Jeŭrapiejskija krainy raskryli sietku, jakaja viarbuje padletkaŭ-kileraŭ
Jaje kiraŭnik chavajecca ŭ Iranie.
U adnym z pryharadaŭ Stakholma ź ciemry zimovaj nočy vyjšaŭ mužčyna, apranuty ŭ čornaje. U jaho byŭ pistalet. Jon padyšoŭ da 20‑hadovaha Murada Abdelkadera, studenta, jaki viartaŭsia dadomu paśla rabočaj źmieny ŭ «Makdonaldsie», piša Bi-bi-si.
Uzbrojeny čałaviek pačaŭ stralać i praciahvaŭ vypuskać u Abdelkadera adnu kulu za druhoj, padychodziačy ŭsio bližej. Apošniuju kulu jon vypuściŭ u hałavu, kali Murad užo lažaŭ na ziamli.
Zabojcam akazaŭsia 18‑hadovy padletak Aciła Azimaŭ. I ŭ lutym 2025 hoda jon zabiŭ nie taho čałavieka.
Azimaŭ, jaki atrymaŭ za hety napad pažyćciovaje pakarańnie, staŭ kileram za hrošy — jaho naniała sietka pad nazvaj «Fakstrot», arhanizavanaja złačynnaja hrupoŭka, źviazanaja ź iranskimi ŭładami. Pošuk starońnich vykanaŭcaŭ dla zakaznych zabojstvaŭ — jaje śpiecyjalizacyja.
Miarkujecca, što z 2022 hoda «Fakstrot» zamoviŭ kala 35 zabojstvaŭ, a taksama ździejśniŭ napady — paśpiachovyja abo niaŭdałyja — na jeŭrapiejskija abjekty, źviazanyja ź Izrailem. U dvuch vypadkach vykarystoŭvalisia vybuchovyja rečyvy i hranaty.
Hrupoŭka najmaje dla takich napadaŭ padletkaŭ i abiacaje im najaŭnyja hrošy za vykanańnie zadańniaŭ. Płacić davodzicca redka, bo vykanaŭcaŭ zvyčajna zatrymlivaje palicyja.
Mienavita tak adbyłosia z narviežskim padletkam Jochanesam Natłandam, jakoha na hetym tydni prysiažnyja ŭ Ołd-Bejli (Centralnym kryminalnym sudzie ŭ Łondanie) pryznali vinavatym u zmovie z metaj zabojstva ŭ Zachodnim Jorkšyry, na poŭnačy Anhlii.
Apieratyŭnaja hrupa GRIMM — jeŭrapiejskaja supolnaść, stvoranaja dla baraćby z hetaj prablemaj, — śćviardžaje, što maładych kileraŭ znachodziać praz sacyjalnyja sietki, a zadańni vydajuć im u farmuloŭkach, padobnych da instrukcyj u kampjutarnych hulniach.
Pavodle słoŭ Endzi Kraaha z Centra pa baraćbie z surjoznaj i arhanizavanaj złačynnaściu pry Jeŭrapale, uraźlivyja maładyja ludzi stanoviacca «kilerami na aŭtsorsinhu».
Dyjamant Salichu, žurnalist-rasśledavalnik šviedskaha viaščalnika SVT, na praciahu troch hadoŭ vyvučaŭ dziejnaść hrupoŭki «Fakstrot» i jaje suviazi ź Iranam.
«Iranski režym addaje lidaru «Fakstrotu» zahady pryciahvać jaho sietku da napadaŭ na svaich vorahaŭ, — tłumačyć jon. — Heta mohuć być dysidenty, žurnalisty, nastrojenyja suprać režymu, abo ludzi, źviazanyja ź Izrailem».
Hetaje supracoŭnictva pačałosia paśla kastryčnika 2023 hoda, kali Madžyd źjechaŭ z Turcyi ŭ Tehieran.
