Žychary vulicy Kamunistyčnaj u Viciebsku, maŭlaŭ, admovilisia viarnuć taponimu histaryčnuju nazvu
Pra heta paviedamiła staršynia Viciebskaj abłasnoj arhanizacyi arhkamiteta pa stvareńni partyi «Biełaruskaja chryścijanskaja demakratyja», inicyjatar kampanii pa zbory podpisaŭ haradžan za pierajmienavańnie vulicy Taćciana Sieviaryniec.
Pavodle jaje słoŭ, na Kamunistyčnaj, jakaja da 1919 hoda składałasia ź dźviuch vulic — Vialikaj Bahasłoŭskaj i Małoj Bahasłoŭskaj, raźmieščana viciebskaja Śviata‑Uśpienskaja carkva pieršaj pałovy XVIII stahodździa, śviatar jakoj błasłaviŭ zbor podpisaŭ za viartańnie taponimu histaryčnaj nazvy. Zajava pra heta z 31 podpisam žycharoŭ vulicy Kamunistyčnaj była padadziena ŭ miascovy harvykankam 8 śniežnia, skazała Sieviaryniec.
21 studzienia pytańnie było razhledžanaje na pasiadžeńni haradskoj tapanimičnaj kamisii. «Pradstaŭnik administracyi Kastryčnickaha rajona Viciebska zajaviŭ, što ŭ bližejšyja dva‑try hady horad nie budzie zajmacca pierajmienavańniem vulic, tamu što «niama hrošaj navat na zarobki». Čynoŭnik adznačyŭ, što rajvykankam «ź vialikaj ciažkaściu vypłačvaje zarobki biudžetnikam». Pierajmienavańnie vulicy, pavodle jaho słoŭ, budzie kaštavać ad 5 da 7 miljonaŭ rubloŭ», — adznačyła Sieviaryniec.
Joj było zajaŭlena, što ŭłady pahadzilisia b ź pierajmienavańniem Kamunistyčnaj, kali b hetyja raschody ŭziali na siabie žychary vulicy, jakija padpisali zajavu.'
Adnak užo 4 sakavika Taćciana Sieviaryniec atrymała list z vynikami pasiadžeńnia administracyi Kastryčnickaha rajona z udziełam žycharoŭ vulicy Kamunistyčnaj.
Z 77 čałaviek, jakija brali ŭdzieł u abmierkavańni, tolki dzieviać vykazalisia za viartańnie taponimu jaho histaryčnaj nazvy, a 55 — suprać.
Tamu haradskija ŭłady paličyli niemetazhodnym viartać u haradskuju tapanimiku vulicy Vialikuju i Małuju Bahasłoŭskija.
Na hetaje pasiadžeńnie Sieviaryniec nie zaprasili. Jana miarkuje, što pytańnie žycharam vulicy padali prykładna takim čynam: «Vy viedajecie, što pierajmienavańnie budzie kaštavać piać‑siem miljonaŭ rubloŭ? U horada hrošaj na heta niama. Chočacie płacić sa svajoj kišeni?» «Viadoma, ludzi, dla jakich viartańnie vulicy jaje histaryčnaj nazvy nie źjaŭlajecca pryncypovym pytańniem, vykazalisia suprać hetaj idei», — ličyć Taćciana Sieviaryniec.
Kamientary