«Čaho nam svarycca? My z ZŠA hłabalnych pytańniaŭ vyrašać nie budziem. My viedajem svajo miesca». Novaja mietadyčka prapahandystaŭ

Na sajcie Biełaruskaha telehrafnaha ahienctva źjaviŭsia padkast pad intryhoŭnaj nazvaj «Čaho choča Tramp?» Na dziaržaŭnym resursie, dzie ništo nie źjaŭlajecca vypadkova, ananimny aŭtar adkazvaje na šerah pytańniaŭ, jakija datyčać palityki ZŠA. My pasłuchali i prapanujem asnoŭnyja tezisy novaha kurykulumu biełaruskaj prapahandy.

«Tramp — praamierykanski prezident»

U lutym 2017 hoda, śćviardžaje BiełTA, Łukašenka daŭ, jak pakazaŭ čas, maksimalna realistyčnuju acenku Trampu, nazvaŭšy jaho pierš za ŭsio praamierykanskim prezidentam, jaki budzie dziejničać u intaresach svajoj krainy:

«Treba razumieć, što Amieryka abrała praamierykanskaha prezidenta, nie prarasijskaha i nie prabiełaruskaha. I nie nastolki jon durny, jak niekatoryja dumajuć, chaj navat jon niespraktykavany».

ZŠA zmahajucca za daminavańnie ŭ śviecie

Zvyšdziaržavy kštałtu Złučanych Štataŭ nikoli nie zdradziać svajoj pryrodzie lidara i daminatara. Pry hetym dla amierykancaŭ daminavańnie, jak praviła, supravadžajecca davoli ahresiŭnym praciskańniem svaich intaresaŭ i vieraj va ŭłasnuju vyklučnaść.

Pahrozu svajho daminavańnia Złučanyja Štaty bačać u kankurencyi z tymi, chto słabiejšy i pryznaje viadučuju rolu ZŠA. Zamiest taho, kab vybudoŭvać kanstruktyŭnyja adnosiny, ZŠA sprabujuć prybrać kankurentaŭ. Tak, naprykład, adbyłosia ŭ adnosinach ZŠA i Jeŭrasajuza, čyju ekanomiku amierykancy ŭžo niekalki hadoŭ raźbirajuć na zapčastki. Pieścić iluzii adnosna ZŠA nie varta.

U kamandy Trampa novaja stratehija

Toje, što zaraz robić kamanda Trampa — heta ŭžo nie novy styl, heta novaja stratehija. Administracyja Bajdena faktyčna dziejničała ŭ realijach adnapalarnaha śvietu, u toj čas, jak farmirujecca novy suśvietny paradak, u centry jakoha — try klučavyja hulcy: ZŠA, Rasija i Kitaj. Uzajemadziejańnie pamiž imi stanovicca asnovaj budučaj architektury mižnarodnych adnosin.

Ciapier u Vašynhtonie adbyłasia źmiena elit. I da ŭłady pryjšła hrupa ludziej, jakaja zdolnaja bolš realistyčna i prahmatyčna hladzieć na śviet i na tuju situacyju, u jakoj apynulisia Złučanyja Štaty.

«U adroźnieńnie ad Bajdena, Tramp vydatna razumieje, što śviet žyvie pa-novamu. Zamiest taho, kab trymacca za staroje, jak heta robić bolšaść jeŭrapiejskich lidaraŭ, ciapierašni prezident ZŠA hatovy adaptavacca ŭ novym asiarodździ», — aceńvaje biełaruskaja prapahanda.

«Tramp — pieradusim biznesmien»

I toje, što mienavita Tramp paśla prezidenckich vybaraŭ staŭ la rula, dla Złučanych Štataŭ moža stać vielmi važnym krokam napierad, a hałoŭnaje — svoječasovym. Tramp pierš za ŭsio biznesmien. A, jak viadoma, ništo tak chutka nie padładžvajecca pad źmieny, jak biznes. Ciapierašniaja administracyja ZŠA vydatna bačyć tyja prablemy, jakija nazapasilisia ŭ krainie.

U kadencyju Trampa ekanamičnyja mety, chutčej za ŭsio, buduć pieravažać nad palityčnymi. Užo siońnia možna mierkavać, što hałoŭnaja meta Trampa — zrabić Amieryku jašče bahaciejšaj.

Meta ZŠA — umacavańnie suviaziaŭ z Rasijaj

Rasija, Kitaj i ZŠA buduć adstojvać svaje intaresy, kankuravać, zmahacca za pieršynstvo i šukać ryčahi cisku. Varta čakać nastojlivych sprob Vašynhtona ŭklińvacca ŭ adnosiny Maskvy i Piekina. Metaj

ZŠA budzie ŭmacavańnie suviaziaŭ z Rasijaj, najpierš ekanamičnych, što ŭ Vašynhtonie moža razhladacca jak svojeasablivaja harantyja taho, što Maskva nie ŭstupić u antyamierykanski aljans.

Adkaznaść za svaje prablemy Jeŭropa pavinna ŭziać na siabie

Paśla prychodu Trampa da ŭłady jeŭrapiejcy pieražyvajuć adno ŭzrušeńnie za inšym. Ci jość u Jeŭropie padstavy adčajvacca? Aniahož. Ale vinoju tamu nie Tramp. Tramp — prezident ZŠA, i jaho praca zaklučajecca ŭ tym, kab abaraniać intaresy amierykancaŭ.

