Niechta zarabiŭ tysiačy rubloŭ, a kahości ablili vadoj: biełarusy pakazvajuć, jak kaladavali
Jak sioleta kaladavali ŭ roznych kutkach Biełarusi? Ludzi dzielacca dośviedam u tyktoku. Jość navat sapraŭdnyja historyi pośpiechu!
Darečy, treba adznačyć, što kalavali biełarusy ŭ rozny čas — adny napiaredadni Rastva, inšyja — pierad starym Novym hodam.
Samaj paśpiachovaj možna nazvać historyju kaladavańnia ŭ Breście. Adna z błohierak pachvaliłasia, što jaje dzieci nakaladavali kala 5300 rubloŭ, a jašče piać pakietaŭ cukierak.
— Skazali: «U hetym miesiacy, mama, možaš nie pracavać», — śmiajecca žančyna.
Rolik nabraŭ 510 tysiač prahladaŭ i bolš za 11 tysiač łajkaŭ. Ale nie ŭsie kamientatary pavieryli žančynie, što takuju vialikuju sumu było realna sabrać.
«Tut chacia b 10 rubloŭ pasprabuj nakaladavać, jakija 5 tysiač?», — aburyŭsia adzin z kamientataraŭ. «Vy ŭ Dubai kaladavali, što stolki dali?» — pacikaviŭsia inšy.
Niechta vykazvaŭ pretenzii da jakaści padrychtoŭki kaladoŭščykaŭ: «Kali da mianie pryjšli dzieci i z telefona čytali vieršyk u dva słupki, dyk chaciełasia skazać: dzieci, idzicie pa damach, a jak vyvučycie, prychodźcie».
Bahatuju ŭznaharodu, jakuju prynieśli dadomu dzieci paśla kaladak, prademanstravała błohierka z Hancevičaŭ. Pobač ź nievierahodnaj kolkaściu cukierak i šakaładak lažać i hrošy: možna naličyć siem kupiur pa 100 rubloŭ, dźvie pa 20 i niekalki pa 5.
I taksama šmat chto ŭ kamientarach sumniavaŭsia, ci mahčyma heta. Ale ž byli i inšyja mierkavańni. «My z mužam tyja samyja ludzi, jakija davali čužym dzieciam pa 20 i 50 rubloŭ. Nam było nie škada, dzieci padrychtavalisia dobra», — adznačyła kamientatarka i dadała, što dla jaje heta mahčymaść zachavać tradycyju.
Inšaja tyktokierka z Hancevičaŭ pakazała, jak u jaje padjeździe padrychtavalisia ludzi, jakija paśpieli stamicca ad kaladoŭščykaŭ: na adny dźviery paviesili pakiet z cukierkami, na druhija prylapili niekalki kupiur pa 5 rubloŭ.
Hety rolik taksama zavirusiŭsia i za dzień nabraŭ kala 357 tysiač prahladaŭ i 9 tysiač łajkaŭ.
U kamientaryjach žančyna dadała, što ŭ horadzie było šmat kaladoŭščykaŭ — ažno čerhi byli ź dziaciej i darosłych. «U hetym hodzie małajcy, šmat dziaciej było, ažno serca radavałasia, bo letaś było sumnavata. Sioleta cukierak nie chapiła, biehała dakuplała, a ŭ minułym hodzie jany zastalisia. A kaściumy jakija byli, hrym — kłas!» — pahadziłasia ź joj kamientatarka.
Cudoŭnaje videa z maleńkimi kaladoŭščykami zrabiła tyktokierka z Homiela. Cikava nazirać, jak ź ciaham času źmianiajucca vobrazy dziaciej: naprykład, pobač z tradycyjnaj cyhankaj možna pabačyć i junaha Chałka ci Čałavieka-Pavuka.
Asabliva miła vyhladaje chłopčyk, jakomu telefanuje maci, a jon z usioj surjoznaściu adkazvaje: «Ja kaladuju!».
