«Ledź nie pabiłasia z babkaj u paliklinicy praz tałončyk». Naścia Rybka pryjechała ŭ rodny Babrujsk

Naścia Rybka nie była ŭ rodnym Babrujsku šmat hadoŭ — jana ŭ asnoŭnym žyvie ŭ Dubai, na Bali i čas ad času lataje ŭ Rasiju. Imavierna, nahoda naviedać Biełaruś davoli prazaičnaja — nieabchodnaść zamianić paśviedčańnie kiroŭcy.

Niechta ź siabroŭ paraiŭ Naści pažyć u Biełarusi tydzień-dva-try, karaciej kažučy, kolki vytrymaje.

Dziaŭčyna dzielicca: pa adčuvańniach, nibyta na mašynie času trapiła ŭ 2000-ja, bo na vulicach Babrujska mała aŭtamabilaŭ i jany staryja. Zhadvaje, što adnoj z zabavak ź dziacinstva bieź internetu było sieści ŭ vypadkovy aŭtobus i jechać kruh, pakul jon nie vierniecca na ich prypynak.

Dziaŭčyna radujecca, što instahram tut pracuje biez VPN. I ŭ zachapleńni ad biełaruskaj ježy.

Pavialičyć

Ździŭlaje Naściu na radzimie šmat čaho. Naprykład, toje, što ŭ Biełarusi źjavilisia pryvatnyja łabaratoryi: «Ja addała za analizy kala 50 dalaraŭ i hałoŭnaje, ad čaho ŭ šoku — mnie nie baluča ŭziali kroŭ, nabrali dźvie prabirki siekund za šeść. Nie baluča i chutka. I za 50, a nie za 500».

Ale nie ŭsie pryhody Naści ŭ miedycynskich ustanovach zakančvajucca pazityŭna. Siońnia jana napisała ŭ svaim telehram-kanale, što pasvaryłasia ŭ paliklinicy ź niejkaj babulaj praz tałončyk.

A situacyja prostaja da banalnaści: u Naści byŭ tałončyk na 10:30, ale, jak zvyčajna byvaje, u čarzie pieramiašalisia ludzi, i kala 11 hadzin u kabiniet uvachodziŭ čałaviek z tałonam na 9:40. Potym u historyi źjaviłasia babula, jakaja vyrašyła pajści pieršaj — i ŭ Naści, jakaja daŭno čakała, zdali niervy.

— Pasvarylisia tak, što my ledź nie pabilisia prosta la kabinieta. Praz tałončyk. Potym ja ŭ kabiniecie razraŭłasia. A ciapier užo hadzinu śmiajusia, nie mahu supakoicca. Brat ledź nie ŭdaryŭ muža babki. Babrujskija budni.

Zdajecca, nie biez nastalhii Naścia zhadvaje žyćcio ŭ Babrujsku. Jana pakazała ŭ instahramie šviejnuju fabryku «Słavianka»:

— Heta šviejnaja fabryka, kudy mianie maci pahražała adpravić pracavać (pry tym što šyć ja nie ŭmieju zusim), kali ja nie znajdu sabie niešta sama ŭ 19 hadoŭ. Znajšła.

Niehatyŭnych uspaminaŭ pra Babrujsk u dziaŭčyny chapaje. Naścia kaža, što padletkam čatyry razy była vymušana źmianić škołu, bo sutykałasia z bulinham: «Usie słuchali «Ruki ŭvierch», a ja — Evanescence. Zanadta dobra vučusia, zanadta vostraja na jazyk. Kažu, što dumaju. Heta škodzić čaściej, čym dapamahaje. Drobnaja, chudaja. Chłopcy plaskajuć u dałoni, kali ja idu da doški. Heta nie apładysmienty ad zachapleńnia, kali što. Aŭtsajdary zrazumieli».

Pavialičyć

Ale najbolšy žach u Naści vyklikali miascovyja chłopcy, jakich jana ŭbačyła ŭ dadatku dla znajomstvaŭ Twinby (rasijski anałah Tinder). Asabliva jaje raźviesialiła fota ravieśnika, jaki ŭžo mieŭ vialikija załysiny.

— Kali b ja nie źjechała z Babrujska, dyk chadziła b na spatkańni ź imi… — napisała dziaŭčyna ŭ svaim telehram-kanale.

Adna z padpisčyc pasprabavała zastupicca za chłopca i napisała, što nie kožnaj ža być žonkaj Abramoviča — to-bok nie treba śmiajacca z narmalnych prostych chłopcaŭ. Ale Naścia nie pahadziłasia:

— Reč nie ŭ kpinach. I nie ŭ adpaviednaści. A ŭ tym, što avulacyja voźmie svajo. I budzieš spać z tymi, chto akružaje. Baišsia pierajezdu? Padarožžaŭ? Być ekspatkaj? Vučyć novuju movu? Maryć i zajaŭlać pra siabie? Zapasajsia nikacinavaj kisłatoj…

Pavialičyć

Nahadajem: Naścia Rybka (sapraŭdnaje imia Anastasija Vašukievič) stała viadomaj dziakujučy seks-skandału z rasijskim aliharcham Aleham Dzierypaskam. Jaje pieršaja kniha raspradałasia paśla rasśledavańnia Alaksieja Navalnaha.

Letaś Rybka vypuściła treciuju knihu, u jakoj raspaviała, jak prostaja dziaŭčyna z Babrujska stała palaŭničaj na miljarderaŭ i pačała vučyć inšych stanavicca ŭtrymankami.

Jana taksama pradaje pryśviečany hetamu kurs «Ściervałohija». Śćviardžaje, što anałahaŭ jaje mietodyki ŭ śviecie niama, a vyniki fienamienalnyja.

• 10
• 3
• 9
• 45
• 3
• 2
• 4
• 2