U Polščy Kaścioł zaklikaŭ spynić raspalvańnie varožaści da ŭkraincaŭ
Stałaja rada Kanfierencyi jepiskapatu Polščy vystupiła sa śpiecyjalnym zvarotam na fonie raspalvańnia šavinistyčnaj prapahandy.
Apošnija miesiacy ŭ Polščy ŭsio čaściej paviedamlajuć pra napady na ŭkraincaŭ i incydenty. Hramadstva stamiłasia ad miljonaŭ uciekačoŭ, jakija zaviśli ŭ krainie na hady. Pavodle źviestak polskaj palicyi, tolki za pieršaje paŭhodździe 2026 hoda było zarehistravana 180 paviedamleńniaŭ pra mierkavanyja złačynstvy na hlebie nianaviści suprać hramadzian Ukrainy. Heta bolš čym na 30% pieravyšaje pakazčyk za toj ža pieryjad minułaha hoda.
Na hetym fonie Stałaja rada Kanfierencyi jepiskapatu Polščy apublikavała zvarot ab polska-ŭkrainskim prymireńni.
«Usie hetyja vypadki, niezaležna ad taho, majuć jany nacyjanalnuju, chulihanskuju ci kryminalnuju hlebu, zasłuhoŭvajuć asudžeńnia», — havorycca ŭ dakumiencie.
Biskupy nahadali, što paśla pačatku poŭnamaštabnaj vajny va Ukrainie ŭ lutym 2022 hoda sotni tysiač ukrainskich uciekačoŭ pierasiakali polskuju miažu. Palaki adkryvali im svaje damy i kvatery, a vałanciorskija arhanizacyi dapamahali z charčavańniem, miedycynskaj, finansavaj, jurydyčnaj i inšaj dapamohaj.
«Uvieś hety čas my jak Kaścioł zaŭsiody staim na baku tych, chto paciarpieŭ najbolš, siemjaŭ achviar vajny, tych, chto pakutuje i časta ŭžo nie maje kudy viarnucca», — zajavili biskupy.
Jany nahadali, što Kanfierencyja jepiskapatu Polščy nieadnarazova zaklikała da salidarnaści z Ukrainaj i prymireńnia dvuch narodaŭ, adnosiny jakich paznačanyja balučymi histaryčnymi ranami.
«My ščyra vierym, što hetyja rany mohuć zahaicca, a nad imi voźmuć vierch uzajemnaja pavaha i prymireńnie», — havorycca ŭ zvarocie.
Katalickija ijerarchi źviarnulisia «da viernikaŭ i niavierujučych, da ludziej dobraj voli ŭ Polščy» z zaklikam šukać u polska-ŭkrainskich adnosinach «pieradusim duch prymireńnia i chryścijanskaj lubovi».
«My zaklikajem da sumlennaha histaryčnaha dyjałohu, kab ciomnyja plamy našaj supolnaj historyi byli całkam vyśvietlenyja», — zajavili biskupy. Jany taksama zaklikali nie raspalvać varožaść na nacyjanalnaj hlebie.
Asobna ijerarchi źviarnulisia da polskich uładaŭ z zaklikam bolš efiektyŭna praduchilać incydenty na nacyjanalnaj hlebie i adnačasova zabiaśpiečvać vykanańnie zakona ŭsimi, chto znachodzicca ŭ krainie.
Hety zvarot polskich biskupaŭ pierahukajecca sa znakamitym zvarotam «Prabačajem i prabačeńnia prosim», nakiravanym polskimi biskupami niamieckim u 1965 hodzie. Ułady PNR skarystali heta jak nahodu dla brudnaj ataki na Kaścioł — maŭlaŭ, zvarot niepatryjatyčny. Ale toj zvarot prakłaŭ darohu da budučaha prymireńnia niemcaŭ i palakaŭ i ŭstojlivaha miru miž hetymi narodami. Adnym z aŭtaraŭ taho zvarotu byŭ budučy papa Jan Pavieł II, śviaty Karal Vajtyła.
Kamientary