«Absalutna novy aŭtamabil, tolki ź Jeŭropy!» Jak padsankcyjny premium traplaje ŭ Biełaruś i ci vyhadna rasijanam jechać da nas pa takija aŭto
Tłumačym, jaki premium-siehmient mašyn pa-raniejšamu dajazdžaje da Biełarusi.
Śviežaja sankcyjonka jedzie
Niahledziačy na toje, što ŭžo amal jak paŭhoda ŭ Biełaruś nielha ŭvozić ź Jeŭrasajuza aŭtamabili z abjomam ruchavika, bolšym za 1,9 litra, a taksama hibrydy i elektramabili, padsankcyjnyja aŭto praciahvajuć traplać u našu krainu. Choć abjomy daloka nie tyja, što byli raniej.
Całkam nie spyniaje patok luksavych aŭto navat toj fakt, što z kastryčnika śviežapryhnanyja ŭ Biełaruś aŭtamabili nielha, jak raniej pierapradavać u Rasiju. Ź biełaruskaha boku ničoha nie źmianiłasia, i pradavać ich pa-raniejšamu možna, ale rasijski pakupnik u takim vypadku budzie vymušany płacić nie 3400-5200 rasijskich rubloŭ (kala 33-50 jeŭra) utylzboru, a nie mienš za 556 200 rasijskich rubloŭ (kala 5350 jeŭra).
Dziakujučy lhotnikam vyhada zastajecca
Adzin z prykładaŭ — BMW X3M 2023 hoda vypusku z prabieham 25 tysiač kiłamietraŭ. U abjavie paznačana, što mašyna tolki pryjechała z Hiermanii. Pravierka pa VIN na sajcie biełaruskaj mytni paćviardžaje hety fakt. Data mytnaj ačystki — 18.10.2024.
Pakolki mašyna małodšaja za try hady, to razmytniacca jana budzie pa staŭcy 48% ad koštu. Z ulikam vykarystańnia lhoty pa 140-m ukazie, mytnyja płaciažy za takoje aŭto składuć kala 9-10 tysiač jeŭra. To-bok navat z ulikam uznaharody za pasłuhi lhotnika ekanomija na mycie składaje 8-9 tysiač jeŭra.
Kali raptam hetuju mašynu zachočuć kupić rasijanie, to im daviadziecca zapłacić kamiercyjny ŭtylzbor u pamiery kala 5350 jeŭra.
Važna, što paśla hetaha rasijski pierakup abo prosta novy ŭłaśnik moža biez prablem pierapradavać takuju mašynu ŭ luby momant, nie čakajučy 12 miesiacaŭ z momantu afarmleńnia.
Kali b takaja mašyna adrazu razmytniałasia ŭ Rasii z poŭnaj apłataj myta i kapieječnaha lhotnaha ŭtylzboru ŭ 3400 rasijskich rubloŭ (kala 33 jeŭra), to, kab jaje pierapradać, treba było b čakać 12 miesiacaŭ z momantu afarmleńnia, abo ŭsio adno płacić kamiercyjny ŭtylzbor pamieram 5350 jeŭra.
Takim čynam, z ulikam dyskontu ad biełaruskaj mytni ŭ vyhladzie 140-ha ŭkaza pryhon darahich aŭto va ŭzroście da troch hadoŭ praź Biełaruś zastajecca davoli aktualnym — niahledziačy na sankcyi i kamiercyjny ŭtylzbor.
Jašče adzin prykład — BMW Ch5 2022 hoda vypusku amal za 100 tysiač dalaraŭ. Mašyna ŭ Biełarusi z 9 kastryčnika 2024 hoda.
Praz bolš vysoki košt jaje razmytnioŭka pa lhocie abyšłasia pryblizna ŭ 13-15 tysiač jeŭra zamiest 26-30 tysiač jeŭra poŭnych pošlin u Rasii.
Praŭda, u vypadku z reekspartam u Rasiju ŭtylzbor budzie dla rasijskich pakupnikoŭ bolšym, čym u papiarednim prykładzie, pakolki pad kapotam tut užo nie dvuchlitrovy ruchavik, a trochlitrovy.
Utylzbor składaje kala 15 tysiač jeŭra, što blizka da sumy, jakuju možna sekanomić na mycie. Na pieršy pohlad, vyhada nie takaja vidavočnaja, jak z dvuchlitrovymi aŭto, bo mytnaje afarmleńnie ŭ Rasii plus lhotny ŭtylzbor (kala 33 jeŭra) u vyniku vychodziać u tuju ž sumu.
Ale tut važna razumieć, što razmytnieny ŭ Rasii aŭtamabil, za jaki zapłacili lhotny ŭtylzbor, pradavać možna budzie tolki praz 12 miesiacaŭ. Kali ŭłaśnik zachoča zrabić heta raniej, čym praz hod, to jamu śviecić dapłata ŭtylzboru ŭ sumie kala 15 tysiač jeŭra.
Pryhnali z Hiermanii 10 dzion tamu
Praciahvajuć pastupać u Biełaruś i bolš darahija aŭto. Tak, naprykład, u Minsku pradajuć Mercedes-Benz V-kłas za 150 tysiač dalaraŭ.
Heta całkam novy aŭtamabil, jaki litaralna dniami pryvieźli ŭ Biełaruś. Data mytnaj ačystki — 1 listapada 2024 hoda.
