U kancy kastryčnika ŭ lesie la vioski Klapčany Most Asipovickaha rajona kiroŭca traktara znajšoŭ na darozie cieły mužčyny i žančyny. Bryhada chutkaj dapamohi kanstatavała śmierć abaich.
Pamierłymi byli 70-hadovy žychar vioski i jaho 58-hadovaja sužycielka. Za dzień da hetaha jany adpravilisia ŭ susiedniuju viosku ŭ kramu pa pradukty, adnak dadomu nie viarnulisia. Znajšli ich ranicaj nastupnaha dnia, paviedamiŭ Dziaržaŭny kamitet sudovych ekśpiertyz.
Babrujskim mižrajonnym adździełam Dziaržaŭnaha kamiteta sudovych ekśpiertyz praviedzieny sudovyja miedycynskija ekśpiertyzy. Ustanoŭlena, što mužčyna i žančyna pamierli ad ahulnaha pieraachaładžeńnia arhanizmu ŭ vyniku nizkaj tempieratury. Pry praviadzieńni sudovaj miedycynskaj chimičnaj ekśpiertyzy ŭ kryvi žančyny znojdzieny etyłavy śpirt — 1,3 pramile, u mužčyny — u kancentracyi 2,7 pramile.
Taksama sudovyja ekśpierty nahadvajuć: ahulnaje pieraachaładžeńnie arhanizmu moža raźvicca navat pry tempieratury pavietra +4…+10 hradusaŭ, zredku — i vyšej, to-bok nie tolki maroznaj zimoj, ale i ŭ mižsiezońnie.
Pieraachaładžeńniu spryjajuć psichičnaja i fizičnaja stomlenaść, hoład, strata kryvi, chraničnyja zachvorvańni. Pavialičvajuć ryzyki pieraachaładžeńnia mocny viecier, pavyšanaja vilhotnaść, uvilhatnieńnie adzieńnia i abutku, sudakranańnie z chałodnymi pradmietami, trapleńnie ŭ chałodnaje vodnaje asiarodździe. Stan ałkaholnaha apjanieńnia taksama paharšaje situacyju.
Ciapier čytajuć
U Biełarusi źbirajucca pravodzić renavacyju pa šlachu Rasii — znosić chruščoŭki i pierasialać žycharoŭ41
Kamientary