Rolik za dzień nabraŭ kala 230 tysiač prahladaŭ i 11,5 tysiačy łajkaŭ. Kamientatary ŭ zachapleńni: «Cudoŭnaje śviata. Nie treba jaho zabyvać, ja z dačkoj pakul chadziła, dyk ščoki stamilisia ŭśmichacca. Ludzi, darycie adzin adnamu ŭśmiešku! Heta ž tak prosta», «Za adzin viečar stolki pazityvu ad dziaciej, što navahodniaja noč prosta adpačyvaje», «Dzieci atrymlivajuć zadavalnieńnie nie stolki ad cukierak, kolki ad samoha pracesu. A tyja, chto adorvaje, jašče bolš».
Na inšym videa z Homiela kaladoŭščyki z entuzijazmam śpiavajuć pieśniu «Nie pradajecca chata baćkoŭ» hurta «Drazdy». Dziciačy zapał zabiaśpiečyŭ 300 tysiač prahladaŭ i bolš za 9 tysiač łajkaŭ. U kamientaryjach možna znajści śmiešnyja historyi:
«Chłopčyk skazaŭ: «Tut jašče i hrošy dajuć, a nie tolki cukierki. Dziakuj tabie, staraja žančyna, žyvi doŭha i ščaśliva». A mnie ŭsiaho 26!».
U Słucku kaladoŭščyki pryjšli z bajanam, a padpiavali pieśni Juryja Šatunova na telefonie. U kamientaryjach reśpiektujuć — i kaladoŭščykam, i ich repiertuaru.
U Davyd-Haradku aktyŭna kaladavali darosłyja. Jany padabrali bolš tradycyjnyja kaściumy, ale, kaniečnie, byli i ekzatyčnyja varyjanty nakštałt muškieciora.
U Pinsku kaladavali na Rastvo. Chłopcy, jakija trapili na videa, nie padrychtavali śviatočnyja kaściumy, zatoje dobra vyvučyli pieśniu pra śviata.
U Minsku taksama kaladavali. Tyktokierka Lizavieta Čechaŭskaja ź siabroŭkami dobra padrychtavałasia. Jana pryznałasia, što raniej nikoli nie kaladavała. Ale ekśpierymient atrymaŭsia ŭdały: «Usie byli rady. Chtości navat praślaziŭsia. Uspaminaŭ maładość i jak sam kaladavaŭ».
Błohierka, jakaja nazyvaje siabie «Toma ź vioski», pakazała videa, jakoje mahło b padacca sumnym. Razam s siabroŭkaj maładaja žančyna tančyć na hanku doma i čytaje kaladnyja vieršy. Dźviery rezka adčyniajucca i na Tamaru vylivajuć viadro vady. Mužčynski hołas za kadram kaža: «Pašli preč, paprašajki». Kaladoŭščycy pry hetym rahočuć.
Hetaje videa nabrała bolš za 2 miljony prahladaŭ i kala 143 tysiač łajkaŭ. U kamientaryjach šmat chto aburajecca pavodzinami mužčyny. Ale kali pahladzieć inšyja videa tyktokierki, dyk stanovicca zrazumieła, što zdymali virusny rolik na hanku doma samoj Tamary. A «zły mužčyna», jakoha nie bačna, chutčej za ŭsio, jaje ž muž.
Nie puścić u chatu kaladoŭnika — drennaja prykmieta. Jak i dziela čaho kaladavali biełarusy
«Za dva tydni čosu — zarobak midła». Prahramist 20 hadoŭ pracuje Dziedam Marozam
Biełarusy sabrali nieabchodnuju sumu hrošaj na kaladnyja padarunki dzieciam palitviaźniaŭ
Pryhožaja tradycyja ŭ Bierlinie praciahvajecca. Dziasiatki tysiač zaŭziataraŭ «Unijona» śpiavali na stadyjonie kaladnyja pieśni
Jak za biełaruskimi apazicyjanierami špijoniła madel Onlifans37
Kamientary