U Viciebsku byłoha rektara VNU buduć sudzić za niezvyčajnaje złačynstva — jon prydumlaŭ studentaŭ
Amal try hady ŭ VNU zaličvali abituryjentaŭ, jakija tam nie vučylisia. Tak kiraŭnictva ŭniviersiteta, pavodle śledstva, sprabavała pakazać vykanańnie dziaržzakazu i schavać pravał z naboram na biudžet. Usiaho fiktyŭna aformili amal sto čałaviek.
U Viciebskaj vobłaści buduć sudzić byłoha kiraŭnika adnoj z VNU Viciebska. Pavodle viersii prakuratury, jon niekalki hadoŭ fiktyŭna zaličvaŭ abituryjentaŭ na biudžetnyja miescy, kab schavać realnyja prablemy z naboram studentaŭ.
Jak śćviardžaje śledstva, ź lipienia 2020 hoda pa vierasień 2023 hoda były rektar «viadučaj VNU sielskahaspadarčaha profilu», jaki adnačasova ŭznačalvaŭ pryjomnuju kamisiju, addavaŭ padnačalenym niezakonnyja rasparadžeńni — zaličvać studentaŭ tolki na papiery.
Metaj, pavodle śledstva, było «ŭjaŭnaje vykanańnie kantrolnych ličbaŭ pryjomu» i ŭtojvańnie sapraŭdnaj situacyi z naboram abituryjentaŭ na dzionnaje biudžetnaje navučańnie.
Schiema, pavodle materyjałaŭ spravy, była prostaj: supracoŭnikam zahadvali padavać u pryjomnuju kamisiju dakumienty ludziej, rehistravać ich i ŭnosić u aficyjnyja dakumienty zahadzia iłžyvyja źviestki ab pryjomie i zaličeńni na pieršy kurs.
Pry hetym realna hetyja abituryjenty va ŭniviersitet nie prychodzili. Paźniej fiktyŭna zaličanych ludziej prosta adličvali.
Takim čynam, na dzionnuju formu navučańnia za dziaržaŭny košt, u tym liku ŭ miežach metavaj padrychtoŭki, było fiktyŭna zaličana nie mienš za 95 čałaviek.
U prakuratury ličać, što hetyja dziejańni mieli surjoznyja nastupstvy: była skažonaja dziaržaŭnaja statystyka, sarvana vykanańnie dziaržzakazu na padrychtoŭku kadraŭ dla ahrapramysłovaha kompleksu, što jašče bolš pahoršyła deficyt śpiecyjalistaŭ.
Byłoha kiraŭnika VNU abvinavačvajuć u pieravyšeńni słužbovych paŭnamoctvaŭ.
Pry hetym były rektar zastaŭsia na voli pad asabistaje paručalnictva.
VNU, dzie heta adbyvałasia, nie nazyvajecca, ukazvajecca tolki, što heta viadučaja VNU ŭ halinie sielskaj haspadarki. U Viciebsku isnuje tolki adna VNU, što adpaviadaje apisańniu, — Viciebskaja dziaržaŭnaja akademija vieterynarnaj miedycyny.
Z 2016 pa 2024 hod jaje rektaram byŭ kandydat bijałahičnych navuk, doktar sielskahaspadarčych navuk Mikałaj Haŭryčenka.
Kamientary