Kabiniet choča stvaryć Fond dla biełarusaŭ. Raskazvajem, kamu jon budzie dapamahać
Pradstaŭnica pa sacyjalnaj palitycy APK Volha Zazulinskaja płanuje, što struktura źjavicca i pačnie pracu naprykancy 2025 hoda. «Naša Niva» pacikaviłasia, jakaja meta Fondu i adkul płanujecca finansavańnie.
![](http://nashaniva.com/img/w840d4webp1/photos/z_2024_09/screenshot2024-09-20at145956-8qd56.png.webp)
«Vieteranam patrebna reabilitacyja, jakuju ŭ idealnaj situacyi možna budzie ŭklučać u hety Fond»
Fond budzie dapamahać piensijanieram, ludziam ź invalidnaściu, dzieciam, žančynam, ŁHBTK+, jakija terminova emihravali ź Biełarusi praz represii ci pahrozy kryminalnaha pieraśledu, i ich bazavyja patreby nie zakrytyja. Heta najaŭnaść arendnaha žytła, ježy, miedycynskaj dapamohi. Padtrymka dla takich ludziej stanie kompleksnaj: pravavaja, finansavaja, psichałahičnaja, miedycynskaja.
«Jość dyskryminacyja pa ŭzroście, kali biełarusaŭ u piensijnym uzroście nie biaruć na pracu. Dla kožnaj hrupy budzie vypracavany svoj pakiet dapamohi z ulikam taho, dzie znachodzicca čałaviek, jakija ŭ jaho patreby i hetak dalej. Naprykład, čałaviek nie moža ŭładkavacca na pracu, lehalizavacca. Adpaviedna, kali niama pracy, to nie možaš płacić padatki, a heta značyć, što niama dostupu da bazavaj miedycyny.
Asnoŭnaja ideja dać sacyjalnyja harantyi, jakija zvyčajna daje dziaržava, i stvaryć miechanizm ustojlivaj padtrymki dla biełarusaŭ u składanych sacyjalnych umovach.
Taksama ŭ nas jość takaja ŭraźlivaja hrupa jak vieterany, jakija viarnulisia z vajny va Ukrainie. Im patrebnaja reabilitacyja, jakuju ŭ idealnaj situacyi možna budzie ŭklučać u hety Fond», — kaža jana.
Volha źviartaje ŭvahu na toje, što biełarusy apynulisia ŭ situacyi, kali inicyjatyvy, NDA biaruć na siabie kropkavuju dapamohu takim ludziam.
«Naša zadača zrabić heta strukturna i sistemna, — kaža Volha. — Voś jak, naprykład, Mižnarodny humanitarny fond, jon zakryvaje patreby palitviaźniaŭ, stvaraŭsia kankretna pad hetuju hrupu. Tam dapamohaj zabiaśpiečvajucca jak ludzi ŭnutry krainy, tak i ludzi pa-za miežami».
«Piensijaniery ŭ Biełarusi majuć svajo žytło, a ŭ tych, chto ŭ emihracyi, ni kvatery, ni piensii»
Ciapier isnuje tolki ideja takoha Fondu. Raspracoŭka prajekta zojmie šmat času. Naprykład, dla stvareńnia Mižnarodnaha humanitarnaha fondu spatrebiłasia bolš za hod — ad kancepcyi do zapusku.
«Na hety momant my nie viedajem, kolki ludziej patrabujuć dapamohi, jakija kankretnyja ŭ ich patreby. Dla heta budzie pravodzicca pradstaŭnictvam Kabinieta pa sacyjalnaj palitycy daśledavańnie, jakoje stanie asnovaj dla farmavańnia biudžetu i struktury Fondu: vyvučyć pole, zrazumieć, kolki ludziej majuć patrebu ŭ takoj abaronie i dalej pracavać z hetym», — tłumačyć Volha.
Adpaviedna paśla daśledavańnia stanie zrazumieła, jakija abjomy finansavańnia musiać być u takoha Fondu.
«Spačatku stvorym Fond, pryciahniem srodki, a paśla na asnovie tych miechanizmaŭ, jakija byli vypracavanyja, zrobim biaśpiečny pratakoł dapamohi ludziam.
U pieršuju čarhu adpracoŭvać usiu sistemu budziem pa-za Biełaruśsiu, tamu što ludzi ŭnutry krainy, naprykład, piensijaniery, majuć svajo žytło, piensiju. A tyja, chto ŭ emihracyi, — nie», — raskazvaje jana.
Stvaralniki razvažajuć pra hibrydnaje i prazrystaje finansavańnie Fondu, uklučajučy mižnarodnyja hranty, partniorstva ź isnujučymi fondami i dabračynnyja achviaravańni biełaruskaj dyjaspary.
«Takaja madel dazvolić zabiaśpiečyć ustojlivaść, paźbiehnuć zaležnaści ad adnaho donara i stvaryć efiektyŭnuju sistemu dapamohi dla ŭraźlivych hrup. Usie finansavyja patoki buduć prazrystymi i padspravazdačnymi, što pavysić davier da pracy Fondu i efiektyŭnaść.
U maim idealnym ujaŭleńni kožny biełarus, jaki pracuje, moža ŭ toj ci inšaj stupieni dapamahać tamu, u kaho takoj mahčymaści niama. Ja asabista vieru, što biełaruskaja salidarnaść moža stać asnovaj ustojlivaj sacyjalnaj padtrymki dla tych, chto ŭ hetym maje patrebu», — kaža jana.
Nad kancepcyjaj Fondu kamanda pracuje prabona (biaspłatna). Volha patłumačyła čamu.
«Dla taho, kab atrymać hrošy na pracu kamandy, treba całkam prapisać jakasny prajekt, zaraz stvarajem čarnavy varyjant kancepcyi. Paśla hetaha kancept pavinny pahladzieć ekśpierty, unieści svaje praŭki ŭ dakumient.
Dalej z kancepcyi budzie stvaracca paŭnacenny prajekt. Potym praces pa rehistracyi jurydyčnaj formy. Dla hetaha treba znajści partniora, jak było ź Mižnarodnym humanitarnym fondam, jaki zmoh by ŭziać na siabie funkcyju administravańnia arhanizacyi. Jašče varyjant — rehistravać asobnuju jurydyčnuju asobu.
Tut, kaniešnie, taksama budu słuchać parady jurystaŭ, jak jany parekamiendujuć, budziem vybirać, što dla nas lepš. I tolki potym možam kazać ab pošuku finansaŭ na kamandu, jakaja budzie pracavać u samim Fondzie», — padsumoŭvaje jana.
Kamientary
Diełajtie vznosy, hospoda