Sud vydaŭ ordar na aryšt prezidenta Paŭdniovaj Karei Jun Sok Jola

Akruhovy sud Sieuła vydaŭ ordar na aryšt adchilenaha ad ułady prezidenta Paŭdniovaj Karei Jun Sok Jola, jaki 3 śniežnia sprabavaŭ abviaścić u krainie vajennaje stanovišča, za što byŭ padvierhnuty impičmientu i abvinavačany ŭ miaciažy, piša Bi-bi-si.

Jun Sok Jol na praciahu apošnich dvuch tydniaŭ trojčy praihnaravaŭ vykliki na dopyt, i ŭ vyniku śledčyja ŭ niadzielu ŭviečary padali ŭ sud chadajnictva ab ordary na jaho aryšt. Advakat Juna nazyvaje hetaje chadajnictva niezakonnym.

Śledčyja pavinny aryštavać adchilenaha prezidenta da 6 studzienia; paśla zakančeńnia hetaha terminu im daviadziecca prasić sud ab pradaŭžeńni orara. Ci ŭdasca śledstvu aryštavać Juna, pakul nieviadoma: im mohuć pieraškodzić achova prezidenta i jaho prychilniki.

Achova raniej užo nie prapuściła śledčych u ofis prezidenta i jaho asabistuju rezidencyju, choć jany mieli order na vobšuk hetych pamiaškańniaŭ.

U historyi Paŭdniovaj Karei ŭžo byli vypadki, kali ŭłady admaŭlalisia ad sprob aryštavać viadomych palitykaŭ z-za taho, što aryštu fizična pieraškadžali ich atačeńnie i prychilniki. Advakaty Jun Sok Jola ŭ paniadziełak zajavili, što śledčyja nie majuć padstaŭ jaho aryštoŭvać, bo prezident zhodna z kanstytucyjaj maje prava abviaščać vajennaje stanovišča.

Sam Jun jašče ŭ pieršaj pałovie śniežnia adprečvaŭ abvinavačańni ŭ sprobie miaciažu i zajaviŭ, što ŭviadzieńnie vajennaha stanovišča było «palityčna vyvieranym rašeńniem», jakoje jon pryniaŭ dziela abarony dziaržavy ad apazicyi, jakaja paralizavała pracu ŭrada.

Dzie mienavita ciapier znachodzicca Jun Sok Jol, nieviadoma. Vyjazdžać z krainy jamu zabaranili.

Aficyjna jon zastajecca prezidentam. Jon adchileny ad vykanańnia prezidenckich abaviazkaŭ z 14 śniežnia, kali parłamient prahałasavaŭ za jaho impičmient, ale dla taho, kab źmiaścić jaho z pasady, impičmient pavinien zaćvierdzić Kanstytucyjny sud Paŭdniovaj Karei. Pry hetym zaraz u składzie Kanstytucyjnaha suda — usiaho šeść sudździaŭ z praduhledžanych zakonam dzieviaci. Sud moža pracavać i z šaściu sudździami ŭ składzie, ale ŭ takim vypadku, kab adnavić Juna na pasadzie, budzie dastatkova adnaho hołasu.

Parłamient, kab pavysić svaje šancy, prapanavaŭ premjer-ministru Chan Dok Su, jaki staŭ časovym vykanaŭcam abaviazkaŭ prezidenta, kandydatury troch adsutnych sudździaŭ, ale toj adchiliŭ ich.

Apazicyja ŭ parłamiencie ŭ adkaz abvinavaciła Chana ŭ tym, što jon dziejničaje ŭ intaresach Juna, i 27 śniežnia prahałasavała ŭžo za impičmient Chana. U vyniku vykanaŭcam abaviazkaŭ i prezidenta, i premjera staŭ pieršy namieśnik premjera, ministr ekanomiki i finansaŭ Čchvie San Mok. Ciapier apazicyja pahražaje impičmientam i jamu.

• 0
• 0
• 1
• 1
• 0
• 0
• 0
• 0