Biełarus staŭ pieršym iluzijanistam, jaki pradstaviŭ Litvu na čempijanacie śvietu pa fokusach

«Iluzijanist — heta čałaviek, jaki stvaraje iluziju niemahčymaha, — razvažaje Hleb. — I što ŭ minułym, što ciapier heta zastajecca niaźmiennym. Ale kali raniej fokuśniki pakazvali fokusy z cylindrami i kijem, tamu što jany byli raspaŭsiudžanyja, to siońnia iluzijanist, naprykład, pakazvaje fokusy sa smartfonami. Śviet źmianiajecca, i mahija sapraŭdy hetak ža adaptujecca da hetych źmien. I naohuł, iluzijanist nie moža dazvolić sabie adstać ad času, — tamu što štukary zaŭsiody ledź-ledź napieradzie. I voś kali źjaviŭsia štučny intelekt paŭsiudna ŭ našym žyćci, adrazu ž źjavilisia truki sa štučnym intelektam. I zaraz u siabie na šou ja prymušaju ChatGPT čytać dumki maich hledačoŭ».

Mahija ŭ žyćci Hleba źjaviłasia vypadkova — prostyja fokusy ŭ kole siamji i na školnych pieramienach pieratvarylisia ŭ zachapleńnie, a zachapleńnie stała spravaj usiaho žyćcia.

«Ja pačaŭ zajmacca fokusami ŭ 13 hadoŭ, ale jak mienavita ja hetym zachapiŭsia, nichto ŭ siamji, u tym liku ja, dakładna nie pamiataje, — raspaviadaje Hleb. — Naohuł, jak luby padletak, ja zachaplaŭsia roznymi chobi — kikboksinham, parkuram, kataŭsia na skiejtach, hulaŭ u baskietboł. Zimoj zvyčajna cikavych zaniatkaŭ stanaviłasia niejak mienš. Ja pamiataju, što znajšoŭ knižku svajho brata z sakretami fokusaŭ, pasprabavaŭ niešta paŭtaryć, i ŭ mianie adrazu atrymałasia. I paśla hetaha staŭ hladzieć niejkija videa na YouTube.

I praz paru miesiacaŭ my z baćkami pajechali na maleńki konkurs u horadzie Hrodna. Ja tady ŭvohule nie ŭjaŭlaŭ, jak usio heta vyhladaje, ale zrabiŭ niejki nievialiki numar za paru dzion. I tady ja paznajomiŭsia ź litoŭskim iluzijanistam Nikałasam Kinam — heta viadomy fokuśnik z Kaŭnasa. Jon padyšoŭ da mianie i da maich baćkoŭ i skazaŭ, što ŭ mianie jość patencyjał, i parekamiendavaŭ nastojliva praciahvać zajmacca hetym. Jon tady mianie vielmi natchniŭ i navučyŭ kartačnym fokusam, jakija ja da hetaha času pakazvaju na kožnym svaim vystupie».

Z 14 hadoŭ Hleb pačaŭ udzielničać u mižnarodnych konkursach iluzijanistaŭ. Tady daviedaŭsia ab tym, što isnuje čempijanat śvietu pa fokusach — samaje prestyžnaje spabornictva iluzijanistaŭ u śviecie, jak Alimpijada ŭ spartsmienaŭ. 

Raz na try hady ŭ roznych krainach pravodziacca čempijanaty śvietu. U 14 hadoŭ Hleb pastaviŭ sabie metu paŭdzielničać tam.

«I mnie pašancavała ŭ 2018 hodzie pabyvać na čempijanacie śvietu ŭ Karei. I tady ja ŭbačyŭ suśvietny ŭzrovień fokusaŭ i zrazumieŭ, što mnie treba rabić i da čaho imknucca», — kaža jon.

Repietycyja fokusaŭ zajmaje šmat času. Na padrychtoŭku truka, jaki doŭžycca 15 siekund, Hleb moža patracić tydzień. A praca nad numaram, ź jakim iluzijanist pakaryŭ čempijanat śvietu, zaniała až try hady, pačynajučy ad samaj pieršaj kancepcyi da finalnaha vyniku.

