Roŭna 10 hadoŭ tamu Aleś Čarkašyn pieršym ź biełarusaŭ zahinuŭ u bajach za Ukrainu
28 žniŭnia 2015 hodu ŭ špitali ŭ Zaparožžy ad bajavych ranieńniaŭ, atrymanych na Danbasie, pamior aktyvist ź Bieraścia Aleś Čarkašyn. Jon staŭ pieršym biełarusam, jaki pakłaŭ svajo žyćcio ŭ bajach za niezaležnuju Ukrainu ŭ XXI stahodździ.
Tady išła antyterarystyčnaja aperacyja na Danbasie, kudy ŭ 2014 hodzie ŭvarvalisia rasiejskija vojski. Ciapier idzie poŭnamaštabnaja vajna Rasiei suprać Ukrainy i maštaby bajavych strat, u tym liku siarod biełaruskich hramadzian, jakija abaraniajuć Ukrainu, šmatkroć vyraśli, piša «Svaboda».
Alesia Čarkašyna zhadajuć jahonyja baćki i svajaki, adnadumcy z arhkamitetu partyi Biełaruskaja chryścijanskaja demakratyja i vierniki pratestanckaj carkvy, u jakuju jon uvachodziŭ. A taksama bajavyja pabracimy, jakija praciahvajuć vajavać z ahresaram.
«Chavajuć vajara». Hetyja słovy pravaabaronca «Viasny» ź Bieraścia Ŭładzimier Vialičkin pačuŭ na pachavańni Alesia Čarkašyna 3 vieraśnia 2015 hodu.
«Zapomniłasia, što skazaŭ heta navat nie padletak, a chłopčyk uzrostam usiaho 10, moža, 12 hadoŭ», — raspavioŭ Svabodzie Ŭładzimier Vialičkin.
Taksama pravaabaronca byŭ uražany tym, jak šmat ludziej pryjšło na raźvitańnie z Alesiem Čarkašynym. I što ŭ dvary jahonaha doma, kali vynosili trunu, ludzi stanavilisia na kaleni.
Uładzimier Vialičkin paznajomiŭsia z Alesiem Čarkašynym dvuma hadami raniej. 15 śniežnia 2013 hodu Čarkašyn zładziŭ performans, u časie jakoha pramaŭlaŭ kala hanku Bieraściejskaha abłvykankamu, abviazaŭšy ruki łancuhami i abliŭšysia čyrvonaj farbaj. U časie performansu aktyvist zaklikaŭ ułady pakajacca za svaje hrachi pierad narodam.
«Paśla akcyi Aleś pryjšoŭ da nas u ofis, čakaŭ aryštu. Mieŭ patrebu ŭ pravaabarončaj dapamozie, a bolš, vidać, u maralnaj padtrymcy, ale my adčuli, nakolki jon sam byŭ mocnym čałaviekam, zdolnym na dapamohu inšym», — zhadaŭ pravaabaronca Ŭładzimier Vialičkin.
U 2014 hodzie Čarkašyn uvajšoŭ u skład Dobraachvotnaha ŭkrainskaha korpusu «Pravaha sektaru», mieŭ pazyŭny «Taras», słužyŭ vajskovym kapelanam. 10 žniŭnia 2015 hodu Čarkašyn byŭ ciažka paranieny ŭ bai pad Biełakamienkaj na Danbasie i praź niekalki tydniaŭ pamior u špitali ŭ Zaparožžy. Dobraachvotniku było 32 hady.
Alesia Čarkašyna pachavali na mohiłkach vioski Kamianica Žyravieckaja ŭ Bieraściejskim rajonie.
Jaho paśmiarotna ŭznaharodzili medalom «Za samaachviarnaść i luboŭ da Ŭkrainy» i ordenam «Narodny hieroj Ukrainy», a taksama medalom «Pahoni», jaki ŭ 2022 hodzie zasnavała Rada BNR.
Za čas paśla pačatku poŭnamaštabnaha ŭvarvańnia Rasiei va Ŭkrainu zahinuli bolš jak 70 biełaruskich dobraachvotnikaŭ, jakija vajavali na baku Kijeva. Imiony mnohich ź ich zastajucca nieraskrytymi z pryčynaŭ biaśpieki.
Ciapier čytajuć
Na Minskim paŭmarafonie pamior 50‑hadovy biahun. Voś što viadoma pra Alaksieja Dašynieviča16
Kamientary
Usie bačyli jak pryhožyn išoŭ bieź pieraškod, a ŭ 3%naha rejtynh ta značna mieńšy)))