Što viadoma pra stan biełaruski, jakaja zvaliłasia z čaćviortaha paviercha na Pchukiecie
Niaščasny vypadak ź biełaruskaj turystkaj adbyŭsia na vostravie Pchukiet u kancy listapada. 23-hadovaja Kaciaryna zhubiła kluč ad numara ŭ hateli i pasprabavała zabracca ŭnutr pa pažarnaj leśvicy. Spatyknuŭšysia, dziaŭčyna ŭpała na asfalt z čaćviortaha paviercha.
Kaciarynu dastavili ŭ balnicu ŭ prytomnaści, ale stan jaje byŭ vielmi ciažkim. «Takaja durnaja pamyłka pryviała da vielmi surjoznych traŭmaŭ, pierałamana litaralna ŭsio (akramia hałavy): ruki, nohi, chrybietnik, rebry, jakija pratknuli lohkija, razarvanaja piečań…» — pisała aŭtar dopisu sa zboram srodkaŭ na dapamohu biełaruscy, arhanizavanym u supolnaści «Pchukiet, Ruski kłub» u Facebook.
Pieršapačatkova zbor byŭ zapuščany ŭ dabračynnaj hrupie «Pataja ad A da Ja», jakaja ŭžo niekalki hadoŭ dapamahaje ruskamoŭnym žycharam i turystam u Tajłandzie. Da jaho padklučylisia i znajomyja Kaciaryny, i vypadkovyja ludzi: tak, amal $3000 pieraličyŭ mužčyna, jaki niekalki hadoŭ tamu sam trapiŭ u padobnuju situacyju.
U vyniku siłami nieabyjakavych udałosia sabrać, zdavałasia b, niepadjomnuju sumu: tajski špital vystaviŭ ahulny rachunak na 362 700 bat ($10 500), kala $15 000 patrabavałasia na transparciroŭku dziaŭčyny ŭ Biełaruś (ceńnik uklučaŭ u siabie vykup šaści miescaŭ u samalocie, reanimabil i apłatu palotu supravadžajučym daktaram u abodva baki).
Transparciroŭka niejki čas była pad pahrozaj zryvu: Kaciarynu admaŭlalisia brać na bort z kisłarodnymi bałonami. Tajskija miedyki to davali, to znoŭ adklikali dazvoł. Ale za niekalki dzion da mierkavanaj adpraŭki biełaruska cudam zadychała sama i pieralot prajšoŭ paśpiachova. 10 śniežnia paciarpiełaja pry sadziejničańni biełaruskich, tajskich i vjetnamskich dypłamataŭ była dastaŭlena ŭ Biełaruś.
Onlíner źviazaŭsia z rodnymi Kaciaryny, kab daviedacca pra jaje biahučy stan. Voś što raspaviała Halina, mama dziaŭčyny:
— Spravy ŭ Kaci iduć dobra, ciapier jana ŭ chirurhičnym adździaleńni ŭ Baraŭlanach. Prajšli abśledavańni traŭmiravanych unutranych orhanaŭ, pa plačy, pazvanočniku. Jašče majucca być nieabchodnyja apieracyi. Dakładna viadoma, što ź lohkimi ŭsio ŭ paradku — Kacia ŭžo ŭ samalocie biez prablem lacieła z Pchukieta da Maskvy. Ź joj była vielmi dobraja kamanda maskoŭskich miedykaŭ, jany ž paśla pryziamleńnia supravadžali i da Biełarusi.
Ja ŭsim vielmi ŭdziačnaja za akazanuju dapamohu: ahulnymi namahańniami vyratavali nie tolki maju dačku, ale i, moža, na jaje prykładzie inšych taksama.
Kamientary