Tramp pryznačyŭ pasłom u Francyi Čarlza Kušniera. Jaho maci arhanizavała znakamityja ŭcioki z hieta ŭ Navahrudku

Abrany prezident ZŠA Donald Tramp naminavaŭ na pasadu pasła ŭ Francyi Čarlza Kušniera. Heta baćka Džareda Kušniera — muža dački Trampa Ivanki.

Kamientujučy pryznačeńnie ŭ svajoj sacsietcy Truth Social, Tramp nazvaŭ Čarlza Kušniera «vybitnym biznes-lidaram, fiłantropam i pieramoŭščykam, jaki budzie ŭpeŭniena baranić intaresy ZŠA». Tramp taksama nahadaŭ, što jaho ziać, syn Čarlza Džared Kušnier paśpiachova pracavaŭ u jaho pieršaj prezidenckaj administracyi, piša CNN.

Čarlz Kušnier zajmajecca biznesam u śfiery nieruchomaści i žyllovaha budaŭnictva. Jon atrymaŭ u spadčynu ad baćki partfiel z 4000 kvater i pabudavaŭ biznes-impieryju, staŭšy miljarderam. Akramia taho, da 2016 hoda jon byŭ donaram Demakratyčnaj partyi, a taksama miecenatam i fiłantropam.

Siamja Kušniera ciesna źviazana ź Biełaruśsiu. Jaho baćki rodam z Navahrudka. Maci Čarlza Raja była dačkoj zamožnaha kušniara Ziejdala, u siamji było dźvie kramy. U 1941-m siamju Kušnier, jak i 24 tysiačy jaŭrejaŭ z navakolnych haradoŭ, nacysty adpravili ŭ hieta, jakoje raźmiaściłasia niedaloka ad Navahrudskaha zamka. Pry hetym maci 16-hadovaj Rai Chindu i starejšuju siastru Ester rasstralali.

Pieražyŭšy piać adboraŭ na masavyja rasstreły, Raja z bratam Choniaj i inšymi viaźniami hieta vyrašyli arhanizavać ucioki. Jany stali kapać tunel pad aharodžaj. Spačatku vykarystoŭvali ruki i łyžki, zatym prydumali chitryja instrumienty, jakija palehčyli pracu. Siarod viaźniaŭ znajšlisia elektryki, jakija zmahli pravieści ŭ tunel śviatło, a ziamlu chavali ŭ padvojnych ścienach.

Tunel vyryli za čatyry miesiacy, 26 vieraśnia 1943 hoda adbylisia ŭcioki — samyja masavyja z kancłahieraŭ i hieta za ŭsiu vajnu. Praz tunel źbiehli 360 čałaviek, vyžyć udałosia nie ŭsim. Acalełyja, siarod ich była i Raja Kušnier, dałučylisia da jaŭrejskaha partyzanskaha atrada bratoŭ Bielskich. Tam Raja paznajomiłasia z budučym mužam Jozefam Bierkavicam, jaki taksama byŭ rodam z Navahrudka. Jany pažanilisia paśla vajny ŭ Budapiešcie, pry hetym Jozef uziaŭ proźvišča žonki, a nieŭzabavie emihravali ŭ ZŠA.

Pavialičyć

U 2019 hodzie ŭ Navahrudku adkryli miemaryjalnuju ścianu ŭ pamiać pra ŭcioki, jaje budaŭnictva prafinansavała siamja Kušnier. Jość u horadzie i muziej habrejskaha supracivu, častka ekspanataŭ taksama była pieradadziena siamjoj Čarlza.

Jaho syn Džared u 2009 hodzie ažaniŭsia ź Ivankaj Tramp — dačkoj budučaha prezidenta ZŠA. U pieršy termin Trampa jon pracavaŭ starejšym daradcam u administracyi i, jak ličycca, mieŭ surjozny ŭpłyŭ u farmiravańni jak źniešniaj, tak i ŭnutranaj palityki. Niadaŭna Džared Kušnier zajaviŭ, što nie budzie pracavać u novaj administracyi cieścia. Ciapier pasadu ad prezidenta atrymaŭ jaho baćka Čarlz.

U ZŠA ŭ Kušniera-starejšaha sapsavanaja reputacyja. U 2004-2005 hadach Čarlza sudzili za niezakonnyja ŭnioski ŭ vybarčuju kampaniju demakrataŭ i cisk na śviedak. Spačatku biznesoŭca aštrafavali na 508 tysiač dalaraŭ, a zatym pryznačyli dva hady turmy. Jak ustanaviła śledstva, Kušnier zładziŭ cełuju zmovu suprać muža svajoj siastry Uiljama Šułdera, jaki davaŭ pakazańni ŭ prakuratury suprać Kušniera.

Kab akazać na jaho cisk, Čarlz naniaŭ prastytutku, jakaja pavinna była spakusić Šułdera ŭ numary matela, dzie była ŭstalavanaja prychavanaja kamiera. Videa Kušnier adpraviŭ svajoj siastry. Fiederalny prakuror Krys Kryści, jaki vioŭ hetuju spravu, nazvaŭ heta «adnym z samych ahidnych i brydkich złačynstvaŭ», ź jakim jamu davodziłasia pracavać.

Kušnier u vyniku byŭ pazbaŭleny advakackaj licenzii i pravioŭ 14 miesiacaŭ u fiederalnaj turmie i vyjšaŭ na volu ŭ 2006-m. U 2020 hodzie, užo paśla parazy na vybarach, Tramp pamiłavaŭ Kušniera, pavodle aficyjnaj viersii, za zasłuhi ŭ dabračynnaści.

• 0
• 0
• 5
• 8
• 0
• 1
• 0
• 0