Z ulikam lhotnaj razmytnioŭki, ekanomija na mycie moža składać kala 20 tysiač jeŭra, što robić taki varyjant vielmi cikavym dla patencyjnych pakupnikoŭ z Rasii. Bo heta našmat bolš za 5350 jeŭra kamiercyjnaha ŭtylzboru.
Jak takija aŭto traplajuć u Biełaruś?
Paśla taho jak Jeŭrasajuz unifikavaŭ sankcyi dla Biełarusi i Rasii, padsankcyjnyja aŭto traplajuć da nas paŭdniovym šlacham praz Turcyju. Častka mašyn jedzie svaim chodam, inšyja (u pieršuju čarhu novyja) viazuć na aŭtavozach.
Minimalnyja staŭki na takuju dastaŭku składajuć 4500 jeŭra za aŭto, jakoje pieravozčyk honić svaim chodam z Varšavy. Heta značyć, što tolki dadatkovyja vydatki na łahistyku robiać mašynu daražejšaj minimum na 3500 jeŭra. Dastaŭka aŭtavozam abychodzicca minimum u 5500 jeŭra. Ale vydatki na łahistyku — nie adziny faktar, jaki pavyšaje košt aŭtamabila.
Z pačatkam vajny, jašče da ŭviadzieńnia sankcyj, daloka nie kožny pradaviec u Jeŭrasajuzie byŭ hatovy pradavać aŭto biełarusam. Isnavali niamieckija, polskija i litoŭskija firmy-prakładki, jakija pierapradavali takija aŭto ŭ Biełaruś, bo sankcyi hetaha nie zabaraniali.
Ciapier naturalna, što padsankcyjnyja mašyny na biełaruski pašpart nichto nie pradaść, bo ich lehalny ekspart napramuju niemahčymy.
Aŭtamabili, jakija praz składanyja šlachi traplajuć ź Jeŭropy ŭ Biełaruś, aficyjna vyjazdžajuć ź ES nibyta dla pakupnikoŭ z takich krain, jak Hruzija, Azierbajdžan, Armienija, Kazachstan. Heta vyklikaje dadatkovyja vydatki na afarmleńnie i raźlik.
Ludzi, jakija zajmajucca pryhonam aŭto, pryznajucca, što minimalnaja suma, na jakuju aŭtamabil stanovicca daražejšym, — heta kala 7000 jeŭra.
«U hetuju sumu ŭvachodziać vydatki na ŭznaharodu firmie-prakładcy i dastaŭka da Minska. Ale zvyčajna sumy bolšyja, bo kali niechta i pryhaniaje mašynu vialikim kruham, to heta niešta darahoje, a značyć, uznaharoda za vykup i pieraprodaž budzie vyšejšaja», — tłumačyć surazmoŭca.
Z-za hetaha patok mašyn ź Jeŭropy ŭ Biełaruś vielmi mocna skaraciŭsia. Pa słovach pierahonščyka, pierapłačvać takija hrošy maje sens tolki ŭ vypadku aŭto, jakoje kaštuje nie mienš za 50 tysiač jeŭra.
«Tamu ciapier u Biełaruś bolš nie jeduć raniej papularnyja Audi A4, A6, BMW 3-j i 5-j sieryi, bo tam minimum dvuchlitrovyja ruchaviki. Taksama bolš nie pryhaniajuć dvuchlitrovyja Passat, bo roźnica ŭ canie z takoj ža mašynaj z ruchavikom na 1,6 litra zanadta vialikaja. Z ruchavikom na 1,6 litra takoje aŭto spakojna dajedzie z Varšavy da Minska za 500 jeŭra, a z ruchavikom na 2 litry na ŭsie vydatki, uklučajučy dastaŭku, pojdzie tysiač 6-7 jeŭra. Naturalna, što za takija hrošy jany nikomu nie patrebnyja», — tłumačyć pierahonščyk.
Nakolki zaŭvažny efiekt ad sankcyj?
Toje, što sankcyi adčuvalna paŭpłyvali na biełaruski aŭtamabilny rynak, śviedčać danyja ad aficyjnych dyleraŭ. Prodažy novych aŭto ŭ apošnija miesiacy bjuć rekordy. Heta šmat u čym źviazana z tym, što z-za sankcyj možna biez dadatkovych vydatkaŭ pryhaniać ź Jeŭropy tolki aŭto z ruchavikom da 1,9 litra, što schilaje častku pakupnikoŭ da kupli novych mašyn, pieravažna kitajskich brendaŭ.
Adnak, jak pakazvaje praktyka, kali hrošy jość, to niama prablemy nabyć śviežapryhnanaje padsankcyjnaje aŭto (u tym liku novaje), jakoje moža kaštavać prykmietna bolš za $100 tysiač. Tamu mienavita samyja zabiaśpiečanyja aŭtamabilisty, jak ź Biełarusi, tak i z Rasii, biez šykoŭnych aŭto nie zastanucca, a voś pra śviežapryhnanyja Passat ci Audi z dvuchlitrovym dyzielem daviadziecca zabycca.
Piać byłych siłavikoŭ prasili svaich kaleh nie być zališnie žorstkimi. Ciapier im pahražajuć vielizarnyja terminy6
Kamientary