«Praciahvać svabodna žyć u Iranie jon moh tolki pry ŭmovie, što jaho ludzi buduć dapamahać režymu», — kaža Salichu.
U krasaviku 2025 hoda, praź miesiac paśla aryštu maładoha narviežca Natłanda, jakomu było ŭsiaho 18 hadoŭ, «Fakstrot» i sam Rava Madžyd trapili pad sankcyi ŭrada Vialikabrytanii.
Natłand prylacieŭ u Vialikabrytaniju śpiecyjalna dla taho, kab vykanać zadańnie «Fakstrotu» niedzie ŭ rajonie paŭnočnaha horada Chaderśfiłd.
Vypadak z Natłandam dobra pakazvaje mietady pošuku najomnych zabojcaŭ.
U junaka ź siamji dvuch žurnalistaŭ sa Stavanhiera ŭ Narviehii było davoli kamfortnaje dziacinstva, ale paśla zachapleńnia narkotykami jon pieražyŭ psichatyčny epizod, trapiŭ u reabilitacyjnuju kliniku, a zatym nienadoŭha — jašče i ŭ dziciačy dom.
Tam jon paznajomiŭsia ź inšym padletkam, viadomym u sietcy pad nikam UnknownHustler («Nieviadomy działok»).
«Nieviadomy działok» pierasłaŭ Natłandu anłajn-zapyt z pošukam čałavieka, hatovaha zabić za hrošy.
«Zabić u Anhlii, 270K», — havaryłasia ŭ abjavie. Košt byŭ ukazany ŭ narviežskich kronach (prykładna 28 tysiač dalaraŭ).
Adnak prapanovu Działok atrymaŭ ad jašče adnaho padletka ź mianuškaj Hienierał. Hienierału tady było ŭsiaho 16 hadoŭ, a ŭ dziciačym domie jon na toj momant užo žyŭ try hady.
U vyniku Hienierał pryciahnuŭ Natłanda da vykanańnia zadańnia.
Paźniej padletka źviali z členam «Fakstrotu» pad nikam Ahient 47 (vidavočnaja spasyłka na elitnaha kilera z kampjutarnaj hulni Hitman). Šviedskaja palicyja ličyć, što za hetym psieŭdanimam chavajecca Ali Šechad Achmied, adzin ź blizkich paplečnikaŭ lidara «Fakstrotu».
Ahient 47 kupiŭ Natłandu bilet u adzin bok da Mančestera i navat dapamoh razabracca z atrymańniem časovaha pašparta.
U mesendžary Signal jon pravodziŭ jaho praz usie etapy padrychtoŭki, a ŭ vyniku pieradaŭ čałavieku ź mianuškaj «1», jaki zajmaŭsia łahistykaj.
Zhodna ź instrukcyjami ŭ duchu kampjutarnych hulniaŭ, «1» zabiaśpiečyŭ narviežca kartaj i videazapisami, na jakich byŭ pakazany tajnik sa zbrojaj, schavany ŭ lesapasadcy niedaloka ad Chaderśfiłda. Na inšym videa było pakazana, jak znajści tajnik z uznaharodaj.
Kali Natłand zasialiŭsia ŭ haścinicu ŭ Chaderśfiłdzie razam sa zbrojaj, «Ahient 47» dasłaŭ jamu jašče adno paviedamleńnie: «Na zaŭtra ŭ nas šmat spraŭ».
Zaviaršyć hetyja «spravy» narviežski padletak nie paśpieŭ, bo byŭ aryštavany. Kaho mienavita jamu treba było zabić, jon tak i nie daviedaŭsia.
Adździeł pa baraćbie z teraryzmam sprabuje vyśvietlić, ci mieła zapłanavanaje zabojstva dačynieńnie da Irana.
