Rajonny adździeł adukacyi matyvuje heta nieabchodnaściu pieršačarhovaha pracaŭładkavańnia biełaruskich specyjalistaŭ
Vaŭkavysk čarhovy raz pryciahvaje ŭvahu ŚMI navinoju, źviazanaj z polskaj nacyjanalnaj mienšaściu. Dyrektar tamtejšaj škoły z polskaj movaj navučańnia na pačatku akademičnaha hodu atrymaŭ list ź miascovaha ŭpraŭleńnia ŭnutranych spraŭ. Da kiraŭnictva škoły davodziłasia, što dla pracy ŭ škole zamiežnych nastaŭnikaŭ patrebnaja adpaviednaja licenzija. U vyniku miesca polskich nastaŭnikaŭ zaniali ich biełaruskija kalehi – vypuskniki Haradzienskaha pedahahičnaha ŭniversytetu imia Ja. Kupały dy biełastockich VNU. Jak paviedamiła radyjo "Svaboda", školniki starejšych klasaŭ zastalisia niezadavolenyja jakaściu vykładańnia novych nastaŭnikaŭ i na znak pratestu pierastali naviedvać zaniatki. Školnicki strajk nibyta praciahvajecca ź minułaha tydnia.
Karespandent "NN" źviarnuŭsia da adnaho z baćkoŭ, čyj syn navučajecca ŭ vaŭkavyskaj polskamoŭnaj škole. Sp. Viktar Vajčuk paviedamiŭ nastupnaje: dzieci nie zajmalisia ŭ minuły aŭtorak, prapuścili try zaniatki. Potym ź imi pahutaryli, paabiacali vyrašyć pytańnie naležnym čynam i vučni adnavili zaniatki. Pavodle słoŭ V. Vajčuka, z baćkami naładzili hutarku čynoŭniki rajonnaha adździełu adukacyi, sabraŭšy ich spačatku pa klasach, a potym na ahulnaškolnym schodzie. Tam čynoŭnica RAA patłumačyła sytuacyju, jak nieabchodnaść u pieršuju čarhu pracaŭładkavać svaich specyjalistaŭ. Aburanyja baćki nibyta pakinuli schod. Raspačaty zbor podpisaŭ za toje, kab adnavić na pracy polskich nastaŭnikaŭ. "Siarod polskich nastaŭnikaŭ byli roznyja pa ŭzroŭni. Nastaŭnica polskaj movy, naprykład, vyvučyła nie adnaho pieramožcu alimpijadaŭ, navat i mižnarodnych" – kaža sp. Vajčuk. Pavodle školnikaŭ, biełaruskija nastaŭniki niabłaha vałodajuć polskaj movaj, adnak nia hetak dobra, kab adkazvać na pytańni pa-za školnaj prahramaj.
U Vaŭkavyskim RAA paviedamili, što zaniatki ŭ škole z polskaj movaj navučańnia prachodziać u poŭnym režymie zhodna z prahramaj navučańnia. Ni pra strajk, ni pra zbor podpisaŭ tam ničoha nia čuli. "Dzieci ŭźniali pytańnie pra toje, čamu ŭ novym navučalnym hodzie niama ichnich polskich nastaŭnikaŭ, im usio rastłumačyli i ciapier školniki praciahvajuć vučycca z novymi nastaŭnikami" – patłumačyła supracoŭnica vaŭkavyskaha adździełu adukacyi.
Miascovyja bačać siarod pryčynaŭ zabarony na pracu ŭ Biełarusi dla polskich nastaŭnikaŭ praciah kanfliktu vakoł Sajuzu palakaŭ u Biełarusi. Na apošnim, inicyjavanym uładami, źjeździe pradstaŭnikoŭ polskaj nacyjanalnaj mienšaści prysutničaŭ dyrektar vaŭkavyskaj škoły. Chodziać čutki, što jaho "ŭhavaryli" paprysutničać na źjeździe, matyvujučy heta tym, što jamu zastałosia dva hady da pensii. Udzieł na hetym mierapryjemstvie kaštavaŭ jamu zabarony na ŭjezd na terytoryju Polščy.
Ad pryvatnikaŭ patrabujuć zavieści ideołaha ŭ štacie — raspytali, što robiać kampanii18
Kamientary