«Byccam haračyja prasy pastavili na vočy». Biełaruskaja viadučaja ščyra raskazała, na što pajšła dziela pryhažości

Hanna Halota kaža, što pra peŭnuju karekcyju źniešnaści dumała davoli praciahły čas.

— Reč u tym, što za paŭhoda ja schudnieła na 14 kiłahramaŭ (spačatku na dziesiać kiłahramaŭ za try miesiacy, potym na čatyry jašče za try miesiacy). Raniej tvar vyhladaŭ poŭnym, ale heta było harmanična. Paśla adčuvalnaj straty vahi, tvar «papłyŭ» — treba było niešta rabić. A tut ja pabačyła rekłamu ŭkrainskich dziaŭčat-kaśmietołahaŭ, jakija raz na miesiac na niekalki dzion pryjazdžajuć u Polšču i robiać roznyja bjuci pracedury.

Hanna pahladzieła, jakija pasłuhi prapanoŭvajuć, i vyrašyła, što heta joj padychodzić. Jana chacieła skarektavać padbarodak, zrabić niešta z abvisłaj skuraj i vydalić tłušč, jaki niedzie zastaŭsia.

— A jašče ŭ mianie vielmi stomleny pozirk — jak u čałavieka, jaki pracuje biez vychodnych i mała śpić. Tamu ja chacieła taksama «aśviažyć» vočy. Ja dasłała kaśmietałahiniam videa i raspaviała, jaki vynik mnie patrebny — jany raspaviali, jakija pracedury dla hetaha treba zrabić.

U vyniku Hańnie zrabili liparedukcyju — heta pracedura, padčas jakoj vydalajecca zališniaja tłuščavaja tkanka ŭ vobłaści padbarodka i šyi (dazvalaje palepšyć kontury tvaru).

— Mnie ŭkałoli ŭ padbarodak niejkija leki, i ŭ vyniku ŭvieś tłušč sabraŭsia pa centry — atrymałasia takaja burbałka, jakuju potym prabili i adpampavali tłušč.

Paśla na hałavu nakłali paviazku, jakuju praź niekalki dzion paśla manipulacyi možna było zdymać maksimum na 15 chvilin.

— Na hetuju manipulacyju mnie abiacali pažyćciovuju harantyju, bo tłuščavyja kletki nie adnaŭlajucca.

Pavialičyć

Taksama Hańnie vyraŭnoŭvali kontury padbarodka filerami. Efiekt ad hetaj pracedury raźličany maksimum na niekalki hadoŭ, bo filery z časam rassmoktvajucca. Dziaŭčyna kaža, što sama pracedura asablivaha dyskamfortu nie dastaŭlaje.

— Dyskamfort pačaŭsia paźniej, bo ciapier ja amal nie mahu spać. Kali staju, bolš-mienš narmalna siabie adčuvaju, a kali kładusia, šyja pačynaje baleć. Jeści taksama składana.

Kab amaładzić pohlad, kałoli botaks i rabili płazmaliftynh vobłaści vakoł vačej.

— Skažu ščyra: ja nie huhliła, što heta za pracedura. Dumała, što buduć niejkija nievialikija ŭkoły typu jak hijałuronkaj. Ale kali pabačyła, što atrymałasia, prosta ašaleła — vyhladała davoli žudasna. Pa adčuvańniach heta byccam by nievialikaj ihołkaj prypiakajuć skuru. Vielmi baluča! Ja płakała, kali mnie rabili tuju praceduru.

Ciapier adčuvajecca, byccam u mianie mocnyja apioki vakoł vačej. Kazali, što budzie padobna na soniečnyja apioki. Ale nie, padobna, byccam mnie haračyja prasy pastavili na vočy. Pakul dumaju, što takuju manipulacyju nikoli bolš nie ryzyknu paŭtaryć. Tym bolš nie vieru, što vynik budzie fantastyčny.

Paśla takich pracedur važna dobra dahladać skuru, bo kali lenavacca i nie rabić usio, što treba, mohuć źjavicca pihmientnyja plamy.

— Pakul paprasiła kalehu, kab jana padmianiła mianie ŭ bližejšym vypusku. Ale praz dva tydni spadziajusia viarnucca ŭ kadr — kaniešnie, hrymiravacca pryjdziecca dobra.

Kančatkovy vynik bjuci manipulacyj budzie bačny praz šeść miesiacaŭ.

Taksama Hanna kałoła ŭ žyvot lipa-fajer, jaki rasščaplaje tłušč.

— Na nastupny dzień paśla manipulacyi pračnułasia i pabačyła na vahach minus kiłahram. Ja ciapier kantraluju vahu, bo ŭ mianie jość insulinarezistentnaść. Kali ź joj nie zmahacca, dyk heta atrymlivajecca i nievierahodnaja stomlenaść uvieś čas, i drymotnaść. A praz chvarobu ŭ mianie «insulinavy» žyvot, i pazbavicca ad jaho samastojna vielmi składana.

Skinuć šmat z dapamohaj lipa-fajera nie atrymajecca — abiacajuć maksimum minus 5 santymietraŭ u vobłaści žyvata.

 Za ŭsie bjuci pracedury Hanna zapłaciła 2550 dalaraŭ.

• 4
• 0
• 8
• 17
• 7
• 3
• 0
• 0