Što ŭmieje novy Lego? Pahulali ŭ jaho, kab zrazumieć, ci zmoža jon zamianić dzieciam smartfony
Kampanija Lego nie pakidaje sproba adarvać dziaciej ad ekranaŭ hadžetaŭ, prapanoŭvajučy novy hibrydny farmat hulni. My vyprabavali inavacyjnuju sistemu Smart Play na prykładzie dvuch fłahmanskich naboraŭ pa suśviecie «Zornych vojnaŭ» — źniščalnik Darta Vejdera i kamplekt X-Wing Luka Skajuokiera. Raskazvajem, jak pracujuć «razumnyja kubiki», ci realistyčnyja kaśmičnyja bai na stale i čamu da ideału tut pakul daloka.
Elektronika ŭnutry płastyka: jak heta pracuje
Pad kapotam novaj liniejki lažyć tak zvany «razumny kubik» (Smart Brick), jaki ŭbudoŭvajecca ŭnutr kožnaha karabla. Ironija losu ŭ tym, što całkam pazbavicca ad smartfonaŭ usio adno nie atrymajecca: sistemie patrabujecca padklučeńnie praz Bluetooth da admysłovaj prahramy Lego Smart Assistant.
Mienavita tudy ściahvajucca ŭsie danyja dla abnaŭleńnia prašyŭki i tam ža rehulujecca hučnaść efiektaŭ.
Pry hetym sami nabory mocna adroźnivajucca napaŭnieńniem:
- U źniščalniku Darta Vejdera (75421) jość tolki adna interaktyŭnaja fihurka. Aŭtanomnaja harmata, jakaja idzie ŭ kamplekcie i stralaje čyrvonymi detalkami, nijak nie źviazanaja z ahulnaj elektronikaj i sistema na jaje nie reahuje.
- U kamplekcie X-Wing Luka Skajuokiera (75423) interaktyŭnych elemientaŭ užo niekalki, što robić supolnuju hulniu kudy bolš dynamičnaj.
U Polščy jany trochu patańnieli i kaštujuć 218 złotych (51 jeŭra) suprać 290 złotych (68 jeŭra) na starcie za karabiel Darta Vejdera i 290 złotych (68 jeŭra) suprać 399 złotych (92 jeŭra) za X-Wing.
U Biełarusi koštny na ich kaśmičnyja. Nabor X-Wing Luka (75423) kaštuje 489,9 rubla (prykładna 152 jeŭra), a źniščalnik TIE Darta Viejdera (75421) — 389,9 rubla (kala 121 jeŭra).
Kaśmičny boj pa-novamu i prablemy z prycelvańniem
Sama sistema bajoŭ pamiž zorkalotami pabudavanaja na akustyčnych i sensarnych efiektach. Pry naciskańni na knopku stralby karabiel vydaje firmovy huk łaziera, a kali pobač znachodzicca praciŭnik, jamu zaličvajecca traplańnie. Paśla sieryi ŭdaraŭ uklučajecca sirena tryvohi, jakaja zakančvajecca hukam vybuchu — heta aznačaje, što karabiel «źniščany».
Hałoŭny minus testavańnia: zajaŭlenaja vytvorcam funkcyja «prycelnych strełaŭ» na adlehłaści da 80 santymietraŭ pakul pravalvajecca. Našy testy pakazali, što sistema reahuje na luboje naciskańnie knopki ŭ peŭnym radyusie niezaležna ad taho, kudy nakiravanaja rula karabla.
Demanstracyja stralaniny — niezrazumieła, ci buduć heta vypraŭlać
Miechaniki ramontu i dazapraŭki: hulnia na vyžyvańnie
Kab pahłybić hiejmpłej, raspracoŭniki dadali miechaniki pačynki i dazapraŭki, jakija simulujuć kiravańnie kaśmičnymi resursami.
Praŭda, tołku na praktycy ad hetaha niašmat: jak pakazali praktyčnyja testy, ličylnik paškodžańniaŭ karabloŭ abnulajecca adrazu paśla virtualnaha vybuchu niepasredna na uzroŭni kubika, to-bok možna pačakać paru siekundaŭ paśla «vybuchu» i hulać dalej.
Vierdykt
U vyniku Lego stvaryła cikavuju, ale pakul syruju cacku.
Dla dziaciej heta vydatny šaniec pabiehać z płastykavymi karablami ŭ rukach zamiest taho, kab hladzieć u ekran. Tydzień-druhi dziciaci dakładna budzie cikava. Zastajecca tolki spadziavacca, što prablemy z dakładnaściu strełaŭ vypraviać u najbližejšych abnaŭleńniach prašyŭki, a taksama dadaduć novyja funkcyi.
A voś dla darosłych kalekcyjanieraŭ heta supiarečlivy pradukt: praz pamiery «razumnaha kubika» kłasičnyja praporcyi X-Wing i TIE-Fighter pryjšłosia krychu źmianić u bok pavieličeńnia fiuzielaža. Da taho ž jany kaštujuć stolki ž, kolki inšyja bolš detalizavanyja i trochu bolšyja madeli, ale biez razumnych kubikaŭ.
«Naša Niva» — bastyjon biełaruščyny
PADTRYMAĆ
Kamientary