U Kitai adkazali na ŭviadzieńnie Trampam dadatkovych pošlin na kitajskija tavary
U niadzielu Kitaj nazvaŭ novyja amierykanskija pošliny ad prezidenta Donalda Trampa na kitajskija tavary kryvadušnymi, ale ŭstrymaŭsia ad uviadzieńnia novych zboraŭ na amierykanskuju pradukcyju, piša Reuters.
U piatnicu Tramp adkazaŭ na najnoŭšyja miery Piekina pa kantroli za ekspartam, uvioŭšy dadatkovyja pošliny ŭ pamiery 100% na kitajski ekspart, pryznačany ŭ ZŠA, a taksama novyja miery kantrolu za ekspartam krytyčna važnaha prahramnaha zabieśpiačeńnia da 1 listapada.
Adnoŭlenaja handlovaja napružanaść uskałychnuła Uoł-stryt, vyklikała padzieńnie akcyj bujnych technałahičnych kampanij, uschvalavała zamiežnyja kampanii, jakija zaležać ad kitajskaj vytvorčaści redkaziamielnych mietałaŭ, i moža sarvać samit pamiž Trampam i staršynioj Kitaja Si Czińpinam, zapłanavany na kaniec hetaha miesiaca.
Ministerstva handlu Kitaja ŭ svajoj zajavie adznačyła, što jaho miery kantrolu za ekspartam redkaziamielnych elemientaŭ — jakija Tramp u piatnicu nazvaŭ «dziŭnymi» i «vielmi varožymi» — byli pryniatyja paśla šerahu mier ZŠA, uviedzienych z momantu dvuchbakovych handlovych pieramovaŭ u Madrydzie ŭ minułym miesiacy.
Piekin u jakaści prykładu pryvioŭ uniasieńnie kitajskich kampanij u amierykanski handlovy čorny śpis i ŭviadzieńnie Vašynhtonam partovych zboraŭ na sudnach, źviazanych z Kitajem.
«Hetyja dziejańni surjozna nanieśli škodu intaresam Kitaja i padarvali atmaśfieru dla dvuchbakovych ekanamičnych i handlovych pieramoŭ. Kitaj ćviorda vystupaje suprać ich», — zajaviła ministerstva.
Piekin ustrymaŭsia ad dakładnaj uviazki hetych dziejańniaŭ ZŠA sa svaimi abmiežavańniami na ekspart krytyčna važnych minierałaŭ, zajaviŭšy, što jaho miery byli matyvavanyja zakłapočanaściu prymianieńniem hetych mietałaŭ z vajennymi metami va ŭmovach «častych vajennych kanfliktaŭ».
Jon taksama nie staŭ abjaŭlać ab adpaviednym zbory na amierykanski impart, jaki pastupaje ŭ Kitaj, u adroźnieńnie ad situacyi napačatku hoda, kali abiedźvie zvyšdziaržavy pastupova pavialičvali ŭzajemnyja pošliny, pakul amierykanskaja staŭka nie dasiahnuła 145%, a kitajskaja — 125%.
«Pahroza ŭvieści vysokija pošliny z nahody i bieź jaje — heta nie pravilny sposab viadzieńnia spraŭ z Kitajem. Pazicyja Kitaja ŭ dačynieńni da taryfnych vojnaŭ zaŭsiody była niaźmiennaj: my nie chočam vajavać, ale my nie baimsia vajavać», — zajavili ŭ ministerstvie, dadaŭšy, što Kitaj prymie adpaviednyja miery, kali ZŠA nie źmieniać svoj kurs.
Kamientary
Budiem s vojnoj, no pri babkach, no nie vsie i nie u vsiech.
Ničieho ličnoho - prosto BIŹNIES....