Łukašenka niezadavoleny vice-premjerkaj Natallaj Piatkievič — «buksuje»
Alaksandr Łukašenka vykazaŭ niezadavolenaść pracaj vice-premjerki pa sacyjalnych pytańniach Natalli Piatkievič, adznačyŭšy, što jana «buksuje» ŭ pryniaćci važnych rašeńniaŭ.
Padčas spravazdačy ŭrada za 2025 hod Łukašenka zapatrabavaŭ nieadkładna skaracić kolkaść lišnich dziaržaŭnych struktur, jakija nazvaŭ «biudžetnymi prysoskami». Na dumku Łukašenki, takija arhanizacyi słužać tolki miescam dla ŭładkavańnia byłych čynoŭnikaŭ i nie prynosiać karyści ekanomicy.
«Pahladzicie, čym zahružany śpiecyjalisty pa naličeńni roznych dapamoh, stypiendyj i piensij, — pryvioŭ adzin z prykładaŭ Łukašenka. — Haniajuć ludziej za kučaj daviedak, jakija i tak daŭno jość u dziaržaŭnych sistemach, i atrymać ich možna na miescy pa adnym zapycie. Tolki na piensijnuju sistemu pracuje paŭtary sotni arhanizacyj i bolš za 4 tysiačy čałaviek. Źbirajecie ŭ čerhach piensijanieraŭ, kab zajavu ab čarhovym pieraraźliku z ruk u ruki pryniać. U krainie paŭmiljona pracujučych piensijanieraŭ. Kali im chadzić pa vašych kabinietach? Dzie vaša chvalonaja ličbavizacyja?»
Jon pastaviŭ pazbavicca «ad niezrazumiełych arhanizacyj, struktur i biurakrataŭ».
U hetaj spravie, pavodle jaho słoŭ, buksuje ŭžo treci vice-premjer — Natalla Piatkievič paśla Ihara Pietryšenki i Uładzimir Karanika, «nie prymajučy rašeńniaŭ tam, dzie imhnienny žyvy efiekt dla biudžetu».
Łukašenka havoryć, što hatovy razhledzieć prapanovy pa aptymizacyi sistemy dziaržaŭnych orhanaŭ. Ale tyja prapanovy, što prynosiać, jaho nie zadavalniajuć.
Naprykład, jaki raz hučyć prapanova rasfarmiravać Ministerstva žyllova-kamunalnaj haspadarki, dałučyŭšy jaho da Minbudarchitektury. Adnak Łukašenka sumniavajecca, što heta metazhodna, asabliva z ulikam taho, što značnaja častka skarhaŭ z boku nasielnictva datyčycca prablem u ŽKH, a «kolkaść rabotnikaŭ ministerstva davoli nievialikaja, usiaho niekalki dziasiatkaŭ čałaviek, i jaho likvidacyja nie daść istotnaha efiektu ŭ ekanomii srodkaŭ», cytuje jaho Biełta.
Natalla Piatkievič na praciahu mnohich hadoŭ zajmała klučavyja pasady viertykali ŭłady — ad pres-sakratarki Łukašenki da pieršaj namieśnicy kiraŭnika jaho Administracyi. Paśla praciahłaha pierapynku ŭ karjery i žyćcia ŭ ZŠA, dzie pracavaŭ jaje muž-dypłamat Valancin Rybakoŭ, Piatkievič viarnułasia ŭ biełaruskuju palityku ŭ 2024 hodzie, a ŭ mai 2025‑ha ŭznačaliła sacyjalny błok urada ŭ jakaści vice-premjerki.
Ciapier čytajuć
Koŭł Łukašenku: Tabie treba być bolš aściarožnym, za stałom kiepskich pacanoŭ zastaŭsia adzin ty10
Kamientary