«Яшчэ 10 чалавек паехалі». Як кашмарылі Гродна падчас апошняй аблавы
Апошнія месяцы масавыя аблавы закранаюць розныя куткі Беларусі. «Нашай Ніве» стала вядома, як гэта праходзіла ў адным з абласных цэнтраў.
Вобшукамі займаўся КДБ
Пачынаючы з другой паловы кастрычніка ў Гродне адбывалася хваля затрыманняў і ператрусаў. Вядома пра выпадкі, калі пасля затрымання людзям была патрэбна медыцынская дапамога.
Увага сілавікоў была накіраваная як на людзей, якія працавалі ў СМІ, так і на звычайных гараджан, якія паспелі засвяціцца ў 2020-2021 гадах.
Напрыканцы кастрычніка затрымалі ўладальніка гродзенскага гарадскога партала S13.ru Сяргея Чабоцьку. Яму ўжо тройчы прысудзілі па 15 сутак адміністрацыйнага арышту.
Апроч Сяргея Чабоцькі, праз затрыманне праходзіў яшчэ адзін чалавек, які раней меў дачыненне да сайта S13.ru. Аднак, у адрозненне ад уласніка партала, гэты чалавек цяпер на свабодзе.
Таксама прайшлі ператрусы ў тых, хто раней прыцягваўся за ўдзел у акцыях пратэсту і дагэтуль жыве ў Беларусі.
Па інфармацыі «Нашай Нівы», вобшукамі займаўся КДБ. Да людзей прыходзілі нібыта таму, што яны з'яўляюцца сведкамі па справах аб захопе ўлады і здрадзе дзяржаве.
Нелаяльных выціскаюць з краіны
Людзі, знаёмыя з сітуацыяй, лічаць, што сілавікі наўмысна ствараюць невыносныя ўмовы жыцця для тых, у кім бачаць пагрозу, каб чалавек з'ехаў з краіны. Прычым няважна, праяўляе хоць нейкую актыўнасць такі чалавек апошнім часам ці гадамі сядзіць моўчкі.
«Пэўны ціск па факце не спыняўся, да такіх людзей была павышаная ўвага, час ад часу былі «акцыі», калі людзей з пэўнага спісу прыцягвалі да адміністрацыйнай адказнасці за распаўсюд «экстрэмісцкіх матэрыялаў». Таксама ім пастаянна стваралі перашкоды ў працаўладкаванні і вядзенні бізнэсу.
Але выглядае, што перад «выбарамі» яны вырашылі максімальна зачысціць прастору, бо рэпрэсіі ўзмацніліся.
Пасля адміністрацыйных арыштаў і візітаў КДБ многія былі вымушаныя ў тэрміновым парадку з'ехаць з Беларусі, бо навісла рэальная пагроза апынуцца ў турме», — кажа суразмоўца.
Па словах крыніцы, толькі за апошнія два тыдні пасля чарговай хвалі рэпрэсій з Гродна вымушаныя былі з'ехаць мінімум 10 чалавек.
«Маштабы рэпрэсій новай хвалі жахлівыя, але праз тое, што ўсе вельмі запужаныя, інфармацыя амаль не даходзіць да журналістаў і праваабаронцаў. Нават калі чалавек ужо выехаў за мяжу і знаходзіцца ў бяспецы, ён не заўжды публічыць, што з ім адбывалася і што ён ужо з'ехаў», — тлумачыць суразмоўца.
Сярод іншага набірае папулярнасць практыка, калі сем'і ставяць на ўлік як тыя, што знаходзяцца ў сацыяльна небяспечным становішчы.
«У СМІ нядаўна была інфармацыя пра тое, што мінімум дзве сям'і гродзенцаў паставілі на ўлік. Гэта таксама толькі вяршыня айсбергу, бо я ведаю як мінімум пра 8 такіх выпадкаў», — кажа суразмоўца.
Не забылі і пра тых, хто сядзіць ціха
КДБ падчас гутаркі цікавіўся нават тымі, хто даўно з'ехаў з Беларусі і ў эміграцыі сядзіць ціха.
«Яны там ні пра каго не забыліся. Гэта тое, што трэба разумець тым, хто можа пачаць думаць, што калі па адрасе іх ніхто не шукае, то нікому яны не патрэбныя», — сцвярджае інфармаваны гараджанін.
Цяпер чысціня падпісак у сацсетках выйшла на новы ўзровень, бо калі падпіска на «экстрэмісцкія» акаўнты — гэта гарантаваная адміністратыўка, то наяўнасць нядобранадзейных сяброў у падпісках — як мінімум дадатковыя пытанні.
«Ёсць людзі, якія былі актыўныя ў свой час, але чые акаўнты не прызнаныя экстрэмісцкімі. Да такіх падпісак таксама ўзнікалі пытанні», — расказала адна з крыніц.
Акаўнт Кабанчука ўзламалі — але ці беларускія спецслужбы?7
Каментары