, mnie plavać».
Šrajbman źviartaje ŭvahu, što mienavita pradstaŭniki administracyi Trampa jeździli ŭ Minsk. Heta daradca Trampa pa nacyjanalnaj biaśpiecy Džon Bołtan i dziaržsakratar ZŠA Majk Pampiea.
«Moža być, Tramp u momancie (prynamsi dla pytańniaŭ vyzvaleńnia palitviaźniaŭ) moh by być navat pierśpiektyŭniejšym. (…) Ja nie ŭpeŭnieny, što Tramp ich vyzvalić, ja prosta dumaju, što (…) jaho ludzi buduć bolš adkrytyja dla ździełak.
Ja dakładna viedaju, što jon budzie bolš adkryty da mocnaj Rasii. I, na žal, ja liču, što asłablenaja Rasija dla našaj budučyni važniejšaja, čym prosta ciapier damovicca ab vyzvaleńni ludziej, jak by heta cynična ni hučała.
Ale ŭ momancie my možam ubačyć niejkuju bolšuju dynamiku ad administracyi Trampa. Mahčyma, ja siabie padmanvaju».
Stała viadoma pra aryšt minskaha chirurha z 17-hadovym stažam. Joj pahražaje ahromnisty termin za palityku5
Kamientary