Siońnia — apošni zvanok. Minpryrody prosić školnikaŭ nie zapuskać u nieba pavietranyja šaryki
U subotu ŭ biełaruskich škołach projduć apošnija zvanki. Adzin z samych papularnych i kranalnych rytuałaŭ hetaha dnia — zapusk u nieba šaroŭ.
Heta pryhožaja tradycyja ŭžo daŭno pryžyłasia ŭ našaj krainie i paŭtarajecca štohod. Ale jość niuans. Jak paviedamlaje Minpryrody, padobnyja pierformansy niebiaśpiečnyja dla navakolnaha asiarodździa, piša Onliner.by.
«Pavietranyja šary mohuć pieraadolvać vialikija adlehłaści. Pry padzieńni jany zabrudžvajuć samyja addalenyja i niekranutyja kutki pryrody, a ich łateksavyja abałonki i polietylenavyja viaroŭki buduć vydzialać u hlebu i vadu taksičnyja rečyvy. Upaŭšy i źjedzieny žyviołaj pavietrany šar moža zabłakavać jaje kišačnik, asudžajučy žyvuju istotu pamirać ad hoładu. U stužkach i nitkach, jakimi zaviazvajuć šary, žyvioła moža zabłytacca, što časta taksama pryvodzić da jaje hibieli», — havorycca ŭ paviedamleńni viedamstva.
Zabarony zapuskać šary, viadoma ž, niama, ale ŭ Minpryrody rajać pastupić ekałahična i vybrać alternatyvu. Naprykład, raźbić novuju kłumbu na školnym dvary, pasadzić pa adnym drevie ad kłasa abo padrychtavać «kapsułu času» — pasłańnie dla budučych vypusknikoŭ, jakoje možna adkryć praz 30—50 hadoŭ.
Kamientary