Šeść faktaŭ pra Andreja Švieda — byłoha hienprakurora, jaki ciapier staŭ staršynioj Viarchoŭnaha suda
Architektar represij Andrej Švied pabudavaŭ dom u Drazdach-2, vydaŭ knihi pra «hienacyd biełaruskaha narodu» i rašaje, kamu ź biełarusaŭ dazvolić viarnucca na radzimu.
Naradziŭsia na Paleśsi, baćka zahinuŭ u aŭtamabilnaj avaryi
Budučy hienprakuror naradziŭsia ŭ 1973 hodzie ŭ Hłuškavičach na Paleśsi.
Hetaja vioska atočanaja z troch bakoŭ Ukrainaj: navat adzinaja aŭtamabilnaja daroha z rajcentra ŭ Lelčycach prachodzić pa ŭkrainskaj ziamli. Taki kazus źjaviŭsia pry savietach, kali hranicy byli dosyć umoŭnyja. Z hetaj vioski pachodziŭ baćka Andreja Švieda Ivan — jon byŭ dyrektaram miascovaj škoły.
Tudy pa raźmierkavańni trapiła i maci hienprakurora Zinaida Budnik, jakaja naradziłasia na Mahiloŭščynie. Žančyna taksama była piedahoham i vykładała matematyku.
Dzied Andreja Švieda, Vasil, rodam z Ukrainy, z susiedniaj vioski Budki-Kamianski Rovienskaj vobłaści.
U 1970‑ch siamja Švieda płanavała pierajezd na ŭschod Biełarusi. Adna z pajezdak tudy ŭ kancy 70‑ch skončyłasia trahiedyjaj — mašyna baćki Švieda ŭrezałasia ŭ lesavoz. Mužčyna zahinuŭ, pachavali jaho na radzimie ŭ Hłuškavičach.
Maci ŭ chutkim časie ŭsio ž źjechała z tryma małymi dziećmi. Jany pasialilisia ŭ vioscy Lenina Horackaha rajona, kala samaj rasijskaj miažy.
Kiravaŭ śledčaj hrupaj paśla teraktu ŭ mietro
Švied vypusknik jurfaka BDU (skončyŭ u 1996-m), svaju karjeru pačynaŭ u prakuratury Minska. U 1998—2006 hadach prachodziŭ słužbu na roznych pasadach u Hienprakuratury.
U 2006‑2010 hadach byŭ u Radzie biaśpieki načalnikam jurydyčnaha ŭpraŭleńnia. Paśla jon pracavaŭ pieršym namieśnikam staršyni Śledčaha kamiteta, staršynioj Dziaržaŭnaha kamiteta sudovych ekśpiertyz. A 9 vieraśnia 2020 hoda Švieda pryznačyli hienieralnym prakuroram (tam jon i zastavaŭsia da 19 śniežnia 2025 hoda).
Švied uvachodziŭ u śledčuju hrupu, jakaja rasśledavała zabojstva redaktara apazicyjnaha sajta «Chartyja-97» Aleha Biabienina ŭ 2010 hodzie. A kali 11 krasavika 2011 hoda na stancyi minskaha mietro «Kastryčnickaja» zdaryŭsia vybuch, jaki zabraŭ žyćci 15 čałaviek, to Švieda pastavili kiravać abjadnanaj śledčaj hrupaj.
Maje dom u Drazdach-2
U siaredzinie 2010‑ch jon Šviedu dastałasia ziamla ŭ elitnym minskim rajonie Viaśninka, jaki nazyvajuć druhimi Drazdami. Jon tady byŭ samym małady siarod viaśninkaŭskich čynoŭnikaŭ-navasiołaŭ.
Pryčym jak siłavik, chutčej za ŭsio, jon atrymaŭ ilhotny kredyt na budaŭnictva — usiaho pad 5 pracentaŭ hadavych. U šykoŭny katedž jon pierajechaŭ sa ścipłaj kaapieratyŭnaj kvatery.
Siastra čynoŭnica, brat — u «Miedtechnacentry», syn skončyŭ jurfak BDU
Siastra Švieda — Anžeła Rajemskaja — pracuje namieśnicaj kiraŭnika Łahojskaha rajona.
Brat Aleh — namieśnik dyrektara pa finansava-ekanamičnym raźvićci «Miedtechnacentra».
