U Muziei volnaj Biełarusi nieŭzabavie pačynaje pracu prajekt «Dudy: muzyka minułaha i sučasnaści», padrychtavany da ahulnavaršaŭskaj prahramy Nočy muziejaŭ-2026. U prahramie — vystava, interaktyŭnaja «Dudarskaja majsternia», dudarski open-air, piša «Budźma».
Prajekt pryśviečany dudam — muzyčnamu instrumientu, jaki stahodździami farmiravaŭ muzyčnaje abličča Jeŭropy. Dudarskaja tradycyja ŭ Biełarusi była pierarvanaja ŭ siaredzinie XX st., ale z 1980‑ch paśpiachova adrodžanaja niekalkimi pakaleńniami entuzijastaŭ. Prajekt demanstruje biełaruskija dudy ŭ centralna-jeŭrapiejskim kantekście i ŭklučaje praviadzieńnie tematyčnaj vystavy i kancert-adkryćcio z tancavalnaj viečarynaj pad dudy.
Pra vystavu
Vystava «Dudy: instrumient, historyja, simvał» zaprašaje prasačyć šlach biełaruskaj dudy ad sialanskaha instrumienta da mahutnaha nacyjanalnaha simvała, ad viaskovaj karčmy da markietynhavych kampanij mižnarodnych brendaŭ, ad pradmieta pobytu da mistyčnaha litaraturnaha vobraza, ad mifa da praktyčnaha adradžeńnia.
Ekspazicyja pabudavana na kantraście pamiž histaryčnaj praŭdaj pra aŭtentyčnaha viaskovaha muzyku i nacyjanalnym ramantyčnym naratyvam, stvoranym intelihiencyjaj u XIX—XX stahodździach, jaki pieratvaryŭ dudara ŭ praroka i nacyjanalnaha vieščuna. Sercam vystavy źjaŭlajecca kalekcyja realnych biełaruskich i polskich dudaŭ. Urešcie, vystava davodzić hałoŭny paradoks historyi: mienavita hety ramantyčny mif uratavaŭ dudu ad źniknieńnia i daŭ joj novaje žyćcio ŭ sučasnaści, dzie jana nie tolki viarnułasia na tancavalnyja viečaryny, ale i nabyła simvaličnuju rolu, pry tym pa abodva baki sučasnaj biełaruskaj palityčnaj barykady.
16 maja a 16:00 adbudziecca aficyjnaje adkryćcio prajektu z prezientacyjaj vystavy dla ŚMI, hanarovych haściej i naviedvalnikaŭ muzieja.
Taksama ŭ prahramie zapłanavanyja:
- kuratarskija ekskursii a 18:00 i a 20:00 z muzykam i daśledčykam dudarskaj tradycyi Jaŭhienam Baryšnikavym;
- interaktyŭnaja «Dudarskaja majsternia», jakaja budzie pracavać uvieś čas vystavy
- Hałoŭnaj padziejaj Nočy muziejaŭ stanie načny dudarski open-air a 23:00 z udziełam biełaruskich i polskich muzykaŭ. U dvoryku muzieja razhorniecca žyvy kancert dudaroŭ — huk staražytnaha instrumienta zapoŭnić prastoru, a noč pieratvorycca ŭ ahulny taniec pad adkrytym niebam.
Dzie i kali?
Aficyjnaje adkryćcio prajektu «Dudy: muzyka minułaha i sučasnaści» adbudziecca 16 maja a 16:00 pa adrasie: Varšava, ul. Foksal 11.
Kamientary