«Hladžu na tvaje dziejańni i pytajusia siabie: kudy dzieŭsia toj Viktar?» Viktar Juščanka napisaŭ adkryty list da Viktara Orbana
Były prezident Ukrainy Viktar Juščanka źviarnuŭsia z adkrytym listom da premjer-ministra Vienhryi Viktara Orbana, nahadaŭšy jamu tyja časy, kali jon mieŭ inšaje palityčnaje abličča, i prykłaŭšy sumiesny zdymak z kanca 1990‑ch hadoŭ.
«Viktar, pahladzi na hety fotazdymak.
My staim pobač u toj čas, kali budučynia našaha rehijona zdavałasia nam ahulnaj, zrazumiełaj i śvietłaj. Tady my razam vieryli, što svaboda — heta nie prosta słova, a najvyšejšy dar, za jaki treba zmahacca. Ja pamiataju ciabie inšym. Ja pamiataju lidara, jaki razumieŭ canu hodnaści i viedaŭ, što takoje vyzvaleńnie ad impierskaha pryhniotu.
Siońnia ja hladžu na tvaje dziejańni i pytajusia siabie: kudy dzieŭsia toj Viktar? Jak atrymałasia, što čałaviek, jaki bačyŭ naradžeńnie volnaj Vienhryi, ciapier padyhryvaje siłam, jakija imknucca źniščyć svabodu susieda?
Ukraina siońnia sychodzić kryvioj za tyja samyja kaštoŭnaści, pra jakija my kaliści dyskutavali za stałom pieramoŭ. My abaraniajem nie tolki svaju ziamlu, my abaraniajem spakoj i tvajoj krainy, jak i ŭsioj Jeŭropy.
Palityka — heta nie tolki ličby, vyhada ci haz. Heta pierš za ŭsio kaštoŭnaści. Kali ty vybiraješ bok ahresara, ty zdradžvaješ nie tolki Ukrainie — ty zdradžvaješ pamiaci ŭłasnaha naroda, jaki viedaje, što takoje savieckija tanki na vulicach Budapiešta.
Viktar, spynisia i zhadaj, kim ty byŭ. Historyja — surovy sudździa. Jana nie prabačaje tych, chto maŭčaŭ abo dapamahaŭ złu ŭ časy vialikich vyprabavańniaŭ. Jašče nie pozna viarnucca da śviatła, da sapraŭdnaha jeŭrapiejskaha braterstva, dzie šanujuć honar, a nie sumnieŭnyja palityčnyja pahadnieńni.
Zaklikaju ciabie zirnuć u vočy praŭdzie. Budź tym lidaram, jakoha kaliści pavažaŭ śviet i jaki viedaŭ, što svaboda — heta adziny šlach», — piša Juščanka.
U 1999 hodzie, kali rabiŭsia hety zdymak, Viktar Orban uznačalvaŭ vienhierski ŭrad (pieršy jaho prychod va ŭładu byŭ u 1998‑2002 hadach), a Viktar Juščanka kiravaŭ Nacyjanalnym bankam Ukrainy.
«Trajanski koń» Pucina. Chto taki Viktar Orban i čyj bok jon sapraŭdy zajmaje?
Orban zajaviŭ, što ŭkraincy nibyta pahražajuć jahonaj siamji VIDEA
U Vienhryi apazicyjnaja Orbanu partyja rekordna pavialičyła adryŭ pierad vybarami
Vienhryja nie razbłakuje pryniaćcie 20‑ha pakieta sankcyj da adnaŭleńnia pracy trubapravoda «Družba»
Ciapier čytajuć
Koŭł Łukašenku: Tabie treba być bolš aściarožnym, za stałom kiepskich pacanoŭ zastaŭsia adzin ty10
Kamientary