MUS: Pry pieratrusie ŭ «Havary praŭdu» kanfiskavanaja zbroja, narkotyki

Sutnaść spravy: ministerstva raspačało kryminalnuju spravu suprać drukarni, što publikavała materyjały apazicyi.

Na sajcie Ministerstva ŭnutranych spraŭ siońnia źjaviŭsia kamientar adnosna zaviadzieńnia kryminalnaj spravy ŭ dačynieńni da aktyvistaŭ hramadskaj kampanii «Havary praŭdu».

Nahadajem, pieratrusy na minskich i rehijanalnych ofisach prajšli 18 maja, a Uładzimir Niaklajeŭ (staršynia inicyjatyvy), Siarhiej Vaźniak i Andrej Dźmitryjeŭ na try dni trapili za kraty

U paviedamleńni MUS havorycca:

Leninski RUUS h.Minska zaviedziena kryminalnaja sprava № 10011021318 pa č. 1 art. 250 KK Respubliki Biełaruś «Raspaŭsiud iłžyvaj infarmacyi ab tavarach i pasłuhach» u dačynieńni da kiraŭnictva vydavieckaj firmy TAA «Diksend».

Padstavaj dla zaviadzieńnia kryminalnaj spravy stali vyniki pravierki pavodle zajavy ŭ orhany ŭnutranych spraŭ Respubliki Biełaruś, što pastupiła 29 krasavika 2010 hoda ad uładalnikaŭ tavarystva z abmiežavanaj adkaznaściu

ab niezakonnym vykarystańni handlovaj nazvy, jurydyčnaha adrasu i inšych dadzienych ich firmy na drukavanaj pradukcyi TAA «Diksend».

U chodzie praviadzieńnia apieratyŭna‑śledčych dziejańniaŭ było ŭstanoŭlena, što drukavanaja pradukcyja vyrablałasia TAA «Diksend» pa zamovie kiraŭnikoŭ ruchu «Napierad» i hramadzianskaj kampanii «Havary praŭdu» U. Niaklajeva i S. Vaźniaka. Akramia faktaŭ parušeńniaŭ zakanadaŭstva ź ich boku, što nasili masavy i sistematyčny charaktar, byli vyjaŭlenyja inšyja parušeńni, datyčnyja finansavaj dyscypliny pradpryjemstva.

Vynikam praviadzieńnia nieadkładnych śledčych dziejańniaŭ stała kanfiskacyja ź niezakonnaha abarotu 2 adzinak ahniastrelnaj zbroi, 39 patronaŭ roznaha kalibru, 6 adzinak chałodnaj zbroi, a taksama narkatyčnaha rečyva raślinnaha pachodžańnia.

Zaraz padraździaleńniami pa baraćbie z ekanamičnaj złačynnaściu HUUS Minharvykankama sumiesna z zacikaŭlenymi viedamstvami pravodzicca kompleks mierapryjemstvaŭ, nakiravanych na vyjaŭleńnie i dakumientacyi supraćpraŭnaj dziejnaści nazvanych asob, aceńvajecca škoda, naniesienaja dziaržavie, a taksama intaresam kamiercyjnaj firmy.

***

Jak paviedamiŭ u kamientary Jeŭraradyjo Siarhiej Vaźniak, patrony sapraŭdy byli, ale nie bajavyja.

«Mnie tolki viadoma, što ŭ Niaklajeva byli znojdzienyja i kanfiskavanyja pry pieratrusie budaŭničyja patrony. Bolš mnie ničoha nieviadoma... U mianie doma kanfiskavali pry pieratrusie tolki sistemny błok kampjutara majho syna i dźvie fłeški majho syna. Pra narkotyki ničoha nie viedaju, nie čuŭ».

Što da nazvy firmy na pradukcyi kampanii, to sp.Vaźniak zajaviŭ, što nidzie nie bačyŭ hetaj nazvy, chacia bačyŭ usiu drukavanuju pradukcyju kampanii «Havary praŭdu!»

• 0
• 0
• 0
• 0
• 0
• 0
• 0
• 0