Novy numar «PrajdziŚvieta» pryśviačajecca tym, chto prasłaviŭsia ŭ maładości. Arciur Rembo, Džym Morysan, Łaŭkraft, polskaje paetyčnaje «pakaleńnie kałumbaŭ»…
Vyjšaŭ čaćvierty numar internet-časopisa pierakładnoj litaratury «PrajdziŚviet». Jon pryśviečany litaratury maładości — tvoram, napisanym paetami, prazaikami, dramaturhami, jakija rana kinuli pisać (jak Arciur Rembo) ci rana pajšli z žyćcia (jak zasnavalnik hurtu The Doors Džym Morysan, a taksama junackim tvoram aŭtaraŭ, žyćcio jakich nie było abmiežavanaje adnym junactvam, takim jak mistyk i pačynalnik žanru žachałak u sučasnaj masavaj kultury Łaŭkraft.
Centralnaje miesca ŭ novym numary časopisu zajmaje tvorčaść polskich paetaŭ z tak zvanaha «pakaleńnia kałumbaŭ» — Kšyštafa Kamila Bačyńskiaha, Tadevuša Baroŭskaha, Andžeja Tšebińskaha. Im ułaścivy katastrafizm śvietaadčuvańnia. Pakaleńnie kałumbaŭ viadomaje taksama jak pakaleńnie «času vichuraŭ» albo «ździejśnienaha apakalipsisu». Nazva pachodzić ad nazvy knihi Ramana Bratnaha «Kałumby. Hod 20-ty».
— Heta pakaleńnie polskich paetaŭ, čyja maładość i junactva prypali na vajnu, — raspaviadaje redaktarka «Prajdziśvietu» Kaciaryna Macijeŭskaja. — Častka ź ich nie pieražyła vajny; u vieršach jany pieratraŭlivajuć, asensoŭvajuć hetuju navału. Ale razam z tym jany prynosiać śviežaje myśleńnie, adnaŭlajuć, madyfikujuć paetyku polskaj litaratury.
Kali paraŭnoŭvać ź biełaruskaj paezijaj, to polskamu «pakaleńniu kałumbaŭ» bolš-mienš adpaviadaje pakaleńnie starejšych za ich Žyłki, Duboŭki, Marakova i Taŭbina, jakija pryščaplali biełaruskaj litaratury madernisckuju paetyku, stvarali navatarski formy i čytali nie tolki biełaruskich kłasikaŭ. Ale ž amal nichto ź ich i da vajny nie dažyŭ: mnohich pastralali ŭ 30-ch hadach, astatnich pasadzili ci vysłali.
U čaćviertym numary «Prajdziśvieta» taksama jość materyjały, pryśviečanyja pamierłamu niadaŭna Dž. D. Selindžeru (1919-2010), aŭtaru nieŭmiručaha «Łaŭca ŭ žycie» («Nad biezdańniu ŭ žycie»), hetaj encykłapiedyi padletkaŭskaha śvietaprymańnia, a taksama abiełarušanaja paema «Mcyry» viečna maładoha kłasika rasijskaj paezii Michaiła Lermantava (u pierakładzie Makara Kraŭcova).
Prezientacyja čaćviertaha numaru internet-časopisa «PrajdziŚviet» adbudziecca 29 krasavika ŭ 19.00 u «KniharniŬhalerei» (Niezaležnaści, 37A). Na joj vystupiać pierakładčyki novaha numaru i siabry redakcyi.
Kamientary