Palčys zaklikaŭ nie pierapisvać historyju 2020 hoda: Nie šukajcie łžyvych viersij minułaha

Daŭno chacieŭ napisać hety tekst, ale siońnia jakraz najbolš adpaviednaja data.

Kali ciabie zatrymlivajuć u 2020-m, a vykidvajuć u 2026-m, adno z samych šakavalnych adkryćciaŭ dla ŭsich narmalnych palitviaźniaŭ — heta mientalnyja źmieny ludziej.

Za hetyja 5 miesiacaŭ ja načytaŭsia i nasłuchaŭsia časam mnostva adkrytaha tryźnieńnia: što ŭ 20‑m pratesty arhanizavała Rasija, što kahości chtości ledź nie hvałtam vyvodziŭ, što kahości śpiecyjalna vykarystoŭvali i h. d.

Jašče ŭ turmie ja vyrazna bačyŭ, jak ludzi zadnim čysłom pierapisvajuć minułaje, kab znajści svajo zručnaje apraŭdańnie taho, što adbyvajecca.

Tyja, chto bajaŭsia ŭ banalnuju sčepku stać u žniŭni, praz paru miesiacaŭ u turemnaj kamiery ŭžo razvažali pra «treba było ź imi bolš žorstka».

Kali pratesty dušyli zvyšžorstkaściu, a potym pačałasia mihracyja, vajna i ŭnutranyja ŭmovy ŭ RB pačali miescami nahadvać KNDR, naturalna, u mnohich źjaviłasia hłybokaje pačućcio rasčaravańnia. I tut ža pavyłazili razumniki z tryźnieńniem pra 2020-y. A chtości pačaŭ šukać vinavataha, ci stvarać składanyja schiemy ŭnutranych apraŭdańniaŭ, ci pierakonvać siabie ŭ tym, čaho i blizka nie było.

Dyk voś — da siaredziny lipienia 2020‑ha ja byŭ za poŭny ihnor vybaraŭ, choć 99% u hety momant dumali absalutna inakš. Ale potym žyćcio zakruciła tak, što samomu pryjšłosia prysieści jak arhanizataru. I ja pomniu, jak u pačatku leta 20‑ha mnie pisali, što ja debił i ničoha nie razumieju, a my «zaraz pojdziem na vybary (prahałasujem, panazirajem) i pa zakonie pieramožam».

Heta była naiŭnaść, ale naiŭnaść ščyraja. Heta naiŭnaść była hałoŭnym palivam dla ruchavika tych padziej.

Tamu jak by kaho ni korčyła zaraz — 2020‑y hod źjaŭlajecca lehiendarnym, histaryčnym i hieraičnym pieryjadam dla biełaruskaj nacyi. Pa kolkaści i stupieni dałučanaści nasielnictva ź im nie paraŭniajecca ni 1991-y, ni 1918-y. Heta i samy čysty ŭ płanie arhanizacyi ruch, dzie nie było ni kapiejki jakoha-niebudź zachodniaha finansavańnia. I ŭsio heta praŭda, tamu što ludzi sami ščyra rabili toje, što ličyli pravilnym.

Kali mnohija z nas ciapier žyvuć u svabodnych krainach, davajcie vydušvać ź siabie savok i spyniać padśviadoma šukać iłžyvyja viersii minułaha, jakija pa sutnaści prosta źjaŭlajucca sprobaj skinuć adkaznaść za svaje dziejańni i vybar. Tak, usio ciapier niaprosta, ale ŭ historyi i ŭ Boha płany časta adroźnivajucca ad našych. I chto viedaje, što nas jašče čakaje napieradzie.

• 41
• 2
• 1
• 1
• 1
• 1
• 0
• 1