Na bierazie Naračy źjavilisia «kaśmičnyja» kupały z usimi vyhodami. Što heta za dziva?
Na bierazie Naračy źjavilisia hieakupały z usimi haradskimi vyhodami (i navat vysakachutkasnym internetam), jakija možna arandavać usiaho za 100 rubloŭ u sutki. Ich hałoŭnaja fiška — blizkaść da voziera, piša «Anłajnier».
Pakručastaja ściežka vichlaje pamiž drevami i niečakana zbočvaje da šłahbauma. Za im užo možna razhledzieć dva šeryja kupały — heta i jość toj samy hłempinh (tak nazyvajuć kiempinhi z bolš kamfortnymi ŭmovami). Faktyčna jon znachodzicca na bierazie voziera — prosta z namiotaŭ adkryvajecca vid na Narač.
Sam plaž pad nazvaj «Urliki» naležyć sanatoryju «Pryaziorny». U 1990-ja, kali ŭ Biełarusi niaśmieła i niaŭpeŭniena zaradžałasia turystyčnaja infrastruktura, entuzijasty pabudavali tut ratavalnuju vyšku, raspranalni, sanvuzieł i restaran na vadzie. Łakacyja choć i była papularnaj, ale pravierku časam nie vytrymała i pieratvaryłasia ŭ zakinutaje, dzikaje miesca.
Ničoha nie mianiałasia da 2022 hoda, pakul ziamlu nie pieradali sanatoryju. Tady i pačałasia maštabnaja rekanstrukcyja. Dziakujučy łandšaftnym dyzajnieram na terytoryi vyras roŭny hazon, dekaratyŭnyja kusty i maładyja drevy. Źjavilisia darožki z sučasnaj plitki, draŭlanyja pamosty, miescy dla adpačynku — areli, łaŭki, hamaki… Na samym bierazie pastavili šezłonhi i altanki, raspranalni i letnija dušy. Adkryŭsia letni bar ź biezałkaholnymi napojami i restaran na 80 pasadačnych miescaŭ. A pa samym voziery stali kursiravać jachty, hipnatyzujučy ludziej na niezapłanavanyja vydatki zichatlivymi biełymi vietraziami. Narod klunuŭ.
Tady kamanda «Pryaziornaha» zadumałasia: a dzie možna spynicca na noč ludziam, jakija vyrašać pryjechać siudy ź inšaha horada abo vobłaści?
«Na Naračy nie tak šmat varyjantaŭ raźmiaščeńnia. Heta albo sanatoryi, kudy nie tak prosta trapić letam, bo ŭsio zahadzia raśpisana, albo ahrasiadziby. Raniej ludzi zdavali navat ułasnyja kvatery: staralisia źjechać kudyści na čas, kab vyzvalić žyllo dla pasutkavaj arendy. Časta ŭ pakojach zastavalisia asabistyja rečy haspadaroŭ. Ciapier heta ŭžo pieratvaryłasia ŭ biznes: ułaśniki pieravodziać kvatery ŭ kamiercyjnuju nieruchomaść, zabiaśpiečvajuć tam prybirańnie, dadajuć raschodniki. Usio stała bolš cyvilizavana. Adnak dastupnych varyjantaŭ adpačynku ŭ nas usio adno nie chapaje», — ličyć dyrektar sanatoryja «Pryaziorny» Siarhiej Niechviadovič.
Tak i ŭźnikła ideja arhanizavać na bierazie hłempinh. Praŭda, zamiest zvyčajnych namiotaŭ tut byli zmantavanyja hieakupały. Praces ustanoŭki nastupny: spačatku ŭ ziamlu zabivajucca pali (kala 80 štuk dla kožnaj kanstrukcyi), na ich mantujecca draŭlany pamost. Źvierchu — doška, paśla — płast uciaplalnika i jašče adna doška, na jakuju ŭžo ŭkładvajecca łaminat.
Škilet kupała składajecca sa stalovaj truby, pakrytaj palimiernaj farbaj, — vytvorca adznačaje, što kanstrukcyja zdolnaja vytrymać paryvy vietru, mocny doždž, śniehapad… Karkas pryjazdžaje ŭ razabranym vyhladzie i źbirajecca na miescy. Zatym na jaho naciahvajecca čachoł z PVCH-materyjału, jaki zamianiaje stol i ścieny. Jon taksama maje dadatkovaje ŭciapleńnie, a jašče abaronu ad ultrafijaletu. U hetaj «ciomnaj materyi» jość i śvietłaja plama — miakkaje panaramnaje «škło» z PVCH, jakoje možna zakryć blackout-štorami, kali haściam zachočacca pryvatnaści.
«Z dapamohaj elektryčnaha kabiela my dapoŭnili jaho abahrevam, kab u prachałodnaje nadvorje akno nie pacieła z-za roźnicy tempieratur unutry i zvonku, a zimoj nie zamiarzała».
Zboku kupał vyhladaje nie vielmi vialikim pa pamiery. Tamu kali apynaješsia ŭsiaredzinie, ščyra ździŭlaješsia, kolki ŭsiaho tut źmiaščajecca. Maksimalnaja vyšynia stolaŭ u numary — 4 mietry, płošča — kala 37 «kvadrataŭ» (u Minsku kvatery takoha pamieru!).
