Jak Izrail mietadyčna likviduje kožnaha ŭdzielnika napadu 7 kastryčnika — navat kiroŭcu traktara, jaki prarvaŭ pamiežnuju aharodžu

7 kastryčnika 2023 hoda CHAMAS ździejśniŭ maštabny napad na Izrail: uzbrojenyja hrupy prarvali miažu ź siektara Haza i atakavali vajskovyja abjekty, harady i kibucy na poŭdni krainy. U vyniku zahinuli kala 1 200 čałaviek u Izraili, a prykładna 250 byli vykradzienyja i vyviezienyja ŭ Hazu jak zakładniki, što stała tryhieram dla pačatku vajny Izraila suprać CHAMASa ŭ Hazie.

Jak piša WSJ, paśla taho jak izrailskija śpiecsłužby nie zdoleli praduchilić ataku 7 kastryčnika, supracoŭniki raźviedki źviarnulisia da kiraŭnika ŭnutranaj słužby biaśpieki Izraila «Šyn-Bet» z prapanovaj stvaryć asobnuju hrupu dla palavańnia na ŭdzielnikaŭ napadu.

Jaje nazvali NILI — heta abrevijatura frazy na iŭrycie «Viečny Boh Izraila nie chłusić». Nazva adsyłaje da jaŭrejskaj špijonskaj sietki časoŭ Pieršaj suśvietnaj vajny i pavinna była padkreślić: nichto z napadnikaŭ nie budzie zabyty.

Pavodle infarmacyi WSJ, u asnovu hetaj stratehii pakładzieny dośvied izrailskich ahientaŭ paśla Alimpijady ŭ Miunchienie 1972 hoda, kali raźviedka hadami palavała na terarystaŭ pa ŭsim śviecie.

Ahienty vajennaj raźviedki i «Šyn-Bet» apracoŭvajuć tysiačy hadzin videa, jakija sami ž bajeviki zdymali na telefony i kamiery GoPro, a potym vykładali ŭ sacyjalnyja sietki. Vykarystoŭvajučy prahramy raspaznavańnia tvaraŭ, analiz mietadanych mabilnych vyšak i dapytvajučy zatrymanych žycharoŭ Hazy, Izrail farmuje śpis celaŭ.

Pavodle izrailskich čynoŭnikaŭ, čałavieka mohuć uklučyć u śpis na likvidacyju biez suda, kali jość jak minimum dva dokazy jaho ŭdziełu ŭ złačynstvach 7 kastryčnika.

Pavialičyć

Jak adznačaje WSJ, vyjaŭleńnie celaŭ časam zajmaje dni, miesiacy abo navat hady. Da pieramirja z CHAMAS supracoŭniki «Šyn-Bet», armii i VPS pracavali razam u admysłovym štabie, dzie adsočvali kantakty, siemji i pieramiaščeńni padazravanych. Časta siłaviki spadziavalisia, što svajaki abo siabry vyvieduć ich na ludziej, jakija chavajucca.

Supracoŭniki «Šyn-Bet» navat vyznačali pryjarytetnaść celaŭ pavodle taho, ci mohuć ich siemji atrymać psichałahičnaje suciašeńnie ad likvidacyi kankretnaha čałavieka. Unutry słužby heta nazyvali «lačeńniem dla dušy».

Navat paśla kastryčnickaha pieramirja z CHAMAS i vyzvaleńnia apošnich žyvych zakładnikaŭ apieracyja praciahvajecca. Praŭda, hrupa NILI skaročanaja da niekalkich apieratyŭnikaŭ, jakija adsočvajuć celi i pieradajuć infarmacyju vajskoŭcam u Hazie. Izrail śćviardžaje, što likviduje ludziej, jakija pa-raniejšamu mohuć pradstaŭlać pahrozu — naprykład, rychtavać ataki abo nabližacca da pazicyj izrailskich vojskaŭ.

12 krasavika izrailskaja armija paviedamiła pra zabojstva Ali Sami Machamada Šakry — kamandzira ŭzvoda CHAMAS, jakoha vinavaciać u napadzie na fiestyval Nova i zachopie čatyroch zakładnikaŭ.

Za try dni da taho Izrail abviaściŭ pra likvidacyju bajevika «Isłamskaha džychadu» Abd al-Rachmana Amara Chasana Chudary, jakoha vinavaciać u napadzie na kibuc Nir-Oz, dzie byli zabityja abo vykradzienyja jak minimum čverć žycharoŭ.

