Hałoŭny musulmanin Biełarusi padaryŭ minskaj himnazii Karan. A tam jaho zapisali ŭ jaŭrei
Były dyrektar himnazii №30, a ciapier hałoŭny mufcij Biełarusi Abubiekir Šabanovič padaryŭ školnamu muzieju vydańnie Karana pa-rusku. Himnazija prailustravała padzieju iŭdziejskaj Toraj.
«Žyvaja historyja. Znajomciesia. Ekspanat muzieja bajavoj i pracoŭnaj słavy DUA «Himnazija №30 imia Hieroja Savieckaha Sajuza B.S. Akreścina. Karan u ruskim pierakładzie!» — havoryć aficyjny akaŭnt himnazii.
Paśla encykłapiedyčnaj daviedki pra Karan, pa ŭsioj bačnaści, zhienieravanaj štučnym intelektam, pryvodzicca bolš detalaŭ.
«Karan pradstaŭleny ŭ muziei ŭ ramkach ekspazicyi «Dyrektar, imiem tvaim hanarycca rodnaja škoła». Jaho pieradaŭ u dar muzieju Abu Biekir Šabanovič, jaki źjaŭlaŭsia dyrektaram škoły №65 z 1984 pa 1996 hod. Siońnia Abu Biekir — musulmanski relihijny i kulturny dziejač Respubliki Biełaruś, vykładčyk, mufcij musulman Biełarusi, łaŭreat premii «Za duchoŭnaje adradžeńnie».
Dopis supravadžajuć čatyry ilustracyi. Na pieršaj — vokładka vidavočna staroj knihi, nazva jakoj niečytelnaja.
Druhoje fota ŭžo prapanuje bližej zirnuć na tvor. Na paciortych staronkach tytulnika jaŭna bačna: «Sefier Dvarym» (kniha Druhazakońnie), zaviaršalny V tom, Tora. Miesca i hod vydańnia — Viena, 1865.
Piaciknižža Tory — heta pieršaja častka Tanacha, centralnaha relihijnaha tekstu iŭdaizmu. Jana nie maje dačynieńnia da Karana i napisana na tysiačy hadoŭ raniej. Bahasłoŭskija sprečki dy ŭzajemnaje admaŭleńnie lehitymnaści prarokaŭ i siońnia lažać u padmurku palityka-kanfiesijnaha kanfliktu pamiž jaŭrejami i musulmanami.
Treciaja ilustracyja ŭžo dakładna pierakonvaje, što na fota dakładna nie pierakładzieny na ruskuju Karan, a pisanaja na iŭrycie Tora.
Na čaćviortym fota — sam Šabanovič z sapraŭdnym Karanam u rukach.
Adkul supracoŭniki, adkaznyja za viadzieńnie instahrama, uziali fota Tory i čamu, kali ŭžo nie razabralisia z tonkaściami siemickich movaŭ, nie źviarnuli ŭvahu na sam fakt niekiryličnaha pravapisu — nieviadoma. Iraničnaści lapu dadaje fakt, što himnazija №30 imia Akreścina maje humanitarny profil i śpiecyjalizujecca na zamiežnych movach.
Himnazija zaprašaje achvotnych pahladzieć na niezvyčajny ekspanat pa papiarednim zapisie.
Kolkaść achviar vybuchu ŭ maskoŭskim elitnym restaranie na jubilei hienierała, jaki kamandavaŭ nastupam na Kijeŭ ź Biełarusi ŭ 2022-m, vyrasła da piaci čałaviek44
Kamientary