Arhiencinski horad «na krai śvietu» admaŭlaje, što źjaŭlajecca krynicaj chantavirusa
Ušuaja, samy paŭdniovy horad Arhienciny, karystajecca reputacyjaj «kraju śvietu» i bramy dla ekśpiedycyj u Antarktydu. Adnak u apošnija dni horad sutyknuŭsia ź inšaha kštałtu rozhałasam: zdahadkaj, što mienavita jon moža być nulavym punktam uspyški chantavirusa na hałandskim sudnie MV Hondius.
Kruizny łajnier ciapier staić na jakary na ispanskich Kanarskich astravach, a pasažyry byli evakujavanyja i adpraŭlenyja dadomu samalotami. Padarožža MV Hondius pačałosia 1 krasavika kala 10 tysiač kiłamietraŭ ad Ušuai, što ŭ pravincyi Vohniennaja Ziamla. Na borcie znachodzilisia 114 pasažyraŭ i 61 člen ekipaža z 22 krain.
Choć ličycca, što virus trapiŭ na bort mienavita tam, jaho dakładnaja krynica zastajecca pa-raniejšamu nieviadomaj, piša BBC. Adna z teoryj śviedčyć, što pasažyr moh zarazicca na śmietniku na ŭskrainie Ušuai, dzie turysty časta nazirajuć za ptuškami i dzie adchody pryciahvajuć hryzunoŭ.
Adnak miascovyja ŭłady nie pryniali hetuju viersiju. «Na Vohniennaj Ziamli za ŭsiu historyju ŭ nas nie było nivodnaha vypadku chantavirusa», — zajaviŭ Chuan Fakunda Pietryna, hałoŭny epidemijołah pravincyi. Jon padkreśliŭ, što endemičnaja zona virusa znachodzicca bolš čym za 1500 km na poŭnač.
«Pa-pieršaje, u nas niama padvidu myšy daŭhachvostaj [jakaja pieranosić chvarobu], i my nie majem tyja ž klimatyčnyja ŭmovy, što i paŭnočnaja Patahonija — ni ŭ płanie vilhotnaści, ni ŭ płanie tempieratury — jakija b spryjali jaho raźvićciu, — skazaŭ jon. — A kali b hryzuny pačali pieramiaščacca — pakolki jany nie pavažajuć hieahrafičnych miežaŭ — varta pamiatać, što my źjaŭlajemsia vostravam».
Dla pravincyi heta pytańnie nie tolki navuki, ale i ekanomiki. Turyzm — istotnaja krynica dachodu, i bolš za 95% sudnaŭ, što iduć u Antarktydu, vychodziać mienavita z hetaha porta.
Pakul aficyjnych admien kruizaŭ niama, i žyćcio ŭ porcie idzie svaim paradkam.
Orhany achovy zdaroŭja ŭsio jašče sprabujuć vyznačyć, dzie adbyłosia zaražeńnie. Jany miarkujuć, što para niderłandcaŭ, što zarazilisia virusam i pamierli, byli, imavierna, nulavym pacyjentam.
Čynoŭniki adnaŭlajuć ich maršrut praz Arhiencinu, Čyli i Uruhvaj pierad pasadkaj na karabiel va Ušuai.
Kamientary