Jaho aryštavali razam z bratam Tamazam, toj vyzvaliŭsia na paŭmiesiaca raniej. Ich maci nie dačakałasia synoŭ.
Cimur Pipija całkam adbyŭ svoj termin i vyjšaŭ na volu 28 maja 2026 hoda, paviedamlaje pravaabarončy centr «Viasna».
Futbolny zaŭziatar kolišniaha minskaha kłuba «MTZ-RIPA» byŭ zatrymany 25 vieraśnia 2020 hoda ŭ Minsku, kali čakaŭ naparnika, kab pajechać na pracu. Mužčynu abvinavacili pa niekalkich kryminalnych artykułach, u tym liku za ŭdzieł u masavych biesparadkach i hvałt u dačynieńni da milicyjantaŭ padčas padziej 10 žniŭnia i pratestaŭ paśla tajemnaj inaŭhuracyi Alaksandra Łukašenki.
U lipieni 2021 hoda sudździa Maskoŭskaha rajona Minska Śviatłana Bandarenka prysudziła Cimuru Pipii 6 hadoŭ, 3 miesiacy i 2 dni kałonii ŭzmocnienaha režymu. Svoj termin jon adbyvaŭ u papraŭčaj kałonii № 15, dzie sutyknuŭsia z žorstkimi ŭmovami ŭtrymańnia. Pravaabaroncy adznačali, što na praciahu hoda jamu ni razu nie dazvolili sustrecca z rodnymi i navat nie puskali da jaho advakata.
Pa hetaj ža kryminalnaj spravie prachodziŭ i rodny brat Cimura — 31‑hadovy Tamaz Pipija. Jak my pisali raniej, Tamaza zatrymali ŭ Hrodnie i pieršapačatkova asudzili na 5 hadoŭ uzmocnienaha režymu. Adnak užo padčas źniavoleńnia jamu dadali jašče paŭtara hoda kałonii za «złosnaje niepadparadkavańnie administracyi» pavodle artykuła 411 Kryminalnaha kodeksa. Tamaz vyjšaŭ na volu ŭ siaredzinie maja, apiaredziŭšy brata ŭsiaho na niekalki tydniaŭ.
Pakul braty znachodzilisia za kratami, u ich siamji adbyłasia trahiedyja — ad ankałahičnaha zachvorvańnia pamierła ich maci. Hałoŭnaj abaroncaj palitviaźniaŭ na voli stała ich małodšaja siastra Łuiza, jakoj na momant aryštu bratoŭ było ŭsiaho 18 hadoŭ.
Dziaŭčyna nie bajałasia publična vystupać u abaronu svajakoŭ, davała intervju i pisała zvaroty, niahledziačy na pastajanny cisk i pahrozy z boku śpiecsłužbaŭ.
Ciapier čytajuć
Adpačynak dla biasstrašnych i biespryncypovych: što ciapier z turami ź Biełarusi ŭ Krym?8
Kamientary