Iran i Aman praciahvajuć pieramovy ab budučaj sistemie kiravańnia Armuzskim pralivam — adnym z najvažniejšych marskich šlachoŭ u śviecie. Jak paviedamlaje telekanał Al Jazeera, Tehieran adchiliŭ prapanovu Maskata ab roŭnym raźmierkavańni kantrolu nad pralivam i prapanavaŭ ułasny varyjant.
Pa słovach namieśnika ministra zamiežnych spraŭ Irana Kaziema Harybabadzi, Aman prapanavaŭ stvaryć sumiesny rehijanalny miechanizm, pavodle jakoha abiedźvie krainy atrymali b pa 50 pracentaŭ kantrolu. Płan praduhledžvaŭ, što sudny buduć zachodzić u praliŭ praz terytaryjalnyja vody Irana, a vychodzić praz vody Amana. Kožnaja dziaržava kantralavała b sudnachodstva na svajoj pałovie praliva.
Akramia taho, aficyjny Maskat prapanavaŭ uvieści dobraachvotnyja ŭznosy dla sudnaŭ, jakija prachodziać praz praliŭ. Hetyja srodki płanavałasia vykarystoŭvać dla padtrymańnia biaśpieki sudnachodstva, achovy navakolnaha asiarodździa i praviadzieńnia vyratavalnych apieracyj. Takaja schiema nahadvaje miechanizm, jaki dziejničaje ŭ Małakskim pralivie.
Iran, adnak, zajaviŭ, što taki padychod nie ŭličvaje jaho intaresaŭ nacyjanalnaj biaśpieki. U adkaz Tehieran prapanavaŭ, kab adzin z hałoŭnych sudnachodnych maršrutaŭ całkam prachodziŭ praź iranskija terytaryjalnyja vody, a druhi taksama častkova znachodziŭsia pad iranskim kantrolem. Pavodle ŭładaŭ krainy, heta dazvolić bolš efiektyŭna kantralavać ruch sudnaŭ.
Iranski bok taksama papiaredziŭ, što praliŭ zastaniecca zakrytym, kali Aman nie prymie novuju prapanovu. Akramia taho, Tehieran daŭ zrazumieć, što viartańnia da raniejšaha režymu biaspłatnaha prachodu bolš nie budzie.
Pavodle infarmacyi Al Jazeera, ciapier Aman razhladaje jašče adzin kampramisny varyjant. Jon praduhledžvaje stvareńnie troch asobnych maršrutaŭ dla sudnaŭ: adzin budzie prachodzić praz terytaryjalnyja vody Irana, druhi — pa mižnarodnaj sudnachodnaj pałasie, a treci — praz terytaryjalnyja vody Amana. Krynicy telekanała adznačajuć, što Iran demanstruje peŭnuju hatoŭnaść da kampramisu, adnak jaho kančatkovaja pazicyja pakul nieviadomaja.
Pradmietam sprečak taksama zastajucca napramki ruchu sudnaŭ, pytańni raźminiravańnia praliva i pamier płaciažoŭ za jaho vykarystańnie. Pavodle acenak ekśpiertaŭ, prapanavanaja Iranam płata moža dasiahać adnaho miljona dalaraŭ z kožnaha sudna, što značna pieravyšaje sistemu dobraachvotnych uznosaŭ, jakaja dziejničaje ŭ Małakskim pralivie.
Armuzski praliŭ zastajecca centram napružanaści paśla ŭzbrojenaha kanfliktu pamiž Iranam i ZŠA. Da pačatku bajavych dziejańniaŭ praź jaho prachodziła kala piataj častki suśvietnych pastavak nafty i zvadkavanaha pryrodnaha hazu. Paśla zakryćcia praliva Iranam uźnikli surjoznyja prablemy z hłabalnymi pastaŭkami enierharesursaŭ.
Padpisany ŭ siaredzinie červienia miemarandum pamiž Iranam i ZŠA praduhledžvaŭ adnaŭleńnie sudnachodstva biez spahnańnia płaty jak minimum na 60 dzion. Adnak roznaje tłumačeńnie ŭmoŭ hetaha dakumienta vyklikała novyja sprečki adnosna taho, chto pavinien ažyćciaŭlać kančatkovy kantrol nad pralivam i pa jakich maršrutach pavinny ruchacca sudny. Heta pryviało da novaha abvastreńnia situacyi, choć paźniej bajavyja dziejańni byli spynieny. Dypłamatyčnyja pieramovy nakont budučyni Armuzskaha praliva praciahvajucca.
U kamandavańni ZŠA ličać, što ŭdary ŭ rajonie Armuza vyčarpali efiektyŭnaść — Axios
Druhaja piatla na šyi suśvietnaha handlu. Chusity pahražajuć zakryć Čyrvonaje mora
Tramp pieradumaŭ źbirać płatu za prachod sudnaŭ praz Armuzski praliŭ
Tramp: ZŠA voźmuć Armuzski zaliŭ pad kantrol i zabiaśpiečać jaho achovu. Ale nie zadarma
Vyvaz nafty ź Piersidskaha zaliva amal spyniŭsia
«Nie spadabalisia pradukty na palicy — i pišuć tudy esemesku». MUS nazvała Threads pahrozaj biaśpiecy i zajaviła pra zatrymańni13
«Nie spadabalisia pradukty na palicy — i pišuć tudy esemesku». MUS nazvała Threads pahrozaj biaśpiecy i zajaviła pra zatrymańni
«Viedajecie, Łukašenka nie prezident». Jany tak uśmichnulisia, kiŭnuli». Departavany z Hruzii Leŭ Michiejeŭ raskazaŭ, jak ź im abychodzilisia ŭ Armienii33
Kamientary
Kamu cikava bolš padrabiazna, možacie pačytać Regulations for the Straits of Malacca and Singapore (SOMS). Heta ŭsio, što treba viedać, ničoha napadob Amana-Iranskich chaciełak tam niama.