У Віцебску былога рэктара ВНУ будуць судзіць за незвычайнае злачынства — ён прыдумляў студэнтаў
Амаль тры гады ў ВНУ залічвалі абітурыентаў, якія там не вучыліся. Так кіраўніцтва ўніверсітэта, паводле следства, спрабавала паказаць выкананне дзяржзаказу і схаваць правал з наборам на бюджэт. Усяго фіктыўна аформілі амаль сто чалавек.
У Віцебскай вобласці будуць судзіць былога кіраўніка адной з ВНУ Віцебска. Паводле версіі пракуратуры, ён некалькі гадоў фіктыўна залічваў абітурыентаў на бюджэтныя месцы, каб схаваць рэальныя праблемы з наборам студэнтаў.
Як сцвярджае следства, з ліпеня 2020 года па верасень 2023 года былы рэктар «вядучай ВНУ сельскагаспадарчага профілю», які адначасова ўзначальваў прыёмную камісію, аддаваў падначаленым незаконныя распараджэнні — залічваць студэнтаў толькі на паперы.
Мэтай, паводле следства, было «ўяўнае выкананне кантрольных лічбаў прыёму» і ўтойванне сапраўднай сітуацыі з наборам абітурыентаў на дзённае бюджэтнае навучанне.
Схема, паводле матэрыялаў справы, была простай: супрацоўнікам загадвалі падаваць у прыёмную камісію дакументы людзей, рэгістраваць іх і ўносіць у афіцыйныя дакументы загадзя ілжывыя звесткі аб прыёме і залічэнні на першы курс.
Пры гэтым рэальна гэтыя абітурыенты ва ўніверсітэт не прыходзілі. Пазней фіктыўна залічаных людзей проста адлічвалі.
Такім чынам, на дзённую форму навучання за дзяржаўны кошт, у тым ліку ў межах мэтавай падрыхтоўкі, было фіктыўна залічана не менш за 95 чалавек.
У пракуратуры лічаць, што гэтыя дзеянні мелі сур'ёзныя наступствы: была скажоная дзяржаўная статыстыка, сарвана выкананне дзяржзаказу на падрыхтоўку кадраў для аграпрамысловага комплексу, што яшчэ больш пагоршыла дэфіцыт спецыялістаў.
Былога кіраўніка ВНУ абвінавачваюць у перавышэнні службовых паўнамоцтваў.
Пры гэтым былы рэктар застаўся на волі пад асабістае паручальніцтва.
ВНУ, дзе гэта адбывалася, не называецца, указваецца толькі, што гэта вядучая ВНУ ў галіне сельскай гаспадаркі. У Віцебску існуе толькі адна ВНУ, што адпавядае апісанню, — Віцебская дзяржаўная акадэмія ветэрынарнай медыцыны.
З 2016 па 2024 год яе рэктарам быў кандыдат біялагічных навук, доктар сельскагаспадарчых навук Мікалай Гаўрычэнка.
Цяпер чытаюць
«Чаму мы павінны неяк ушчэмліваць сябе?». Дырэктарка РТБД патлумачыла, чаму паставіла спектакль паводле Пушкіна ў адным з апошніх тэатраў краіны, які працаваў па-беларуску17
Каментары