«Maja pamyłka, što zapisvaju videa». Čym skončylisia rezanansnyja zvaroty da Łukašenki?

Maci piaci dziaciej, jakaja prasiła nianiu i kvateru

Adnym z apošnich našumiełych videa ŭ tyktoku staŭ zvarot 34-hadovaj šmatdzietnaj maci z Homiela. U Julii piaciora dziaciej, samym małodšym bliźniatam niama jašče i hoda.

Julija paskardziłasia na toje, što sacyjalnaja słužba nie daje joj niańku (siamja na jaje maje prava pa zakonu). Žančyna taksama prasiła dapamahčy vyrašyć pytańnie z žyllom. Pakolki ŭ taty dziaciej jość va ŭłasnaści nieruchomaść, Juliju admaŭlajucca stavić u lhotnuju čarhu. Jana śćviardžała, što jakraz ciapier budzie afarmlać razvod z mužam, tamu nie pretenduje na jaho majomaść. U Łukašenki Julija prasiła kvateru, a lepš dom.

Pavialičyć

Jana nie skupiłasia i na pachvału palityku:

— Ja chaču padziakavać vam za toje, što vy padtrymlivajecie šmatdzietnyja siemji. Dziakujučy vam u mianie jość trochpakajovaja kvatera i dziciačyja hrošy. Jak kaža maja babula: «Ciabie zabiaśpiečvajuć dva mužyki — były i Łukašenka». Ja ź joj całkam zhodnaja.

Mienš čym za sutki rolik nabraŭ kala 500 tysiač prahladaŭ, ale na žančynu abrynułasia chvala chejtu. U chutkim časie videa ŭ akaŭncie źnikła. Što adbyłosia, Julija rastłumačyła ŭ inšym roliku.

U im jana niejak sumna dziakuje ŭładam Homiela na čale z meram — praŭda, za što kankretna, nie kaža. Vyhladaje, što sustreča ŭsio ž nie była pryjemnaj. Julija bolš nie ŭśmichajecca.

Vyhladała, što ŭ hety raz błohierka bolš staranna padbiraje słovy i sprabuje apraŭdacca:

— Maja meta nie vieści prapahandu, što naradžajcie šmat dziaciej i nie dumajcie hałavoj, žabračcie, jak vy kažacie. Ja hodnaja mama, ja nie bajusia pracy… Ja chaču vam prosta pakazać prykład, što, kali jość niejkaja ciažkaja situacyja, treba nie zakopvacca ŭ sabie. Mahčyma, maja pamyłka, što ja zapisvaju napramuju videa. Bo ja navat nikudy nie pajšła. Moža, kali b ja prosta pajšła… Prosta ja navat pra heta nie padumała.

Watch on TikTok

Rytoryka žančyny vielmi źmianiłasia. Julija padkreślivaje, što ŭ jaje niama pretenzij ni da sacyjalnaj słužby, ni da tych, chto admoviŭsia stavić jaje ŭ ilhotnuju čarhu na žyllo.

Jana taksama zaklikaje žančyn raźličvać svaje siły.

— Ja chaču stać prykładam mocnaj žančyny, jakaja ŭ składanaj situacyi moža źviarnucca ŭ adpaviednyja orhany. Nie zapisvać videa ŭ tyktok. Ja źbirajusia adkryvać svaju spravu, ja źbirajusia pracavać i vychoŭvać hodnych hramadzian dla takoj hodnaj, kłasnaj krainy.

Rezanasnyja historyi ŭ radzilniach

Letaś zdarylisia dźvie hučnyja historyi ŭ biełaruskich radzilniach. Jany byli źviazany z tym, što miedyki nie zrabili paradzicham svoječasova kiesarava. Praz heta mocna paciarpieli dzieci — adno ź ich trapiŭ u reanimacyju, druhoje zahinuła amal adrazu paśla naradžeńnia. A zabityja horam maci zapisali videazvaroty da Łukašenki.

Pieršaja historyja adbyłasia ŭ Salihorskaj centralnaj rajonnaj balnicy. Žycharka horada Darja Dejlid zajaviła ab «chałatnych adnosinach i poŭnaj adsutnaści miedyčnaj etyki i deantałohii» i raspaviała ŭ tyktoku, što pry rodach paciarpieŭ jaje syn, jaki trapiŭ u reanimacyju z 3-j stupieńniu dychalnaj niedastatkovaści, aciokam mozhu i kiefałahiematomaj.

U hetaj dramie ŭsio ž ščaślivy kaniec. Darja raspaviała ŭ tyktoku, što adbyŭsia sapraŭdny cud — niahledziačy na žudasnyja pieršapačatkovyja prahnozy, chłopčyk vyžyŭ i niadaŭna adśviatkavaŭ svoj pieršy dzień naradžeńnia.

U kamientaryjach da videa spytalisia, ci panieśli miedyki niejkuju adkaznaść. Darja napisała, što niekatorych daktaroŭ (u pryvatnaści, zahadčyka adździaleńnia) źniali z pasadaŭ. A voś kryminalnuju spravu ŭ vyniku admovilisia zavodzić. Maci rastłumačyli, što heta praz toje, što dzicia vyžyła i nie atrymała invalidnaści: «Kali b usio skončyłasia bolš trahična, była b kryminalnaja sprava».