U centry kupała znachodzicca dvuchspalny łožak i tumbački, pobač — stolik z dvuma kresłami. Ź inšaha boku — mini-kuchnia z kampaktnym chaładzilnikam, mikrachvaloŭkaj, elektryčnym čajnikam i rakavinaj. U numary žycharoŭ čakajuć posud, čaj, dźvie butelki vady i navat maleńki prezient, jaki možna zabrać dadomu, — padstaŭka pad łyžku.
«Hości mohuć pryhatavać niešta sami (u košt hłempinhu ŭvachodzić arenda hrylu), mohuć padsiłkavacca ŭ restaranie na bierazie abo zakazać u sanatoryi šviedski stoł: śniadanak i viačera kaštujuć 12 rubloŭ na čałavieka, abied — 25 rubloŭ».
U kupale znajšłosia miesca modulnamu sanvuzłu — jon chavajecca ŭ draŭlanaj «skryncy». Tam jość usie zvykłyja haradskomu čałavieku vyhody: dušavaja kabina, unitaz, rakavina. Chałaty, ručniki i hihijeničnyja nabory, naturalna, taksama dadajucca.
U numary praduhledžanyja naturalnaja i štučnaja vientylacyja. A jašče tut visić kandycyjanier: zimoj jon aciaplaje pamiaškańnie, a letam, naadvarot, astudžaje. Varta adznačyć, što navat z vyklučanaj pryładaj usiaredzinie było dastatkova ciopła — vosieńskaje soniejka niadrenna tak prahreła kupał.
Hłempinh padłučany i da optavałakna: u kožnym domiku jość ułasny madem, tak što tyja, chto addalena pracuje, zmohuć heta rabić prosta kala voziera.
«Padviadzieńnie da ŭčastka kamunikacyj zaniało davoli šmat času i prytarmaziła budaŭnictva. Ustanoŭka kupałoŭ pačałasia tolki ŭ žniŭni i skončyłasia da siaredziny kastryčnika, choć my płanavali adkryć kompleks letam».
Pa słovach dyrektara sanatoryja «Pryaziorny», sabrać hieakupał nie tak składana i ŭžo dakładna tańniej i chutčej, čym z nula ŭzvodzić zvyčajny katedž. Prynamsi, nie treba padvozić bieton, cehłu i hetak dalej.
Košt adnoj kanstrukcyi — kala 60 000 rubloŭ.
Pakul što kupałaŭ u hłempinhu ŭsiaho dva. Pieršy nosić nazvu «Kosmas»: zusim chutka ŭsiaredzinie pastaviać prajektar, jaki budzie tranślavać zornaje nieba na stol. Druhi nazvali «Harmonijaj» — tam źjavicca viniłavy prajhravalnik. U pierśpiektyvie siudy pryviazuć jašče dva abjekty pad zdaču, i ŭ kožnaha budzie svaja fiška, jakaja adroźnivaje jaho ad astatnich.
Samu terytoryju ŭparadkujuć: pasadziać drevy, dadaduć padśviatleńnie. A na nievialikich terasach abstalujuć zony adpačynku z kresłami i šezłonhami.
Ciapier noč u hieakupale kaštuje 100 rubloŭ z čałavieka. Jon raźličany na dvaich, ale kali kompleks stanie zapatrabavanym u siemjaŭ, usiaredzinie hatovyja pastavić jašče i raskładnoje kresła dla dziciaci.
«U hety košt uvachodzić karystańnie infrastrukturaj sanatoryja: basiejnam, trenažornaj załaj, prakatam rovaraŭ abo łyž, rašotkami dla hrylu. Možna biaspłatna karystacca altankaj i naziralnaj placoŭkaj, chadzić na johu i roznyja kulturnyja mierapryjemstvy. Možna naviedać i naš viarovačny haradok, jaki adkryŭsia zusim niadaŭna».
Chutčej za ŭsio, užo da leta pražyvańnie ŭ hłempinhu padaražeje — usio ž taki siezon maje značeńnie. Viadoma, heta varyjant nie dla intraviertaŭ: z ranicy da viečara tut chodziać natoŭpy narodu.
«Tak, hetaje miesca nielha nazvać adasoblenym, ale my raźličvajem, što arandavać numary buduć ludzi, jakim cikavy plažny adpačynak. Ceły dzień jany buduć zaharać, kupacca, špacyravać i viartacca siudy na načleh. Paśla zachodu sonca tut užo nie taki aktyŭny ruch», — rastłumačyŭ dyrektar sanatoryja «Pryaziorny».
Voś jak vyhladajuć tureckija dačy. Što možna pieraniać?
Na Naračy pačynajuć budaŭnictva damoŭ-šałašoŭ
Savieckuju bazu adpačynku na Naračy pierarobiać pad hatel
Jakuju ekaściežku ŭ Biełarusi abrać dla padarožža vychadnoha dnia?
«Va ŭsioj kampanii źjaviŭsia mocny śvierb». Pra što treba pamiatać, kali vyrašyš kupacca ŭ Naračy
Adpačynak na pryrodzie. Top-5 malaŭničych miescaŭ u Biełarusi, dzie varta pabyvać hetaj viasnoj
«Maje siły skončylisia»: Valaryna Kustava raskazała, čamu źbiraje na dapamohu svajoj siamji18
Kamientary