Były KVZšnik z BDU pisaŭ scenaryj dla hałoŭnaha kinakryndžu hoda. Navat Minkult dahetul nie moža ŭzhadnić hetaha pačvarnaha «Kałabka»

Pradkazać, što čakaje ŭ prakacie novy «Kałabok», było nieskładana — dastatkova tolki pahladzieć na hałoŭnaha hieroja. Kab stvaryć Kałabka, uziali asnovu ad kampjutarnaj hrafiki i dadali da jaje mimiku ad rasijskaha komika Haryka Charłamava. Atrymaŭsia zmročny tvar, jaki chutčej pužaje, a nie raduje, i pačvarnaść Kałabka — adna z hałoŭnych pretenzij da hetaj stužki.

U novaha Kałabka ŭvohule składanaje žyćcio. Niekali jaho śpiakła dziaŭčyna, jakaja chacieła zrabicca pryhažuniaj, ale nie paśpieła zładzić patrebnaha dla hetaha rytuału z Kałabkom. U filmie tuju dziaŭčynu, darečy, nazyvajuć pačvarynaj.

Hałoŭny hieroj źbiahaje ad jaje i ŭstupaje ŭ hrupoŭku bandytaŭ z kiraŭnikom pa mianušcy Voŭk — mienavita tam jon čarśćvieje i dušoj, i svaim chlebnym ciełam. Praź niekalki hadoŭ Kałabok pakidaje bandu. Paśla roznych pryhodaŭ jon znachodzić piekara Cichana, spakojnaha i dobraha chłopca, i ŭsialajecca ŭ jaho cieła.

Akazvajecca, što dziaŭčyna Łada, u jakuju zakachany Cichan — heta jakraz taja dziaŭčyna, jakaja i stvaryła Kałabka, i nasamreč jana pryhažunia, voś tolki sama heta nie razumieje. Viadoma, budzie chepi-end, voś tolki da hetaha Cichanu-Kałabku i Ładzie treba budzie prajści šmat pryhodaŭ, kab pabudavać adnosiny.

«Apošni vołat. Kałabok» — tak hučyć poŭnaja nazva filma — heta śpin-of ad franšyzy «Apošni vołat», jakuju ŭ Rasii niekali raspačynali zdymać razam sa studyjaj Disney. Siarod jaje stvaralnikaŭ Vital Šlapo — biełarus rodam ź Viciebskaj vobłaści. Z 1999 pa 2002 hody Šlapo byŭ kapitanam kamandy pa KVZ u BDU i ŭ tyja hady dvojčy staŭ ź joj čempijonam Vyšejšaj lihi KVZ.

Dalej Šlapo pracavaŭ na rasijskich kanałach, pakul u 2011‑m nie trapiŭ u kiraŭnictva kampanii «Yellow, Black and White». Hetaja studyja i sam Šlapo stvaryli bahata viadomych prajektaŭ na rasijskim telebačańni, u tym liku sieryjały «Kuchnia» i «Hatel Eleon», kinafranšyzu «Chałop».

Ale ž i ŭ Šlapo byvajuć niaŭdačy — vyhladaje, takoj dla jaho staŭ «Kałabok». Kab dać tamu «Kałabku» lepšyja ŭmovy dla zboraŭ, u Rasii adkłali premjeru novaha «Čałavieka-pavuka». Mahčyma, praz heta za dzień da pieršych pakazaŭ u «Kałabka» abvaliŭsia rejtynh na bujnym partale «Kinapošuk» — ciapier jon na ŭzroŭni 1,6 bała z 10. A ŭ sacsietkach pačali źjaŭlacca skryny z sajtaŭ kinateatraŭ, dzie było vidać, što na rasijski narodny błakbastar nichto nie biare kvitkoŭ. 

Biełarus Šlapo byŭ i adnym sa scenarystaŭ «Kałabka». I bahata hledačoŭ siarod minusaŭ filma adznačajuć nie tolki strašnuju hrafiku, ale i dziŭnyja scenarnyja znachodki.

Naprykład, adna hladačka była źbiantežanaja frazami nakštałt «U hetaha sutułaha zabiraju tułava» i «Łavi niečakančyk sabie ŭ žbančyk», jakija pačuła ŭ kino razam z małoj dačkoj. I šmat chto aburajecca dziŭnaj scenaj, dzie Cichan-Kałabok u prysutnaści Łady, to-bok dziaŭčyny, nalivaje kvas prosta sabie ŭ štany.

Ci pakažuć «Kałabka» ŭ Biełarusi? Naš kinaprakat šmat u čym pryviazany da rasijskaha, tamu i ŭ nas dziela «Kałabka» pieranieśli «Čałavieka-pavuka».

Rasijski film pra «Kałabka» čakali ŭ biełaruskim prakacie ŭ pieršy tydzień žniŭnia, ale ž niečakana «Kałabok» źnik z anłajn-afiš i śpisaŭ chutkich premjer. Jak daviedałasia «Naša Niva», «Kałabok» jašče moža vyjści ŭ Biełarusi, ale ž dla hetaha kino musić być uzhodnienaje ź Minkultam i dadadzienaje ŭ adpaviedny dziaržrehistr. Pakul ža biełaruskija čynoŭniki nie vyrašyli, ci dapuskać «Kałabka» ŭ prakat i ŭ jakim vyhladzie toje kino možna pakazvać u našaj krainie.

• 0
• 1
• 16
• 13
• 1
• 0
• 0
• 0