Druhaja historyja adbyłasia ŭ radzilnym domie 5-j balnicy Minska. Pieršaja i doŭhačakanaja dačka Kaciaryny Sucharukavaj zahinuła. Paśla taho, jak vielmi emacyjnaje videa zavirusiłasia, na situacyju źviarnuli ŭvahu čynoŭniki. Ź siamjoj Sucharukavych sustreŭsia ministr achovy zdaroŭja Alaksandr Chadžajeŭ. Pres-słužba vypuściła zajavu pra toje, što ministr prynios spačuvańni pary i paabiacaŭ, što «jakaść akazańnia miedycynskaj dapamohi supracoŭnikaŭ radzilnaha doma, a taksama pracu Kamiteta pa achovie zdaroŭja Minharvykankama acenić lačebna-kantrolnaja rada pry Minzdaroŭja».

Paźniej u sacyjalnych sietkach žančyna napisała, što supracoŭniki radzilni atrymali vymovy.

Ludzi, jakija piać miesiacaŭ nie atrymlivali zarobki

Videazvarot zapisali rabotniki minskaha rybakansiervavaha kambinata «Staličny», jakija na toj momant nie atrymlivali piać miesiacaŭ zarobak. Heta pryvatnaje pradpryjemstva, jakoje z 2022 hoda arandavała vytvorčyja płoščy i abstalavańnie ŭ kamunalnaha pradpryjemstva AAT «Biełryba».

Pavialičyć

«Płacić kvartpłatu nam niama čym, žyć niama na što. U kramu ja nie mahu pajści, bo mnie niama za što kupić elemientarna navat kavałak chleba. Voś jak žyć u hetaj situacyi?» — kazała adna z žančyn u kadry.

Kaniečnie, historyja vyklikała rezanans. Čynoŭniki roznych uzroŭniaŭ kinulisia demanstravać zakłapočanaść situacyjaj. «Ludzi nie pakinutyja sam-nasam z prablemaj», — paśpiašaŭsia zajavić staršynia Kastryčnickaha rajona Minska Hienadź Lubatynski.

Jon dadaŭ, što i staličnym uładam viadoma pra situacyju: jana znachodzicca na pastajannym kantroli. A ŭ kancy śniežnia 2023 hoda rabotnikam była vypłačanaja častka zapazyčanaści. 

U Ministerstvie pracy taksama prakamientavali situacyju ź niavypłataj zarobkaŭ na rybakansiervavym kambinacie «Staličny». Pa słovach dyrektara Departamienta dziaržaŭnaj inśpiekcyi pracy Alaksandra Siemiča, kiraŭnik hetaj arhanizacyi «nieadnarazova pryciahvaŭsia da administracyjnaj adkaznaści».

A ŭ chutkim časie źjaviłasia videa, u jakim dyrektar rybakansiervavaha kambinat Andrej Błachin pryznavaŭ prablemy na pradpryjemstvie i vinu ŭ ich kiraŭnictva, abiacajučy ŭ najbližejšy čas situacyju vypravić.

Jak paźniej pisała «Lusterka», u Minsku na schodzie z supracoŭnikami sustrelisia pradstaŭniki vykankama i słužby zaniataści nasielnictva.

— Bolšaść šerahovych rabotnikaŭ pradpryjemstva majuć namier zvolnicca, im prapanavali novyja miescy. U asnoŭnym novaja rabota čakaje ich na zavodach. Što tyčycca doŭhu pa zarobku, to kiraŭnictva «Staličnaha» zaraz zajmajecca padlikami, kamu i kolki jany pavinny zapłacić. Nie ŭpeŭnienyja ŭ pravilnaści hetych padlikaŭ, bo ŭsio robicca na kalency.

Hrošy abiacali vypłacić u lutym 2024-ha.

Cikava, jak botaŭ adpravili adpracoŭvać u tyktoku hetuju temu. Pad videa, jakija pryśviačalisia prablemam na rybakansiervavym kambinacie, źjaŭlalisia adnatypnyja kamientaryi. Ich aŭtary śćviardžali, byccam historyja staraja, bo takoje mahło adbycca tolki ŭ dzievianostyja.

Maci, jakaja amal straciła nadzieju pabačyć maleńkaha syna

Viktoryja Tampiej vykłała zvarot u tyktok u žniŭni 2024 hoda. Za niekalki miesiaca da taho były muž zabraŭ 6-hadovaha syna na vychodnyja — i nie viarnuŭ dzicia maci nasupierak rašeńniu suda.

Pavialičyć

Viktoryja kazała, što niekalki miesiacaŭ nie bačyła chłopčyka. Ni čynoŭniki, ni milicyja nie dapamahali joj viarnuć syna. Usie tolki razvodzili rukami i kazali, što nie viedajuć, jak vykanać rašeńnie suda. U adčai Viktoryja vyrašyła zapisać zvarot.

Toje videa nabrała kala 680 tysiač prahladaŭ i 20 tysiač łajkaŭ. Ale ž paźniej, kali niechta z kamientataraŭ pytaŭsia, ci atrymała jana dapamohu ad uładaŭ, maładaja maci łakanična adkazvała: «Nie».

Niahledziačy na heta, žančyna praciahnuła zmahacca za dzicia i ŭ vyniku pieramahła — syn ciapier žyvie ź joj. A ŭdziačnaść jana vykazvała karystalnikam tyktoku, jakija maralna jaje padtrymlivali.

• 0
• 0
• 3
• 20
• 0
• 2
• 0
• 0