U jeŭrapiejskich krainach svaje lidary — prezidenty, kanclery, premjery. Na hetych ludziej uskładzieny abaviazak abaraniać intaresy svaich krain i narodaŭ. I kali zaraz jeŭrapiejskija lidary narakajuć na ZŠA, to tym samym tolki demanstrujuć svaju niekampietentnaść i niazdolnaść efiektyŭna kiravać svaimi krainami, klajmuje ich BiełTA.

ZŠA nie pakinuć Jeŭropy

U čym možna być upeŭnienymi, dyk heta ŭ tym, što ZŠA nie pakinuć Jeŭropy i nie admoviacca ad svajho ŭpłyvu, ni palityčnaha, ni ekanamičnaha. I, chutčej za ŭsio, svaju prysutnaść u vajskovym płanie amierykancy taksama zachavajuć. Chacia i zrobiać tak, kab łajalnaść jeŭrapiejskich elit abychodziłasia amierykanskamu biudžetu tańniej.

Tramp — simvał hłabalnaha paŭstańnia suprać libieralnych elit i «hłybinnaj dziaržavy»

«Ahresiŭnaja rytoryka Maska na adras jeŭrapiejskich elit, vystup Vensa ŭ Miunchienie, simpatyi Trampa i jaho administracyi na adras pravych i ŭltrapravych palitykaŭ u Jeŭropie, admova ad finansavańnia ruparaŭ radykalnaj prapahandy, libierałaŭ «Hołasu Amieryki» i «Radyjo Svaboda» — usio heta nie pakidaje sumnievaŭ u tym, što trampisty hatovyja adciskać libierałaŭ na ŭsich frantach, i ŭ ZŠA, i za ich miežami».

Kali dumać stratehična, amierykancam było b niavyhadna całkam vykarčoŭvać libierałaŭ ź vialikaj palityki. Bo ich miesca zojmuć pravyja siły, jakija, pa svaich pohladach, davoli raznamasnyja. Kantralavać ich, padparadkoŭvajučysia svaim intaresam, moža być značna składaniej, čym infantylnych i bajaźlivych libierałaŭ. Tamu dla ZŠA było b zručniej pasprabavać asłabić libieralnyja elity, dzie-nidzie zamianiŭšy ich na łajalnyja pravyja siły, miarkuje analityk BiełTA.

Los Ukrainy: ZŠA i Rasija zhulajuć u pary

Dla ZŠA na hetym etapie vyhadniej zaviaršyć kanflikt, paśla čaho možna pakapacca va ŭkrainskich nietrach abo intehravać ukrainskija party ŭ handlovyja šlachi, nad jakimi amierykancy imknucca atrymać kantrol. A ciapier havorka idzie i pra vałodańnie enierhietyčnaj infrastrukturaj va Ukrainie.

Rasijski bok zacikaŭleny ŭ tym, kab vybudavać novuju architekturu biaśpieki jak na jeŭrapiejskim kantyniencie, tak i ŭ cełym u śviecie. Z prychodam da ŭłady Trampa dyjałoh u hetym kirunku staŭ mahčymy, i Maskva hetuju mahčymaść budzie vykarystoŭvać maksimalna, u tym liku praz uciahvańnie ZŠA ŭ sumiesnyja ekanamičnyja prajekty, kaža BiełTA.

U ciapierašniaj niaprostaj situacyi z Ukrainaj i sprobami jeŭrapiejcaŭ hetuju situacyju eskaliravać Rasija i ZŠA buduć nie prosta łaviravać paasobku, ale, mahčyma, zhulajuć u pary, dapuskaje biełaruskaje dziaržaŭnaje ahienctva.

Čaho čakać Biełarusi?

Pakul lidary jeŭrapiejskich dziaržaŭ ułasnaručna zahaniali svaju ekanomiku ŭ kut, biełaruskaje kiraŭnictva pad ciskam sankcyj pašyrała ekanamičnyja haryzonty i šukała novyja mahčymaści, śćviardžaje BiełTA. Dziakujučy hetamu siońnia, va ŭmovach hieapalityčnaj turbulentnaści, jakaja praciahvajecca, my možam mocna stajać na nahach.

Mnohija pytańni buduć vyrašacca ŭ ramkach trochkutnika Rasija, Kitaj, ZŠA. Ale treba razumieć, što kožnaja z troch viaršyń budzie abapiracca na svaich sajuźnikaŭ i ŭ toj ža čas pradstaŭlać svaje intaresy. Jak minimum, ź dźviuma viaršyniami ŭ Biełarusi ciesnyja suviazi. Z amierykancami nam taksama dzialić niama čaho, kali jany nie stanuć stvarać pahrozy la biełaruskich miež.

My nie čakajem ad Amieryki niejkich padačak, ale my chočam ź imi supracoŭničać, razumiejučy, što heta ŭsio ž taki viadučaja kraina ŭ śviecie.

Nu, čaho nam svarycca? My z Amierykaj hłabalnych pytańniaŭ vyrašać u śviecie nie budziem. My viedajem svajo miesca. A voś supracoŭničać naša kraina moža i z ZŠA, i ŭ pierśpiektyvie z Ukrainaj, i z toj ža Polščaj, kali jaje kiraŭnictva budzie prytomnym, abiacaje BiełTA.

Takim čynam, łukašenkaŭcy bolš nie prahnazujuć padzieńnia Ukrainy i hatovyja prystasoŭvacca da novaj raskładki siłaŭ na mižnarodnaj arenie. Asnoŭnaja krytyka ciapier skiravanaja na krainy Jeŭrasajuza. Z Amierykaj Trampa Minsk maje namier zaihryvać.

• 1
• 0
• 13
• 5
• 2
• 0
• 6
• 0