U 2018 hodzie Kamitet dziaržbiaśpieki zatrymaŭ bolš za 50 biznesoŭcaŭ i ludziej sa śfiery miedycyny, u tym liku namieśnika ministra achovy zdaroŭja Ihara Łasickaha. Čynoŭniki brali chabar za stanoŭčaje vyrašeńnie pytańniaŭ zakupak aparatury i lekaŭ, a taksama pravodzili biezalternatyŭnyja tendary.
Telekanał «Biełsat» tady raskazvaŭ, što pa spravie zatrymali i Aleha Švieda, na toj čas kiraŭnika kampanii «Miedtechnacentr». U tekstavaj viersii siužeta žurnalista zrabili apisku, napisaŭšy, što za kratami apynuŭsia niepasredna siłavik. Abodva braty Šviedy tady źviarnulisia da ministra ŭnutranych spraŭ Ihara Šunieviča sa skarhaj, vynikam jakoj stała kryminalnaja sprava za paklop i pieratrus u ofisie telekanała. Aleh Švied śćviardžaŭ, što nikoli nie zatrymlivaŭsia. Sprava skončyłasia ničym.
U paźniejšych rasśledavańniach inšych žurnalistaŭ śćviardžałasia, što karjery Aleha Švieda (da kanca nulavych jon byŭ drobnym čynoŭnikam u Pietrykavie na Paleśsi, a ŭ 2011‑m raptam staŭ kiraŭnikom bujnoj dziaržaŭnaj kampanii pa miedycynskich zakupkach) paspryjaŭ Vasil Žarko.
Žonka Andreja Švieda rodam ź Lelčycaŭ.
Ich syn Kirył skončyŭ jurydyčny fakultet BDU. Abaraniaŭsia z dypłomam na temu «Daktyłaskapija: paniaćcie, pradmiet, mahčymaści». Žanaty, haduje maleńkuju dačku.
Zaniaŭsia «hienacydam biełaruskaha naroda»
U 2021 hodzie Švied zachapiŭsia idejaj «hienacydu biełaruskaha naroda».
Hienprakuratura pravodziła raskopki, apytvała žyvych śviedkaŭ vajny, patrabavała ad inšych krain kampiensacyj i abvinavačvała zachodnich čynoŭnikaŭ u chavańni nacysckich złačyncaŭ. Sam Švied za paru hadoŭ napisaŭ niekalki knih pa hienacydzie, za što navat atrymaŭ litaraturnuju ŭznaharodu. Vyhladaje, što hetaja sprava była inicyjatyvaj asabista hienprakurora, kab pasprabavać źviazać historyju z palitykaj. Navat na vokładku svajoj knihi jon pastaviŭ fota «Našaj Nivy» z pratestaŭ žniŭnia 2020 hoda.
Dajšło i da sudoŭ nad pamierłymi. Naprykład, asudzili Uładzimira Katruka — ukrainca, jakoha nie stała ŭ 2015-m, pryznali vinavatym u spaleńni Chatyni.
Akramia taho, Andrej Švied padličyŭ škodu, jakuju nanieśli Biełarusi za hady Druhoj suśvietnaj. Heta 43 z pałovaj tysiačy ton zołata, albo 2 tryljony 300 miljardaŭ dalaraŭ.
Rašaje, kamu ź biełarusaŭ možna viarnucca na radzimu
Švied byŭ aktyŭnym praciŭnikam vyzvaleńnia palitviaźniaŭ. Ź jahonaj zhody amnistyi, jakija mieli miesca paśla 2020 hoda, palityčnych asudžanych praktyčna nie zakranuli.
U 2023 hodzie Andrej Švied uznačaliŭ tak zvanuju kamisiju pa viartańni — kalektyŭny orhan z čynoŭnikaŭ i prapahandystaŭ, stvorany dla razhladu zajaŭ biełarusaŭ, jakija źjechali z krainy praź pieraśled i chočuć viarnucca.
Kamisija zajaŭlała, što za ŭvieś hety čas da ich pastupiła 323 zvaroty. 70 jany razhledzieli pa spravie, 30 čałaviekam dazvolili viarnucca. Praŭda, na niekatorych z tych viarnuŭšychsia paśla zaviali kryminalnuju spravu.
Kamientary
[Zredahavana]