Biełaruskaha Siniuju Baradu adpuścili z rasijskaj turmy pamirać doma
Były kamsamolski načalnik i vajskovy raźviedčyk Ściapan Hančaryk atrymaŭ u Rasii 20 hadoŭ turmy za zabojstva žonki i padčarki. A pierad tym pry dziŭnych abstavinach zahinuli dźvie jaho papiarednija žonki.
U krasaviku 2025 hoda 66‑hadovaha biełaruskaha zabojcu Ściapana Hančaryka pieraviali z rasijskaj turmy ŭ Centr časovaha ŭtrymańnia zamiežnych hramadzian. Jaho čakała departacyja ŭ Biełaruś — pryčym pa stanie zdaroŭja. Vyzvaleńnie «ŭ suviazi ź ciažkaj chvarobaj» isnuje i ŭ rasijskim, i ŭ biełaruskim zakanadaŭstvie, ale vykarystoŭvajecca vielmi redka. Zvyčajna achvotnym vybracca na svabodu praz hetu lehalnuju ščylinu admaŭlajuć. Niekatoryja ž pamirajuć u turmie praź niekalki dzion paśla taho, jak vybivajuć sabie dazvoł na vyzvaleńnie, ale tak i nie paśpieŭšy vyjści na volu.
Hančaryk nie dasiadzieŭ u rasijskaj kałonii prykładna siem hadoŭ. Jamu prysudzili 20 hadoŭ źniavoleńnia za zabojstva žonki Jaŭhienii Silinaj i jaje 17‑hadovaj dački Kaciaryny, studentki fakulteta žurnalistyki MDU. Niekalki miesiacaŭ paśla ich śmierci jon vadziŭ śledstva za nos, ale ŭrešcie papaŭsia.
Try žonki — i ŭsie try zhinuli, pakinuŭšy jamu kvatery
Ściapan Hančaryk — adzin z samych viadomych biełaruskich złačyncaŭ u Rasii, jon prasłaviŭsia za košt svajoj dziŭnaj bijahrafii. Jaŭhienija Silina była jaho treciaj žonkaj — i ŭsie jany zahinuli pry dziŭnych abstavinach.
Hančaryk — vypusknik Minskaha instytuta fizkultury. Słužyŭ u Hiermanii, u vajskovaj raźviedcy. A ŭ 1980‑ia rabiŭ kamsamolskuju karjeru, staŭ zahadčykam adździeła Minskaha harkama kamsamoła.
U 1985 hodzie zahinuła ściuardesa Śviatłana Mińkova. Jana prymała vannu i vypuściła ŭ vadu ŭklučany ŭ razietku fien. Ekśpiertyza pryznała situacyju niaščasnym vypadkam.
Ad taho šlubu ŭ Ściapana zastaŭsia syn — i heta nieadnarazova budzie dapamahać jamu vyratavacca ad kryminalnaha pieraśledu.
Bo ŭžo tady na Hančaryka zaviali spravu za katavańnie žonki. Susiedzi kazali, što pjany Ściapan źbivaŭ Śviatłanu. Ale ŭsio abyšłosia ŭmoŭnym terminam — u jaho ž małoje dzicia.
Druhi šlub Hančaryk uziaŭ u siaredzinie 1990-ch. I praź niejki čas jaho novaja žonka, rasijanka Iryna Kaftan prosta źnikła. Jaje tak i nie znajšli. A sam Hančaryk raskazvaŭ usim, što jana źjechała ŭ Hiermaniju i asieła tam.
Nieŭzabavie Ściapana aryštavali, ale znoŭ nie za zabojstva. U jaho znajšli pistalet, ź jakoha zabili biznesmiena. Za zachoŭvańnie zbroi Hančaryk atrymaŭ dva hady kałonii, ale z adterminoŭkaj — znoŭ praz małoha syna.
