«Jašče 10 čałaviek pajechali». Jak kašmaryli Hrodna padčas apošniaj abłavy
Apošnija miesiacy masavyja abłavy zakranajuć roznyja kutki Biełarusi. «Našaj Nivie» stała viadoma, jak heta prachodziła ŭ adnym z abłasnych centraŭ.
Vobšukami zajmaŭsia KDB
Pačynajučy z druhoj pałovy kastryčnika ŭ Hrodnie adbyvałasia chvala zatrymańniaŭ i pieratrusaŭ. Viadoma pra vypadki, kali paśla zatrymańnia ludziam była patrebna miedycynskaja dapamoha.
Uvaha siłavikoŭ była nakiravanaja jak na ludziej, jakija pracavali ŭ ŚMI, tak i na zvyčajnych haradžan, jakija paśpieli zaśviacicca ŭ 2020-2021 hadach.
Naprykancy kastryčnika zatrymali ŭładalnika hrodzienskaha haradskoha partała S13.ru Siarhieja Čaboćku. Jamu ŭžo trojčy prysudzili pa 15 sutak administracyjnaha aryštu.
Aproč Siarhieja Čaboćki, praz zatrymańnie prachodziŭ jašče adzin čałaviek, jaki raniej mieŭ dačynieńnie da sajta S13.ru. Adnak, u adroźnieńnie ad ułaśnika partała, hety čałaviek ciapier na svabodzie.
Taksama prajšli pieratrusy ŭ tych, chto raniej pryciahvaŭsia za ŭdzieł u akcyjach pratestu i dahetul žyvie ŭ Biełarusi.
Pa infarmacyi «Našaj Nivy», vobšukami zajmaŭsia KDB. Da ludziej prychodzili nibyta tamu, što jany źjaŭlajucca śviedkami pa spravach ab zachopie ŭłady i zdradzie dziaržavie.
Niełajalnych vyciskajuć z krainy
Ludzi, znajomyja ź situacyjaj, ličać, što siłaviki naŭmysna stvarajuć nievynosnyja ŭmovy žyćcia dla tych, u kim bačać pahrozu, kab čałaviek źjechaŭ z krainy. Pryčym niavažna, prajaŭlaje choć niejkuju aktyŭnaść taki čałaviek apošnim časam ci hadami siadzić moŭčki.
«Peŭny cisk pa fakcie nie spyniaŭsia, da takich ludziej była pavyšanaja ŭvaha, čas ad času byli «akcyi», kali ludziej z peŭnaha śpisu pryciahvali da administracyjnaj adkaznaści za raspaŭsiud «ekstremisckich materyjałaŭ». Taksama im pastajanna stvarali pieraškody ŭ pracaŭładkavańni i viadzieńni biznesu.
Ale vyhladaje, što pierad «vybarami» jany vyrašyli maksimalna začyścić prastoru, bo represii ŭzmacnilisia.
Paśla administracyjnych aryštaŭ i vizitaŭ KDB mnohija byli vymušanyja ŭ terminovym paradku źjechać ź Biełarusi, bo navisła realnaja pahroza apynucca ŭ turmie», — kaža surazmoŭca.
Pa słovach krynicy, tolki za apošnija dva tydni paśla čarhovaj chvali represij z Hrodna vymušanyja byli źjechać minimum 10 čałaviek.
«Maštaby represij novaj chvali žachlivyja, ale praz toje, što ŭsie vielmi zapužanyja, infarmacyja amal nie dachodzić da žurnalistaŭ i pravaabaroncaŭ. Navat kali čałaviek užo vyjechaŭ za miažu i znachodzicca ŭ biaśpiecy, jon nie zaŭždy publičyć, što ź im adbyvałasia i što jon užo źjechaŭ», — tłumačyć surazmoŭca.
Siarod inšaha nabiraje papularnaść praktyka, kali siemji staviać na ŭlik jak tyja, što znachodziacca ŭ sacyjalna niebiaśpiečnym stanoviščy.
«U ŚMI niadaŭna była infarmacyja pra toje, što minimum dźvie siamji hrodziencaŭ pastavili na ŭlik. Heta taksama tolki viaršynia ajśbierhu, bo ja viedaju jak minimum pra 8 takich vypadkaŭ», — kaža surazmoŭca.
Nie zabyli i pra tych, chto siadzić cicha
KDB padčas hutarki cikaviŭsia navat tymi, chto daŭno źjechaŭ ź Biełarusi i ŭ emihracyi siadzić cicha.
«Jany tam ni pra kaho nie zabylisia. Heta toje, što treba razumieć tym, chto moža pačać dumać, što kali pa adrasie ich nichto nie šukaje, to nikomu jany nie patrebnyja», — śćviardžaje infarmavany haradžanin.
Ciapier čyścinia padpisak u sacsietkach vyjšła na novy ŭzrovień, bo kali padpiska na «ekstremisckija» akaŭnty — heta harantavanaja administratyŭka, to najaŭnaść niadobranadziejnych siabroŭ u padpiskach — jak minimum dadatkovyja pytańni.
«Jość ludzi, jakija byli aktyŭnyja ŭ svoj čas, ale čyje akaŭnty nie pryznanyja ekstremisckimi. Da takich padpisak taksama ŭźnikali pytańni», — raskazała adna z krynic.
Akaŭnt Kabančuka ŭzłamali — ale ci biełaruskija śpiecsłužby?8
Kamientary