«Trapić na čempijanat śvietu było niaprosta. Spačatku tabie treba stać čempijonam svajoj krainy, potym prajści kantynientalny adbor. Na kožnym kantyniencie jość svoj čempijanat: jość čempijanat Amieryki, čempijanat Akijanii, čempijanat Azii, čempijanat Jeŭropy, u jakim ja jakraz udzielničaŭ. Na hetym čempijanacie było adabrana 3 tysiačy najlepšych iluzijanistaŭ, i ź ich 110 vybrali dla ŭdziełu ŭ čempijanacie śvietu. I ja apynuŭsia siarod ich i staŭ pieršym iluzijanistam, jaki pradstaviŭ Litvu na čempijanacie śvietu pa fokusach.

Tam ja pakazvaŭ svoj aŭtarski numar, jon nazyvajecca «MAHIK» — pra chłopčyka, jaki patrapiŭ unutr złamanaj videahulni. Ja zrabiŭ hety numar pa svaim ułasnym apaviadańni i razam z bratam napisaŭ usiu muzyku da jaho. I ŭ vyniku na čempijanacie śvietu ja atrymaŭ pryz za samy aryhinalny numar, – im uznaharodžvajuć čałavieka, kamu ŭdałosia ździvić iluzijanistaŭ mienavita idejaj abo padychodam da mahii», — raspaviadaje małady čałaviek.

Pavialičyć

Žadańnie ŭvasobić svaje mary pryviali Hleba ź Minska ŭ Vilniu. I stupień bakałaŭra sacyjalnych navuk jon atrymaŭ u Jeŭrapiejskim humanitarnym univiersitecie.

«Vilniu ja vielmi lublu ź dziacinstva, tamu što tut vučyŭsia i žyŭ moj starejšy brat, — kaža Hleb. — I kali ja skončyŭ škołu, ja taksama pastupiŭ u Vilniu, i mnie było lohka, tamu što hety horad užo byŭ znajomy. Ja adrazu znajšoŭ siabroŭ. Nieŭzabavie pryjechała siamja, jakaja taksama lubić Vilniu, i mnie było vielmi kamfortna. Ja praciahvaŭ zajmacca fokusami aktyŭna, — jakraz rychtavaŭsia da čempijanatu Jeŭropy i śvietu. I zaraz ja žyvu na Užupisie, na susiedniaj vulicy z baćkami. I ŭ mianie tut šmat znajomych, šmat siabroŭ, jość lubimyja miescy, kaviaryńki. I kožny dzień ja ŭdziačny za toje, što mahu žyć u takoj kłasnaj atmaśfiery».

Pavialičyć

«Kali ŭ ciabie źjaŭlajecca dośvied, nahladnaść u fokusach, to ty pačynaješ dumać inakš, — kaža iluzijanist. — Raptam ty pačynaješ bačyć u prostych rečach niejkija patencyjnyja idei dla fokusaŭ. Vypracoŭvajecca niejki inšy sposab myśleńnia, jaki zasnavany na tym, što ty ŭžo viedaješ šmat mietadaŭ, — voś tak i stvarajuć svaje truki. Pavinna być matyvacyja stvaryć svoj ułasny truk. U pryncypie, žadańnie zrabić niešta novaje».

Pavialičyć

Maładyja iluzijanisty časta vyvučajuć pieršyja truki ź videa ŭ sacyjalnych sietkach, dzie možna znajści niejkija sakrety ŭ ahulnym dostupie. Ale sakrety surjoznych fokusaŭ možna daviedacca tolki naŭprost ad prafiesijnych iluzijanistaŭ. Dla hetaha pa ŭsim śviecie isnujuć Abjadnanyja kłuby čaraŭnikoŭ — heta ŭnikalnyja supolnaści, dzie iluzijanisty dzielacca vopytam, natchnieńniem i sakretami majsterstva. Niadaŭna Hleba pryniali ŭ Mahičny Kruh Niamieččyny.

«Heta samy staražytny kłub mahii ŭ Jeŭropie, i jon abjadnoŭvaje iluzijanistaŭ-prafiesijanałaŭ. Tudy nielha pastupić prosta tak. Kab ustupić u hety kłub, tabie treba abo zdać ekzamien składany, abo vyjhrać na čempijanacie Hiermanii pa fokusach, abo ŭstupić tudy za niejkija značnyja dasiahnieńni i ŭkład u mastactva mahii. Što ja i zrabiŭ paśla svajho ŭdziełu ŭ čempijanacie śvietu», — kaža małady čałaviek.

• 9
• 0
• 0
• 3
• 0
• 0
• 0
• 1