U kałoniju jon usio ž trapiŭ. U pačatku 2000‑ch sieŭ za machlarstva ŭ asabliva bujnym pamiery. Jon padmanuŭ amal 200 čałaviek, sabraŭšy ź ich hrošy za adpraŭku na siezonnyja pracy ŭ Šviecyju. Za heta atrymaŭ 6 hadoŭ kałonii z kanfiskacyjaj.
Novaja žonka z kvateraj u Maskvie
Paśla vyzvaleńnia Ściapan uspomniŭ pra staruju siabroŭku — ź Jaŭhienijaj Silinaj jon paznajomiŭsia jašče ŭ 1980-ja. Dziaŭčyna, dačka savieckaha vajskovaha dypłamata, tady vučyłasia ŭ Minsku. Jana skončyła fiłasofski fakultet, a ŭ pačatku 1990‑ch viarnułasia ŭ Maskvu. Naradziła dačku Kaciarynu i žyła ŭ trochpakajovaj kvatery ŭ centry horada, jakaja zastałasia joj paśla śmierci baćkoŭ.
Ściapan i Jaŭhienija śpisalisia, i nieŭzabavie jon pierajechaŭ da jaje ŭ Maskvu. Ažanilisia ŭ 2008-m, zanialisia biznesam — Hančaryk vaziŭ u Maskvu biełaruskija kuchni.
Płan zabojstva
Hančaryk tym časam zadumaŭ zabojstva Jaŭhienii i jaje dački Kaci. Bo paličyŭ, što tady maskoŭskaja kvatera dastaniecca jamu jak adzinamu spadkajemcu.
U červieni 2010 hoda jon insceniravaŭ adjezd Jaŭhienii ŭ Pieciarburh, a sam zadušyŭ jaje i zakapaŭ trup u jamie ŭ Padmaskoŭi. Paśla jon paviedamiŭ pra źniknieńnie žonki. Jaje šukali niekalki miesiacaŭ, ale, viadoma, znajści nie mahli. Ściapan tym časam rassyłaŭ listy ad imia zahinułaj žonki i raskazvaŭ žurnalistam, što Jaŭhienija mahła dałučycca da niejkaj siekty.
Praz paŭhoda jon zabiŭ i padčarku, studentku žurfaka MDU i karespandentku infarmahienctva REX. Paśla hetaha jon adpraviŭ sabie list ad imia Kaciaryny — maŭlaŭ, taja znajšła mamu ŭ Pieciarburhu, tamu prasiła nie šukać ich. Pakłapaciŭsia i pra toje, kab «atrymać» zajavu ad zabitaj žonki pra toje, što jana pakidaje jamu ŭsiu majomaść. Počyrkaviedčaja ekśpiertyza pakazała, što listy pisaŭ jon sam.
Zrešty, zavałodać maskoŭskaj kvateraj Hančaryk tak i nie zdoleŭ. Vyśvietliłasia, što z druhoj žonkaj, jakaja źnikła, ale tak i nie była pryznanaja zahinułaj, jon nie raźvioŭsia. A značyć, rehistravać treci šlub u Maskvie jon nie moh.
20 hadoŭ zamiest pažyćciovaha
Hančaryku ŭ niejkaj stupieni pašancavała, što jamu prysudzili tolki 20 hadoŭ. Dla Rasii jaho biełaruskija sudzimaści nie mieli značeńnia, tamu farmalna jon byŭ niesudzimy. Za dva zabojstvy jon atrymaŭ 20 hadoŭ źniavoleńnia — spačatku 10 hadoŭ u turemnych umovach, paśla 10 hadoŭ u kałonii strohaha režymu. Zrešty, adbyć ich da kanca jon tak i nie zmoh.
U sudzie ab departacyi 28 krasavika 2025 hoda pradstaŭnik rasijskaha MUS zapeŭnivaŭ, što Hančaryka adpraviać u Biełaruś, što pracedura budzie vykanana «ŭ bližejšyja dni» — vidać, stan zdaroŭja byŭ takim, što mahli i nie paśpieć, kali b zaciahnuli departacyju.
Kamientary
PRitom pojmali jeho tolko s 3 popytki, tak čto 2 kvartiry možno priobriesti biez pośledstvij)