Hałoŭnaja čaša basiejna maje daŭžyniu 50 mietraŭ, ale jon moža pry patrebie transfarmavacca i ŭ dva 25-mietrovyja. Paviedamlajecca, što abjekt byŭ pabudavany «ŭ ramkach humanitarnaha supracoŭnictva Biełarusi i Kitaja».
Sam kompleks padzieleny na dźvie častki: dla spabornictvaŭ i hramadskuju. U pieršym błoku dva basiejny pa 50 mietraŭ: płavalny i skačkovy. Trybuny buduć źmiaščać bolš za 6 tysiač hledačoŭ. U basiejnie buduć treniravacca zbornyja krainy pa vodnych vidach sportu: płavańni, vodnym poła, sinchronnym płavańni, a taksama pa skačkach u vadu.
Čašy basiejnaŭ abstalavanyja padvodnymi kamierami na dnie, kab treniery mahli sačyć za technikaj spartsmienaŭ.
Akramia taho, tut jość kamfortnyja zały dla suchoj padrychtoŭki, adnaŭlenčy centr, hidrakabiniet dla adnaŭleńnia, punkt hramadskaha charčavańnia, pakoi adpačynku.
U spartkompleksie ŭsio aŭtamatyzavana.
Paviedamlajecca, što heta pieršy ŭ Biełarusi basiejn, jaki całkam adpaviadaje mižnarodnym standartam.
Raźmiaščajecca basiejn na vulicy Kalvaryjskaj, a pačali jaho budavać u krasaviku 2020 hoda na miescy źniesienych dvuchpaviarchovych damoŭ i drukarni «Čyrvonaja zorka». Srodki ź dziaržbiudžetu vyłučalisia tolki na padrychtoŭku placoŭki da budaŭnictva. Kitajski ž bok uziaŭ na siabie abaviazacielstvy nie tolki pa budaŭnictvie basiejna, ale i pa absłuhoŭvańni abjekta na praciahu dvuch hadoŭ paśla ŭvodu ŭ ekspłuatacyju.
Adkryvać basiejn pryjazdžaŭ sam Łukašenka, heta vidavočna častka jahonaj pieradvybarčaj kampanii. U svaim vystupleńni jon adznačyŭ rolu kitajcaŭ u pabudovie hetaha abjekta i zajaviŭ pra nieabchodnaść pradumvańnia «prakitajskaj kampazicyi kala stadyjona».
Viarnuŭsia z vajny, uładkavaŭsia ŭ Varšavie, pasvaryŭsia z usimi — i źnik. Pryjacieli pra eks-kalinoŭca Maksima Ralko, jakoha zatrymali ŭ Biełarusi1818
Kamientary