Prarasijskaja palityk na čale amierykanskaj raźviedki? Heta jak pahladzieć
Tułsi Habard — nieardynarnaja fihura ŭ amierykanskaj palitycy, jakaja nie ŭpisvajecca ŭ tradycyjnyja palityčnyja katehoryi, piša Michaś Česny.
Jak užo paviedamlałasia, abrany prezident ZŠA Donald Tramp naminavaŭ Tułsi Habard na pasadu dyrektara Nacyjanalnaj raźviedki (DNI) ZŠA. Tramp adznačyŭ, što Habard pryniasie ŭ raźviedvalnuju supolnaść «biasstrašny duch» i «budzie adstojvać kanstytucyjnyja pravy krainy, zabiaśpiečvajučy mir praź siłu».
Pryznačeńnie kiraŭnika DNI patrabuje jašče adabreńnia Sienata ZŠA. Pa acenkach Politico, damahčysia hetaha Trampu budzie niaprosta, ale historyja apošnich hadoŭ pakazvaje, što ŭ amierykanskaj palitycy niejmaviernaje niaredka stanovicca realnaściu.
Chto takaja Tułsi Habard i jak vyhladaje jaje palityčnaja bijahrafija?
U 21 hod stała deputatkaj. U 23 hady — vajskoŭcam i ŭdzielnicaj vajny ŭ Iraku.
Tułsi Habard pačała svaju palityčnuju karjeru ŭ pačatku 2000-ch, kali, majučy ŭsiaho 21 hod, stała samaj maładoj deputatkaj Pałaty pradstaŭnikoŭ štata Havai.
U 2003 hodzie jana dobraachvotna dałučyłasia da Nacyjanalnaj hvardyi Havajaŭ, a ŭ nastupnym hodzie adpraviłasia dobraachvotnicaj u Irak, dzie słužyła ŭ miedycynskim padraździaleńni.
U listapadzie 2016 hodzie Habard, budučy tady jašče palitykam Demakratyčnaj partyi, sustrełasia z abranym prezidentam Donaldam Trampam. Sustreča adbyłasia pa inicyjatyvie Trampa, jaki paličyŭ patrebnym abmierkavać pytańni baraćby z teraryzmam i situacyju ŭ Siryi.
Užo tady chadzili čutki, što jana moža zaniać važnuju pasadu va ŭradzie Trampa; u pryvatnaści, nazyvalisia pasady dziaržaŭnaha sakratara, ministra abarony abo pastajannaha pradstaŭnika ZŠA pry AAN.
U 2020 hodzie Tułsi Habard pierajšła ŭ rezierv armii ZŠA i atrymała zvańnie padpałkoŭnika, praciahvajučy svaju palityčnuju dziejnaść.
Nie ŭpisvajecca ŭ tradycyjnyja palityčnyja katehoryi
Habard — nieardynarnaja fihura ŭ amierykanskaj palitycy, jakaja nie ŭpisvajecca ŭ tradycyjnyja palityčnyja katehoryi.
Da 2022 hoda jana była ŭ Demakratyčnaj partyi i pry hetym pracavała palityčnaj ahladalnicaj na Fox News, televizii, jakaja ličycca bastyjonam kansiervatyŭnaha adhalinavańnia respublikancaŭ.
Była praciŭnicaj vajennaj interviencyi ŭ Iraku, ale dobraachvotna adpraviłasia ŭ Irak, dzie słužyła ŭ miedycynskim padraździaleńni armii ZŠA.
Kab było jašče cikaviej, jana stała pieršaj deputatkaj induisckaha vieravyznańnia ŭ Kanhresie. U 2013 hodzie ŭ chodzie cyrymonii pryniasieńnia deputackaj prysiahi jana prysiahała na «Bchahavad-hicie».
U čornych śpisach ukraincaŭ
Paśla ŭvarvańnia Rasii va Ukrainu ŭ lutym 2022 hoda Tułsi Habard zajaviła, što vajny možna było b paźbiehnuć, kali b administracyja Bajdena i NATA ŭličyli «zakonnuju zakłapočanaść Rasii» nakont mahčymaści ŭstupleńnia Ukrainy ŭ aljans.
Tamu ŭ lipieni 2022 hoda Habard była ŭklučana Ukrainskim centram supraćdziejańnia dezynfarmacyi ŭ «śpis amierykanskich palitykaŭ, navukoŭcaŭ i aktyvistaŭ, jakija prasoŭvajuć rasijskuju prapahandu».
Jana taksama apynułasia ŭ bazie sajta «Mirotvoriec». Voś jak jana i jaje dziejnaść apisany na hetym sajcie:
«Achviara psichałahičnaha hvałtu rasijska-terarystyčnaj prapahandy.
Pašyreńnie rasijskaj prapahandy.
Zamach na suvierenitet i terytaryjalnuju cełasnaść Ukrainy.
Udzieł u antyŭkrainskich prapahandysckich mierapryjemstvach Rasii (krainy-ahresara) suprać Ukrainy.
Udzieł u infarmacyjnych śpiecapieracyjach Rasii (krainy-ahresara i terarysta). Pašyreńnie niedakładnaj infarmacyi.
Mahčyma, źjaŭlajecca ahientam rasijskich śpiecsłužbaŭ.
Palityčny dziejač, eks-aficer reziervu armii ZŠA».
Habard — nie prarasijskaja, a skieptyčnaja da interviencyj ZŠA
Tułsi Habard — vieteran vajny ŭ Iraku i adnačasna paśladoŭnaja krytyk vajennaha ŭmiašalnictva ZŠA. Jana zdavion krytykuje ŭmiašańnie ZŠA ŭ zamiežnyja kanflikty, pieradusim pa pryčynie ich nieefiektyŭnaści ŭ płanie dasiahnieńnia pastaŭlenych metaŭ.
Pazicyja Habard pa rasijska-ŭkrainskim kanflikcie nie adroźnivajecca kardynalna ad pazicyi niabožčyka Hienry Kisindžera (były dziažsakratar ZŠA), jakuju jon zajmaŭ da 2022 hoda. Praktyčna praz uvieś pieryjad paśla padzieńnia Savieckaha Sajuza Kisindžer nastojvaŭ na pryznańni «intaresaŭ Rasii» va Uschodniaj Jeŭropie.
Jašče ŭ mai 2022 hoda Kisindžer zaklikaŭ da spynieńnia ahniu va Ukrainie i adnaŭleńnia linii raźmiežavańnia, jakaja isnavała da pačatku poŭnamaštabnaha ŭvarvańnia Rasii ŭ lutym taho hoda, dajučy zrazumieć nieabchodnaść niejkaha kampramisu z Rasijaj.
Adnak u studzieni 2023 hoda, a paźniej u vieraśni taho ž hoda pryznaŭ, što praciah ahresii z boku Rasii źmianiŭ jaho pohlady.
Ci pohlady Habard taksama źmieniacca? Pazicyja ŭ spravie nieefiektyŭnaści vajennych umiašańniaŭ — chutčej za ŭsio, nie. A voś pazicyja pa Ukrainie i Rasii pačnie ŭsurjoz farmavacca padčas znachodžańnia na pasadzie kiraŭnicy raźviedki, kali, viadoma budzie zaćvierdžanaja Sienatam.
Kamientary