U Minsku 17 maja projduć sudy nad udzielnikami niesankcyjanavanaha hiej‑šeścia, jakoje adbyłosia ŭ subotu na vulicy Surhanava.
Zatrymanyja ŭdzielniki šeścia byli dastaŭleny spačatku ŭ Pieršamajskaje RUUS, a zatym u Centr izalacyi pravaparušalnikaŭ na vulicy Akreścina.
Pavodle infarmacyi adnaho z arhanizataraŭ akcyi Siarhieja Androsienki, udzielnikam šeścia pieradadzieny ježa, ciopłaje adzieńnie i inšyja rečy.
Padčas razhonu było zatrymana vosiem čałaviek, u tym liku dva žychary Sankt‑Pieciarburha.
Pra zatrymańnie rasijskich hramadzian paviedamlena ŭ pasolstva RF u Minsku. Usiaho ŭ šeści ŭziali ŭdzieł prykładna 30 čałaviek.
Sam Androsienka i jašče try ŭdzielniki hiej‑prajda byli dastaŭleny ŭ Savieckaje RUUS. «Paśla zakančeńnia akcyi my abiedali ŭ restaranie «Lido», da nas padsieŭ supracoŭnik pravaachoŭnych orhanaŭ i prapanavaŭ vyjści praz słužbovy ŭvachod, zajaviŭšy, što našamu žyćciu pahražaje niebiaśpieka», — skazaŭ Androsienka.
Pavodle jaho słoŭ, supracoŭnikaŭ milicyi cikaviła infarmacyja, źviazanaja z hiej‑prajdam. Usich čatyroch sfatahrafavali i źniali na videakamieru, uziali adpiačatki palcaŭ. Praz try hadziny ich adpuścili biez składańnia pratakołaŭ.
Androsienka zajaviŭ, što ŭ centry horada byli zaŭvažany skinchiedy, niekatoryja ź ich zatrymany.
U HUUS Minharvykankama paviedamili, što niekalki čałaviek byli dastaŭleny ŭ milicyju dla vyśviatleńnia asoby. U milicyi ŭvažliva pastavilisia da infarmacyi, što ahresiŭna nastrojenyja hramadzianie mohuć arhanizavać pravakacyju, zaznačyli ŭ HUUS. Baki ŭdałosia raźvieści pa časie i miescy.
Minski harvykankam zabaraniŭ hiej‑prajd, udzielniki jakoha płanavali sabracca kala budynka Biełdziaržfiłarmonii i prajści pa praśpiekcie Niezaležnaści da prezidyuma Nacyjanalnaj akademii navuk.
14 maja «Mižnarodnaja amnistyja» vykazała škadavańnie ŭ suviazi z zabaronaj Minharvykankamam šeścia i zaklikała biełaruskija ŭłady pavažać pravy sieksualnych mienšaściej.
Ciapier čytajuć
Azaraŭ mocna pakryŭdziŭsia na słovy «psieŭdalidarki Cichanoŭskaj», što jaho Płan Pieramoha byŭ pamyłkaj29
Kamientary