«Nie davajcie nikomu nazyvać vas ahresarami susiedniaj krainy». Staršynia Rady BNR pavinšavała biełarusaŭ z Dniom Voli

«25 sakavika 1918 hoda naš narod, paśla amal paŭtara stahodździa niavoli, abviaściŭ śvietu, što jon «skidaje z rodnaha kraju apošniaje jarmo dziaržaŭnaj zaležnaści, jakuju hvałtam nakinuli rasijskija cary na naš volny i niezaležny kraj». Chaču nahadać tut, što naš nacyjanalny hieroj Kastuś Kalinoŭski ŭžo paŭstahodździa raniej papiaredžvaŭ naš narod, što žyć svabodna jon budzie tolki tady, kali maskala nad im nie budzie. Hetyja słovy naša historyja paćviardžaje», — adznačajecca ŭ vinšavańni biełarusaŭ z Dniom Voli.

Pavodle jaje, mienavita balšavickaja Rasija patapiła ŭ kryvi niezaležnaść Biełaruskaj Narodnaj Respubliki. «Mienavita z Maskvy išli zahady na źniščeńnie ŭ Kurapatach nacyjanalnaj tvorčaj i navukovaj elity, na likvidacyju pracavitaha sialanstva. Pamknieńni biełarusaŭ da svabody i niezaležnaści svajho kraju niaźmienna dušylisia. Nam davodziłasia ciarpieć i fizičny, i duchoŭny Čarnobyl. A niadoŭhi čas nacyjanalnaha Adradžeńnia byŭ spynieny staŭlenikam Maskvy Łukašenkam», — adznačyła Ivonka Surviła.

«Na žal, paśla amal stahodździa akupacyi i chitraj prapahandy z boku toj samaj Maskvy śviet zabyŭsia pra biełarusaŭ, pakul naš narod nie nahadaŭ jamu ŭ 2020 hodzie pra naša isnavańnie! Tolki dziakujučy vašamu hieraizmu i advazie sotniaŭ tysiač biełarusaŭ, jakija vyjšli pad bieł-čyrvona-biełymi ściahami na vulicy Biełarusi, my adžyli! Kali b znoŭ nie ŭmiašałasia Maskva, mahčyma, my ŭžo žyli b u našym volnym krai. I nie zmahalisia b siońnia za vyzvaleńnie tysiač palityčnych viaźniaŭ, jakija ŭsio jašče znachodziacca za kratami ŭ Biełarusi», — skazała staršynia Rady BNR.

Pavodle jaje, biełarusy nie pavinny dazvalać adviečnym voraham ździekavacca ź siabie tolki tamu, što heta vyhadna adnamu čałavieku.

«Nie davajcie nikomu nazyvać vas ahresarami susiedniaj krainy. My stary jeŭrapiejski narod, naša miesca ŭ demakratyčnaj Jeŭropie, i tolki tady, kali my staniem niezaležnymi ad tak zvanaha «starejšaha brata», — tolki tady my zojmiem toje pačesnaje miesca pamiž cyvilizavanymi narodami śvietu, na jakoje my majem poŭnaje prava! Chočacca vieryć, što tady ni Maskva, ni teror nie zahaściać toj pachodni, jakuju my budziem nieści ščylnymi radami napierad», — zaklikała Ivonka Surviła.

«Prašu tych z vas, chto jašče nie dałučyŭsia da zmahańnia za volu i niezaležnaść Baćkaŭščyny, pamiatać, što budučynia naša zaležyć ad kožnaha i kožnaj z nas. Tak, jak našy prodki ŭ 1918 hodzie, razam my vyzvalim naš miły i čaroŭny kraj», — dadała staršynia BNR.

• 5
• 0
• 0
• 2
• 0
• 0
• 0
• 2