«Pierad tym, jak źniać trusy — dumaj, što skaža pra ciabie tvoj budučy były»: Naścia Rybka napisała aŭtabijahrafičnuju knihu
Naścia Rybka stała viadomaj dziakujučy seks-skandału z rasijskim aliharcham. Jaje pieršuju knihu nieznarok dapamoh raspradać Alaksiej Navalny. Sioleta Rybka vypuściła novuju, u jakoj raspaviała, jak prostaja dziaŭčyna z Babrujska stała palaŭničaj na miljarderaŭ i pačała vučyć inšych stać utrymankami.
Pra rabotnicu industryi eskortnych pasłuh Naściu Rybku (sapraŭdnaje imia biełaruski — Anastasija Vašukievič) pačali havaryć u 2018 hodzie. Tady Alaksiej Navalny vypuściŭ rasśledavańnie na asnovie analizu fatahrafij i zapisaŭ ź instahrama dziaŭčyny, a taksama materyjałaŭ ź jaje knihi «Dziońnik pa spakušeńni miljardera». U ich śćviardžałasia, što rasijski vice-premjer i kiraŭnik aparata ŭrada Siarhiej Prychodźka ŭ supravadžeńni Rybki adpačyvaŭ na jachcie Elden miljardera Aleha Dzierypaski, abmiarkoŭvajučy dziełavyja pytańni.
Darečy, paśla vychadu rasśledavańnia knihu, jakaja da hetaha momantu nie karystałasia asablivaj papularnaściu, raskupili za niekalki dzion. Mabyć, tamu ciapier Rybka žartuje, što Alaksiej Navalny rekłamavaŭ jaje pieršy tvor.
Praź niekalki tydniaŭ paśla zornaha času Naściu Rybku, Aleksa Leśli i jašče vaśmiarych čałaviek zatrymali padčas seks-treninhu ŭ hateli ŭ Tajłandzie. Spačatku ich abvinavacili ŭ niezakonnaj pracy, potym anulavali vizy, a ŭrešcie vystavili novyja abvinavačańni — u arhanizacyi pasłuh seksualnaha charaktaru, zmovie i arhanizacyi złačynnaj supolnaści. Naścia ličyła, što heta pomsta za niepatrebnuju miljarderu ŭvahu.
Jak spravy ŭ skandalna viadomaj babrujčanki ciapier?
Jana daŭno źjechała z Rasii i ciapier žyvie ŭ Dubai ŭ raskošnaj kvatery. Tydzień tamu Naścia raspaviała, što raźvitałasia z mužčynam, ź jakim była razam 5 hadoŭ — i adbyłosia heta kryva i ŭ niazručny dla jaje momant. Ale ž aptymizmu jana nie hublaje.
Dziaŭčyna maje 550 tysiač padpisčykaŭ u instahramie, a taksama 70 tysiač padpisčykaŭ na YouTube. Naścia vučyć dziaŭčat tamu, jak stać utrymankami, i pradaje pryśviečany hetamu kurs «Ściervałohija». Śćviardžaje, što anałahaŭ jaje mietodyki ŭ śviecie niama, a vyniki fienamienalnyja.
Naścia źniałasia ŭ čatyroch klipach, a taksama praciahnuła pisać knihi. Paśla «Dziońnika pa spakušeńni miljardera» byŭ apublikavany «Padručnik Prystojnaj ryby» (hetu knihu Rybka pisała, pakul znachodziłasia za kratami). A sioleta dziaŭčyna pačała pradavać svaju aŭtabijahrafiju — «Anastezija».
Historyju jana pačynaje ź fiłasofskich dumak: «Dać ci nie dać? — pytańnie składaniej, čym «Być ci nie być?» i «Pierad tym, jak źniać trusy — dumaj, što budzie kazać pra ciabie tvoj budučy były».
Naścia Rybka raskazvaje pra svajo dziacinstva i školnyja hady ŭ Babrujsku. Dziaŭčyna piša, što jaje absalutnym kumiram była mama. Pa słovach Naści, taja mahła samastojna i šafu pierasunuć, i ćvik zabić, i kvateru sabie kupić.
Rybka ščyra pryznajecca, što z małoha ŭzrostu była składanym dziciom. Užo ŭ 6 hadoŭ źbiahała z domu, kab tusić sa starejšymi chłopcami niedzie na budoŭli ci ŭ karjerach. Jana nazyvaje siabie buntarkaj, letucieńnicaj i adrynalinamankaj. Kaža, što maryła pra pryhody, jakija, na žal, nie zaŭsiody zakančvalisia dobra.
