Minsielhascharč nazvaŭ krynicy naviny pra kišečnuju pałačku ŭ syry destruktyŭnymi. Ale pra heta pisaŭ Raśsielhasnahlad
Ministerstva sielskaj haspadarki i charčavańnia vyrašyła zastupicca za biełaruski syr ad «Małočnaha śvietu».
Minsielhascharč abvierh infarmacyju, što ŭ biełaruskim syry ad «Małočnaha śvietu» znajšli kišečnuju pałačku.
Dniami jak rasijskija, tak i biełaruskija ŚMI napisali pra toje, što Raśsielhasnahlad vyjaviŭ u syry Ščučynskaha filijała «Małočnaha śvietu» bakteryi hrupy kišečnaj pałački. Spasyłalisia ŭsie na aficyjny list Raśsielhasnahladu, jaki dastupny na sajcie rasijskaha dziaržorhana i ciapier.
«Małočny śviet» 11 śniežnia zajaviŭ, što heta niapraŭda. Pradpryjemstva navat pahražała sudom dla abarony dziełavoj reputacyi. 12 śniežnia da temy padklučyłasia i biełaruskaje Ministerstva. U paviedamleńni ŭ telehram-kanała Minsielhascharča krynicy, jakija raspaŭsiudžvali aficyjnuju infarmacyju Raśsielhasnahladu pra kišečnuju pałačku ŭ syry, nazvanyja «destruktyŭnymi».
«U niekatorych destruktyŭnych krynicach źjaviłasia infarmacyja pra najaŭnaść kišečnaj pałački ŭ syry vytvorčaści AAT «Małočny śviet».
Ajčynny brend aficyjna zajaŭlaje, a Ministerstva sielskaj haspadarki i charčavańnia Biełarusi paćviardžaje, što hetaja infarmacyja nie adpaviadaje rečaisnaści i źjaŭlajecca nie bolš, čym fejkavym ukidam. Sprobu dyskredytavać jakasnuju biełaruskuju pradukcyju možna ličyć pravalenaj», — zajavili ŭ biełaruskim ministerstvie.
U viedamstvie zajavili, što pradukcyja prachodzić strohi kantrol jakaści.
Kamientary