Varšava znoŭ zaklikaje Minsk da zachavańnia demakratyi i pravoŭ čałavieka

Ministr zamiežnych spraŭ Polščy Radasłaŭ Sikorski čarhovym razam zaklikaŭ biełaruskija ŭłady da praviadzieńnia «sistemnych źmienaŭ u śfiery demakratyi i pravoŭ čałavieka».

«Z pavahaj i dobrazyčlivaściu my nazirajem za stanaŭleńniem biełaruskaj dziaržaŭnaści», — skazaŭ Sikorski, vystupajučy 8 krasavika ŭ polskim siejmie.

«Ale ŭ postsavieckich realijach niezaležnaść nie moža ŭmacavacca biez prasoŭvańnia demakratyi. Dekłarujučy volu da šyrokaha ŭzajemadziejańnia ź Biełaruśsiu,

my niaźmienna padšturchoŭvajem biełaruskija ŭłady da ažyćciaŭleńnia sistemnych źmienaŭ», — zajaviŭ ministr.

Pavodle słoŭ Sikorskaha, takija źmieny «pavinny achoplivać, zychodziačy z pryncypaŭ demakratyi i pravoŭ čałavieka, u tym liku prava na praviadzieńnie svabodnych schodaŭ, što asabliva tyčycca polskaj mienšaści ŭ Biełarusi».

«Čaho my i patrabujem», — padkreśliŭ kiraŭnik MZS.

***

Nahadajem, u 2005 hodzie ŭ hramadskim abjadnańni «Sajuz palakaŭ na Biełarusi» (SPB) adbyŭsia raskoł. Z taho času ŭ krainie isnujuć dva Sajuzy palakaŭ — aficyjny, zarehistravany Ministerstvam justycyi Biełarusi, i nieaficyjny, jaki padtrymlivajuć ułady Polščy.

U pačatku 2010 hoda kanflikt pamiž pradstaŭnikami SPB abvastryŭsia z‑za prava ŭłasnaści na Dom polski ŭ pasiołku Ivianiec Vałožynskaha rajona. 17 lutaha sud Vałožynskaha rajona pryniaŭ rašeńnie na karyść zarehistravanaj struktury SPB.

15 i 17 lutaha dziesiatki aktyvistaŭ nieaficyjnaha SPB byli zatrymany milicyjaj za praviadzieńnie niesankcyjanavanych akcyj pratestu, a kiraŭniki arhanizacyi paŭstali pierad sudom. Hetyja dziejańni vyklikali asudžeńnie aficyjnaj Varšavy i Jeŭrasajuza.

25 lutaha adbyłasia sustreča Radasłava Sikorskaha z Alaksandram Łukašenkam. Na joj było pryniata rašeńnie ab stvareńni dvuchbakovaj kamisii pa ŭrehulavańni kanfliktu vakoł SPB.

Pieršaje pasiadžeńnie kamisii prajšło ŭ Minsku 19 sakavika. U im uziali ŭdzieł tolki čynoŭniki dźviuch krain, pradstaŭnikoŭ hramadskaści na pasiadžeńnie nie zaprasili.

Kamientujučy vyniki, pres‑sakratar aparatu ŭpaŭnavažanaha pa spravach relihij i nacyjanalnaściej Biełarusi Michaił Rybakoŭ zajaviŭ, što ŭdzielniki sustrečy «vykazali zadavalnieńnie pazicyjami bakoŭ i namier praciahvać dyjałoh». Terminy čarhovaha pasiadžeńnia kamisii pavinny być uzhodnieny źniešniepalityčnymi viedamstvami Biełarusi i Polščy. Rybakoŭ padkreśliŭ: biełaruski bok zastajecca na svaich raniejšych pazicyjach nieŭmiašańnia dziaržavy ŭ situacyju ŭnutry Sajuza palakaŭ.

• 0
• 0
• 0
• 0
• 0
• 0
• 0
• 0