U trynaccać hadoŭ Naściaj upieršyniu zacikaviłasia milicyja. Razam ź siabrami dziaŭčyna kuryła kala padjezda, što nie spadabałasia žančynie, jakaja žyła ŭ tym samym domie. Taja nakinułasia na školnicu i pačała treści. Ale Naścia tolki śmiajałasia. Raźjušanaja susiedka zalapiła aplavuchu dziorzkaj dziaŭčyncy. Takoj abrazy pry siabroŭkach Rybka daravać nie mahła, tamu ŭ adkaz zatušyła cyharetu ab tvar napadnicy. Pačałasia bojka.
Voś praz hety epizod u Naści i pačalisia pieršyja prablemy z zakonam. Vyśvietliłasia, što taja žančyna — paśpiachovaja biznesvumien, ułaśnica turystyčnaha ahienctva i transpartnaj kampanii, a jaje muž — prakuror. Rybka piša, što taja siamja dabivałasia taho, kab adpravić dziaŭčynu ŭ kałoniju dla niepaŭnaletnich. Ale ŭ milicyi z samoj historyi ŭ asnoŭnym śmiajalisia. Tym bolš sama Naścia, niahledziačy na luboŭ da pryhod, vyhladała amal aniołam: dalikatnaja dziaŭčynka, vydatnica ŭ škole…
Tady ž Naścia zrabiła vysnovy, jakija spatrebilisia ŭ darosłym žyćci: «Kali traplaješ u miantoŭku, treba pavodzić siabie spakojna. Nikomu nie vieryć. Lišniaha nie kazać. I jašče raz: siabroŭ nie byvaje».
U vyniku sprava skončyłasia ničym — dziaŭčynu nie pakarali navat štrafam.
Pra svajho tatu Naścia nie viedała ničoha. Mama na ŭsie pytańni adkazvała, što jak-niebudź potym usio ščyra raskaža. Dziaŭčyna dumała, što za hetym niežadańniem havaryć chavajecca niejkaja ramantyčnaja historyja. Ale praŭdu niečakana raspaviała siabroŭka, kali Naści było 14 hadoŭ. Vyśvietliłasia, što dziaŭčynu ŭdačaryli.
Mama (jana była doktarkaj) rastłumačyła, što ŭbačyła ŭ balnicy dvuchmiesiačnuju dziaŭčynku, ad jakoj admovilisia baćki, i vyrašyła jaje ŭdačaryć. U samotnaj žančyny było niašmat šansaŭ, što dzicia addaduć joj, a nie ŭ poŭnuju siamju, ale siabroŭka, jakaja pracavała zahadčycaj balnicy, dapamahła vyrašyć pytańnie.
Sama Naścia rana stała maci — syna jana naradziła ŭ 17 hadoŭ. Kaža, što dla Babrujska heta byŭ davoli typovy scenar žyćcia: naradzić, atrymać adukacyju, jakaja nikoli nie spatrebicca, uleźci ŭ kredyty.
Ale niahledziačy na toje, što Naścia nazyvaje rannija rody samym tupym, što tolki moža być u śviecie, jana śćviardžaje, što mocna lubić svajho syna.
«U topie pytańniaŭ u majoj insty — jak dzicia stavicca da majho seksu, porna ci čahości jašče. Dyk voś, mnie zdajecca, dla dziciaci bolš baluča dumać, što maci škaduje, što jano źjaviłasia na śviet. Dyj hladzieć porna mamy — dziŭny fietyš. Vy b hladzieli porna svaich baćkoŭ, kali b jano isnavała? Nu voś», — piša Naścia.
Jana nazyvaje siabie maci-ziaziulaj, ale ŭdakładniaje, što syn žyŭ ź joj da 8 hadoŭ i paśla 14 hadoŭ taksama:
«Mnie zaŭsiody było praściej adkupicca, čym schadzić pahulać. Mnie časta byvała sumna. Ja časta vybiraju siabie zamiest dziciaci, i mnie časam zdajecca, što heta niapravilna. Ale jon uśmichajecca, ščaślivy, viedaje, što zaŭždy moža na mianie raźličvać. Značyć, ja spraŭlajusia, tak?»
Svajho syna (ciapier jamu 17 hadoŭ) Naścia nazyvaje najlepšym siabram i śćviardžaje, što dziakujučy jamu nie stała ałkahaličkaj ci narkamankaj. Jana ličyć, što najaŭnaść dziciaci nie dazvalaje joj być biednaj, sumnaj ci słaboj.
Kamientary