Juny «Hienierał», jaki zavierbavaŭ Natłanda dla zabojstva, byŭ davoli aktyŭnym pasiarednikam.U Šviecyi dla vykanańnia śmiarotnych zakazaŭ jon naniaŭ Aciłu Azimava, jaki ciapier adbyvaje pažyćciovaje pakarańnie, a taksama jašče adnaho 17‑hadovaha junaka, jaki za try tydni da napadu Azimava zabiŭ mužčynu pa imieni Achmied Zamzam, jaki žyŭ u Łundzie na poŭdni Šviecyi.
Dva padletki-kilery nie atrymali apłaty, bo trapilisia palicyi.
Žurnalist Salichu kaža, što heta vielmi charakterna dla «Fakstrotu»: «Im usio roŭna, što padletkaŭ złoviać. Kali ich zatrymajuć, jany ŭžo nie zmohuć patrabavać abiacany hanarar. My nie viedajem nivodnaha vypadku, kali b hetym niepaŭnaletnim kileram zapłacili».
«Jany naŭmysna šukajuć usio maładziejšych padletkaŭ — tyja mienš dumajuć pra nastupstvy i bolš achvotna iduć na ryzyku», — kaža Salichu.
Hienierał u vyniku trapiŭsia paśla taho, jak pasprabavaŭ arhanizavać zabojstva 14‑hadovaha syna narviežskaha palicejskaha. Dla hetaha jon naniaŭ dvuch padletkaŭ — 15 i 17 hadoŭ.
15‑hadovy padletak u vyniku raskazaŭ pra ŭsio palicyi. Kali Hienierała aryštavali, u jahonym telefonie znajšli zhadki pra płanavany napad u brytanskim Chaderśfiłdzie. Tak byŭ zatrymany i Natłand.
U mai hetaha hoda Hienierał byŭ asudžany na 14 hadoŭ pazbaŭleńnia voli.
Za 15 miesiacaŭ z momantu stvareńnia apieratyŭnaj hrupy GRIMM užo jość peŭnyja vyniki. Było praviedziena bolš za 280 aryštaŭ, siarod zatrymanych apynulisia važnyja padazravanyja.
Adnym z najbolš značnych stała zatrymańnie Ali Šechada Achmieda — taho samaha «Ahienta 47». Jaho aryštavali ŭ kurdskim horadzie Sulejmanija ŭ Iraku. Šviecyja zapytała jaho ekstradycyju.
Stefan Chektar, namieśnik kiraŭnika Nacyjanalnaha palicejskaha kamisaryjata Šviecyi, zajaviŭ, što jaho viedamstva pastajanna pašyraje supracoŭnictva z palicyjaj inšych krain, kab pakazać členam złačynnych hrupovak: biaśpiečnaha miesca dla ich niama nidzie.
U mai ŭ Tunisie byŭ aryštavany Machamied Machdzidy, viadomy pad mianuškaj Moewgli, były repier, jakomu, pavodle mierkavańnia šviedskaj palicyi, u «Fakstrocie» naležyć daloka nie apošniaja rola.
Adnak Rava Madžyd pa-raniejšamu zastajecca pa-za dasiažnaściu — u Iranie.
«Jon usio jašče aktyŭny, — kaža žurnalist Salichu. — I pakul usia jaho sietka dziejničaje, bajusia, my budziem bačyć novyja napady na praciŭnikaŭ iranskaha režymu».
Nakolki mocna ŭdałosia ŭdaryć pa «Fakstrotu», pakul niezrazumieła.
Miž tym u ich užo źjavilisia kankurenty — sietka «Dalen» taksama šukaje ŭ internecie ludziej, hatovych zabivać za hrošy.
Toje, jak chutka hetyja mietady vyjšli za miežy Šviecyi ŭ inšyja krainy Skandynavii, a zatym i ŭ Vialikabrytaniju, pakazvaje, nakolki efiektyŭnym akazaŭsia taki sposab pošuku kileraŭ.
Biełaruska ŭładkavałasia ŭ kandytarskuju kramu. Ale vyśvietliłasia, što za naviedvańnie tualeta joj treba płacić1
Kamientary