15 maja izrailskaja avijacyja skinuła 13 bombaŭ na žyły dom i aŭtamabil u Hazie, kab zabić Iz ad-Dzina al-Chadada, adnaho z apošnich žyvych vysokapastaŭlenych bajevikoŭ CHAMAS. Chadad nie tolki płanavaŭ ataku 7 kastryčnika, ale i, pavodle śviedčańniaŭ vyzvalenych zakładnikaŭ, adkazvaŭ za ich utrymańnie ŭ tunelach.

Pavialičyć

Jak piša WSJ, sotni ludziej užo vykraśleny sa śpisu na likvidacyju. Izrail nie spyniajecca navat pierad drobnymi vykanaŭcami. Žurnalisty apisvajuć vypadak, kali praz dva hady paśla napadu z dapamohaj avijaŭdaru byŭ źniščany kiroŭca traktara, jaki ŭ toj dzień prarvaŭ pamiežnuju aharodžu.

Paralelna z hetym sotni žycharoŭ Hazy, abvinavačanych va ŭdziele ŭ atakach 7 kastryčnika, znachodziacca pad vartaj u Izraili ŭ čakańni suda. Parłamient niadaŭna pryniaŭ zakonaprajekt ab stvareńni admysłovaha vajennaha trybunała dla razhladu ich spraŭ.

Nieadnaznačnaja acenka

Ekśpierty, apytanyja vydańniem, pa-roznamu aceńvajuć efiektyŭnaść stratehii, abranaj Izrailem. Były vysokapastaŭleny aficer izrailskaj vajennaj raźviedki pa paleścinskich spravach Michael Milštejn davodzić, što na Blizkim Uschodzie pomsta maje asablivaje značeńnie. Na jaho dumku, heta častka movy siły i sposab prademanstravać surjoznaść namieraŭ.

Jaho kaleha, były vysokapastaŭleny supracoŭnik «Šyn-Bet» Šałom Ben Chanan, zajaviŭ, što hałoŭnaja meta — prymusić budučych vorahaŭ «dvojčy padumać» pra košt padobnych atak.

Ź inšaha boku, ekśpierty nakštałt zaprošanaj daśledčycy Jeŭrapiejskaha savieta pa mižnarodnych adnosinach Tachani Mustafy papiaredžvajuć, što mietadyčnyja zabojstvy mohuć, naadvarot, matyvavać niekatorych dałučacca da ŭzbrojenych farmavańniaŭ, asabliva pry adsutnaści palityčnaha šlachu vyrašeńnia asnoŭnaj prablemy paleścinskaj dziaržaŭnaści. Jana źviartaje ŭvahu na fakt rostu kolkaści navabrancaŭ CHAMAS padčas vajny.

Pavialičyć

Ekśpiertka pa mižnarodnym pravie Rejčeł VanŁandynhiem adznačyła, što padčas vajny armii majuć prava zabivać udzielnikaŭ bajavych dziejańniaŭ, u tym liku členaŭ niedziaržaŭnych hrupovak, navat u pieryjad pieramirja.

Ale, na jaje dumku, hramadzianskich asob, padazravanych u złačynstvach, nieabchodna zatrymlivać i sudzić. Pazasudovaje zabojstva hramadzianskich ličycca vajennym złačynstvam, a hałoŭnaja prablema — vyznačyć, chto źjaŭlajecca kambatantam, a chto nie.

Izrailskija vajskoŭcy ŭ svaju čarhu zajaŭlajuć, što mižnarodnaje prava dazvalaje im atakavać hramadzianskich asob, jakija prymajuć niepasredny ŭdzieł u vajennych dziejańniach.

Navat siarod samich paciarpiełych niama adzinstva ŭ staŭleńni da hetaj kampanii. Tak, 64‑hadovaja Aviva Sihał, jakaja praviała ŭ pałonie 51 dzień, zajaŭlaje, što vystupaje suprać novych zabojstvaŭ, bo joj dastatkova taho, što jana sama zastałasia žyvaja.

Tym nie mienš, jak padsumoŭvaje WSJ, izrailskaja apieratyŭnaja hrupa NILI praciahvaje svaju pracu, vykreślivajučy novyja imiony sa svajho śpisu. Kiraŭnik «Masada» David Barnea jašče ŭ pačatku 2024 hoda zajaviŭ, što hetaja apieracyja moža doŭžycca hadami — «jak paśla Miunchiena», ale Izrail «daciahniecca da ich usiudy».

• 7
• 0
• 0
• 0
• 0
• 0
• 0
• 0