Rasija nie moža z-za sankcyj pradać miljony barelaŭ nafty i rychtujecca skaračać zdabyču

Sa słoŭ surazmoŭcaŭ ahienctva, raźvitalnyja sankcyi administracyi Džo Bajdena, pad jakija trapili «Hazpram nafta», «Surhutnaftahaz», a taksama 180 tankieraŭ «cieniavoha fłotu», pryviali da taho, što ŭ Rasii ŭźnik lišak nafty, jakuju niemahčyma vyvieźci za miažu.

Ekspartnyja pastaŭki z partoŭ Uść-Łuhi i Prymorska na Bałtyjskim mory, a taksama z Navarasijska na Čornym mory ŭ studzieni ŭpali na 17%, a košt frachtu tankieraŭ dla vyvazu nafty praź cichaakijanski port Koźmina ŭźlacieŭ u 5 razoŭ.

U vyniku za miesiac sankcyj u naftavikoŭ nazapasiłasia 17 młn nieraspradadzienych barelaŭ, jakija drejfujuć u tankierach, pieratvoranych u płyvučyja schoviščy. Da pačatku leta hety abjom moža vyraści da 50 młn barelaŭ, prahnazujuć analityki Goldman Sachs.

Padzieć hetuju naftu de-fakta niama kudy: bujnych schoviščaŭ u Rasii praktyčna niama, a tyja, što jość, trapili pad studzieńskija naloty dronaŭ. Pierapracavać lišniuju naftu na NPZ taksama składana: praz udary BPŁA stračanyja 10% mahutnaściaŭ naftazavodaŭ, u tym liku Razanskaha, Vałhahradskaha i Astrachanskaha, a ich ramont zojmie miesiacy, kažuć krynicy Reuters.

Pa ich słovach, adzinym vychadam dla naftavikoŭ stanovicca skaračeńnie zdabyčy — jano moža pačacca ŭ najbližejšyja miesiacy i paskorycca, kali prablemy z tankierami i NPZ nie buduć raźviazanyja.

Ciapier Rasija pampuje 8,9 młn barelaŭ u sutki, vykonvajučy ździełku pa skaračeńni zdabyčy APIEK+. U paraŭnańni z rekordam 2019 hoda (11,25 młn barelaŭ u dzień) naftazdabyča ŭžo skaraciłasia na 20%.

Pad sankcyi trapiła piataja častka fłotu, jaki vaziŭ naftu, niahledziačy na sankcyi, kažuć krynicy Reuters. Dla hetych tankieraŭ zakrylisia niekatoryja party Indyi i Kitaja, jakija patrabujuć, kab bareli vazili nie ŭklučanyja ŭ «čornyja śpisy» sudny. Adnačasova indyjskija i kitajskija NPZ, jakija skuplajuć amal 90% marskoha ekspartu rasijskaj nafty, śpiešna šukajuć alternatyvy — u Saudaŭskaj Aravii, Iraku i Abjadnanych Arabskich Emiratach.

Pieršymi «pad nož» mohuć pajści arktyčnyja radoviščy, dzie Rasija zdabyvaje 300 tysiač barelaŭ za dzień: jany zastalisia biez tankieraŭ ladovaha kłasa, zamianić jakija niemahčyma.

Kolkaść sudnaŭ «cieniavoha fłotu» pad zachodnimi abmiežavańniami pieravysiła 270. U čornych śpisach, pavodle danych S& P Global, apynulisia tankiery, jakija vazili pałovu marskoha ekspartu nafty z Rasii, abo 1,5 młn barelaŭ u dzień — kala 1 młn u Kitaj i kala 500 tysiač — u Indyju.

Pavodle acenak rasijskaha Alfa-banka, praz sankcyi Rasija moža stracić naftavy ekspart u abjomie da 800 tysiač barelaŭ na dzień — abo kožny treci barel, što tankiery vyvoziać moram z partoŭ. Heta pazbavić ekanomiku kala $50 młrd ekspartnaj vyručki štohod i moža pryvieści da devalvacyi rubla da ŭzroŭniaŭ vyšej za 130 za dalar, pisali eksperty Centra makraekanamičnaha analizu i karotkaterminovaha prahnazavańnia.

• 22
• 0
• 2
• 0
• 0
• 0
• 0
• 2