Rasija biła pa Kijevie rakietami i dronami. Abvaliŭsia padjezd šmatpaviarchovika
U noč na čaćvier Rasija naniesła pa Kijevie kambinavany ŭdar dronami i rakietami. U Darnickim rajonie ŭkrainskaj stalicy akazałasia razburana cełaja siekcyja žyłoha doma, pad zavałami mohuć znachodzicca ludzi, paviedamlajuć ułady.
Ułady pišuć, što ŭ vyniku ŭdaraŭ zahinuŭ pa mienšaj miery adzin čałaviek, 16 atrymali ranieńni, piša Bi-bi-si.
Načny abstreł rušyŭ uśled za adnym z samych masiravanych udaraŭ dronami pa Ukrainie: na praciahu dnia 13 maja rasijskija vajskoŭcy vypuścili kala 900 dronaŭ, u niekalkich rehijonach krainy zahinuli pa mienšaj miery šeść čałaviek.
Nočču ŭ telehram-kanale Pavietranych sił źjavilisia paviedamleńni ab mnostvie rakiet i dronaŭ, jakija laciać u napramku Kijeva i Kijeŭskaj vobłaści, a taksama kala Čarkas i ŭ Pałtaŭskaj vobłaści.
U liku inšaha pa ŭkrainskaj stalicy nanosiŭsia ŭdar balistyčnymi rakietami, paviedamlałasia ab hučnych vybuchach.
Zatym pačała pastupać infarmacyja ab padzieńni abłomkaŭ rakiet i razbureńniach u Kijevie, u tym liku ab pažarach u žyłych damach.
Kiraŭnik Kijeŭskaj haradskoj vajennaj administracyi Cimur Tkačenka paviedamiŭ, što ŭ vyniku rasijskaha ŭdaru ŭ Darnickim rajonie byŭ paškodžany žyły dom. «Adbyłosia abvalvańnie kanstrukcyj. Pad zavałami jość zabłakavanyja ludzi», — piša Tkačenka.
Jon nie ŭdakładniŭ, jakim mienavita vidam zbroi byŭ naniesieny ŭdar pa domu.
Pa słovach mera Kijeva Vitala Kličko, praciahvajecca pošukava-vyratavalnaja apieracyja na miescy zdareńnia.
Na apublikavanych fatahrafijach vidać, jak ratavalniki vynosiać z-pad abłomkaŭ pa mienšaj miery adnaho paranienaha čałavieka.
Ukrainskaja Dziaržaŭnaja słužba pa nadzvyčajnych situacyjach paviedamiła, što z paškodžanaha šmatpaviarchovaha žyłoha doma ŭ Darnickim rajonie Kijeva vyratavany 10 čałaviek, adnak raboty na miescy zdareńnia praciahvajucca.
Kiraŭnik Kijeŭskaj haradskoj vajennaj administracyi Cimur Tkačenka piša, što ŭ vyniku načnoha ŭdaru pa Kijevie pa mienšaj miery adzin čałaviek zahinuŭ, a 16 atrymali ranieńni.
Tym časam Pavietranyja siły USU papiaredžvajuć, što ŭ napramku Kijeva lacić pa mienšaj miery jašče adna rakieta.
Nie spyniajucca taksama paviedamleńni ab bieśpiłotnikach, jakija nabližajucca da ŭkrainskaj stalicy i inšych haradoŭ.
Pavietranaja tryvoha ŭ Kijevie i niekalkich inšych rehijonach Ukrainy praciahvajecca.
Ciapier čytajuć
Kala Safii ŭ Połacku pastavili pomnik lotčykam Ničyparčyku i Kukanienku. Ale navat nie samalot toj madeli, na jakoj jany zahinuli, a aerapłan stalinskaha času2020
Kamientary
A mahli ŭłupić pa krasnaj płoščy na tyja ž hrošy.
Chto tam viedaje, moža i putler, biehučy ŭ schovišča, začapiŭsia i hałavu b sabie raźbiŭ.